ಒಂದು ವಿಷಯವು ಯಾವ ತರ್ಕದಿಂದ ಸಿದ್ಧವಾಗುವದೋ ಮತ್ತೊಂದು ತರ್ಕದಿಂದ ಅದು ಅಸಿದ್ಧವೂ ಆಗಬಹುದು. ವಿಭಿನ್ನ ಮತ, ಪಂಥದವರಿಗೆ ತಮ್ಮದೇ ಮತ ಶ್ರೇಷ್ಠವೆನಿಸುತ್ತದೆ. ಅಥವಾ ಬೇರೆ ಬೇರೆ ಕಾಲಘಟ್ಟದಲ್ಲಿ ಒಂದೊಂದು ವಿಚಾರಧಾರೆಯು ಪ್ರಾಧಾನ್ಯ ಪಡೆಯಬಹುದು. ಇಲ್ಲಿ ವಿಷಯಕ್ಕಿಂತ ನಮ್ಮದೇ ಸರಿ ಎನ್ನುವ ಅಹಂಕಾರವೇ ದೊಡ್ಡದಾಗಿರುತ್ತದೆ. ತರ್ಕ ವಿತರ್ಕ ಮಾಡಿ ನಾವು ಮಂಡಿಸಿದ ಪರಿಯ ಬಗ್ಗೆ ಲೌಕಿಕದಲ್ಲಿ ಗರ್ವಪಡಬಹುದು ಅಥವಾ ಕೆಲವು ಜನರನ್ನು ಒಪ್ಪಿಸಬಹುದೇ ಹೊರತು ಅದೇ ಪರಮಸತ್ಯವಾಗಿರುವದಿಲ್ಲ. ‘ಅಹಂಕಾರ ಸಮಾಪ್ತಿಯಾದಾಗ ಸತ್ಯದೊಡನೆಯ ಸಂವಾದ ಆರಂಭವಾಗುತ್ತದೆ’ ಎನ್ನುತ್ತಾರೆ ಆಚಾರ್ಯ ರಜನೀಶ್. ಕಠೋಪನಿಷತ್ತು ಸಹ ‘ನೈಷಾ ತರ್ಕೆಣ ಮತಿರಾಪನೇಯಾ’- ಆ ದಿವ್ಯತೆಯು ಸತ್ಯ, ಪರಿಶುದ್ಧತೆ ಅಸಂಗತ್ವ, ಭಕ್ತಿ, ಜ್ಞಾನ ಇಂಥವುಗಳಿಂದ ದೊರೆಯುವದೇ ಹೊರತು ಬುದ್ಧಿಯ ಸೂಕ್ಷ್ಮತೆ ಅಥವಾ ಕೇವಲ ಜಾಣತನದಿಂದ ದೊರೆಯುವದಿಲ್ಲ ಎಂದಿದೆ. ಅಂಥ ಅವರ್ಣನೀಯ ಚೈತನ್ಯದ ಅನುಭೂತಿಯೆಡೆಗೆ ಸಾಗೋಣ.
