ವಿಭೂತಿ ಪುರುಷರ ಜೀವನ ದರ್ಶನ
ಅನುಭವ ಮತ್ತು ಅನುಭಾವದ ಸಮ್ಮಿಲಿತ ಮಹಾತ್ಮರ ಅಸ್ತಿತ್ವ. ಭೂತಿಯಿಂದ ಅನುಭೂತಿಗೆ, ಅನುಭೂತಿಯಿಂದ ಮಹಾಭೂತಿಗೆ, ಮಹಾಭೂತಿಯಿಂದ ವಿಭೂತಿಯೆಡೆಗೆ ಸಾಗಿದವರೇ ವಿಶ್ವ ವಿಭೂತಿಪುರುಷರು ಎಂಬ ಸಾಹಿತಿ ಹಂಪನಾ ಅವರ ನುಡಿತೋರಣ ಅರ್ಥಪೂರ್ಣ. ಸಾಮಾನ್ಯವಾಗಿ ಮಹಾತ್ಮರ, ಐತಿಹಾಸಿಕ ಪುರುಷರ ಚರಿತ್ರೆ ಬರೆಯುವ ಸಂದರ್ಭದಲ್ಲಿ ಒಬ್ಬರ ಅಥವಾ ಒಂದು ಪರಂಪರೆಯ ಅಥವಾ ಒಂದು ಪ್ರದೇಶ ಅಥವಾ ಒಂದು ಸಮುದಾಯಕ್ಕೆ ಸಂಬಂಧಪಟ್ಟವರ ವಿಷಯವನ್ನು ಆಯ್ಕೆ ಮಾಡಿಕೊಳ್ಳಲಾಗುತ್ತದೆ. ಆದರೆ ಆ ಎಲ್ಲವನ್ನೂ ಒಳಗೊಂಡವರ ಚರಿತ್ರೆ ಈ ಗ್ರಂಥದ ವಿಶೇಷ. ಮಹಾತ್ಮರ ಚರಿತಾಮೃತದ ಒಳಹೊಕ್ಕರೆ ಅಂಕಲಗಿಯ ಅಡಿವೆಪ್ಪನವರಿಂದ ಆರಂಭವಾಗಿ ರಮಣ ಮಹರ್ಷಿಗಳು, ಆದಿಚುಂಚನಗಿರಿಯ ಗೋರಕ್ಷನಾಥರು, ಎಡೆಯೂರು ಸಿದ್ಧಲಿಂಗೇಶ್ವರರು, ಗದಗಿನ ಗವಾಯಿಗಳು, ಧರ್ಮಸ್ಥಳದ ಹೆಗ್ಗಡೆಯವರು, ಶಂಕರಾಚಾರ್ಯರು, ಶಿವರಾತ್ರೀಶ್ವರರು, ಅರವಿಂದರು, ಪ್ರಜಾಪಿತ ಬ್ರಹ್ಮಬಾಬಾರವರು, ಮಲೆಮಹದೇಶ್ವರರು, ಮಂತ್ರಾಲಯದ ರಾಘವೇಂದ್ರ ಸ್ವಾಮಿಗಳು, ಮಹಾವೀರ, ಬುದ್ಧ, ಪೈಗಂಬರ್, ನಾನಕ, ಏಸುಕ್ರಿಸ್ತ, ವಾಲ್ಮೀಕಿ, ಭಕ್ತಿಭಂಡಾರಿ ಬಸವಣ್ಣ, ಅಕ್ಕಮಹಾದೇವಿ, ಸೇವಾಲಾಲ, ನಾರಾಯಣಗುರು, ಮಹಾತ್ಮ ಗಾಂಧೀಜಿ, ಅಂಬೇಡ್ಕರ್, ಚೈತನ್ಯ ಪ್ರಭುಗಳು, ತಿರುವಳ್ಳುವರ್, ಸಿದ್ಧಾರೂಢರು, ಡಾ. ಶಿವಕುಮಾರ ಸ್ವಾಮಿಗಳು ಹೀಗೆ 216 ಮಹಾತ್ಮರ ಚರಿತ್ರೆ ಈ ಗ್ರಂಥದಲ್ಲಿದೆ.
