ಹೌದು, ನಮ್ಮಲ್ಲಿರುವ ಸೋಮಾರಿತನ, ಅಸಂಗತ ನಿಲುವು, ನಂಬಿಕೆಗಳು ಕಾಲವಿಳಂಬ ಮಾಡಲು ಪ್ರೇರೇಪಿಸುತ್ತವೆ. ಜೀವನದಲ್ಲಿ ಬರುವ ಚಿಕ್ಕಪುಟ್ಟ ಸಮಸ್ಯೆಗಳ ಪರಿಹಾರ, ಪ್ರತಿದಿನದ ತಾತ್ಕಾಲಿಕ ಅಗತ್ಯಗಳ ಪೂರೈಕೆಯಲ್ಲೇ ನಿರತರಾಗಿ ಕನಸುಗಳನ್ನು ಸಾಕಾರಗೊಳಿಸುವಲ್ಲಿ ವಿಫಲರಾಗುತ್ತೇವೆ. ಒಂದೊಂದು ವಯಸ್ಸಿನಲ್ಲಿ ನಮಗೆ ಒಂದೊಂದು ವಿಶಿಷ್ಟವಾದ ಶಕ್ತಿ ಇರುತ್ತದೆ. ಕಾಲ ಬದಲಾದಂತೆ ಅದು ಕೂಡ ಬದಲಾಗುತ್ತದೆ. ಪ್ರಾಪ್ತರಾದವರು ಶಿಕ್ಷಣಕ್ಕೆ ಸಮಾನಾಂತರದಲ್ಲಿ ಸುತ್ತಲಿನ ಪ್ರಪಂಚವನ್ನು ಅರಿತುಕೊಳ್ಳುವ, ಬದುಕನ್ನು ರೂಪಿಸಿಕೊಳ್ಳುವ, ಸಮಾಜದ ಆಸ್ತಿಯಾಗುವ ದಿಸೆಯಲ್ಲಿ ಮುನ್ನಡೆಯಬೇಕು. ಬದುಕಿನ ವಿವಿಧ ಮಜಲುಗಳಲ್ಲಿ ನಮಗಿರುವ ಸಮಯವನ್ನು ಅನಗತ್ಯ ವಿಷಯಗಳಲ್ಲಿ ವಿನಿಯೋಗಿಸಿ, ವ್ಯರ್ಥಮಾಡಿದರೆ ಬದುಕಿನ ಮುಂದಿನ ಹಂತಗಳಲ್ಲಿ ಅದರಿಂದ ಯಾವುದೇ ಪ್ರಯೋಜನವಾಗದು. ಕಳೆದುಹೋದ ಸಮಯ ಆಳವಾದ ವಿಷಾದವನ್ನು ಮಾತ್ರ ಉಳಿಸಿ ಹೋಗುತ್ತದೆ. ಸುಖಾಸುಮ್ಮನೆ ಯಾವುದೋ ಭ್ರಾಂತಿಗಳ ಸುಳಿಗಳಲ್ಲಿ ಸಿಲುಕಿ, ನಮಗಾಗಿ ನೀಡಬೇಕಾದ ಸಮಯವನ್ನು ನೀಡದೇ ಹೋದರೆ ಅತ್ಯಮೂಲ್ಯವಾದ ಮಾನವ ಸಂಪನ್ಮೂಲದ ಸೋರಿಕೆಯಾಗಿ ಬದುಕು ವ್ಯರ್ಥವಾಗುತ್ತದೆ. ಪಶ್ಚಾತಾಪಕ್ಕೆ ಕಾರಣವಾಗುತ್ತದೆ. ನಮಗಾಗಿ ಸಮಯವನ್ನು ಹೆಚ್ಚು ಸಮರ್ಥವಾಗಿ, ಸಾರ್ಥಕವಾಗಿ ವಿನಿಯೋಗಿಸಲು ಮನಸ್ಸನ್ನು ಸಿದ್ಧಗೊಳಿಸಬೇಕು.
