ತನ್ನ ವಿಶ್ವರೂಪ ದರ್ಶನವಿತ್ತ ಸ್ವಾಮಿಯು ಅರ್ಜುನನನ್ನು ಕುರಿತು- ‘ಶ್ರೀರಾಮನನ್ನು ನಿಂದಿಸಿ ನೀ ಮಾತನಾಡಿದೆ. ನಿನ್ನ ಬಲ, ಪರಾಕ್ರಮಗಳ ಕುರಿತು ಆತ್ಮಸ್ತುತಿ ಮಾಡಿಕೊಂಡೆ. ನಿನ್ನೀ ಮನಸ್ಥಿತಿಯ ಕಾರಣದಿಂದಲೇ ಆಂಜನೇಯನಿಂದ ನಿನಗೆ ಮುಖಭಂಗವಾಯಿತು. ಇದಕ್ಕೆ ಪರಿಹಾರವೆಂದರೆ ನಿನ್ನಲ್ಲಿರುವ ‘ನಾನು, ನನ್ನದು, ನನಗೇ, ನನ್ನಿಂದಲೇ’ ಇತ್ಯಾದಿ ಸ್ವಾರ್ಥಪೂರಿತ ಅಹಂಕಾರ, ದುರಭಿಮಾನವನ್ನು ನಿನ್ನಿಂದ ದೂರೀಕರಿಸಬೇಕು. ನಿನ್ನ ಬಗ್ಗೆ ಹೊಂದಿರುವ ಅಭಿಮಾನ, ಸ್ವಾಭಿಮಾನ ದುರಭಿಮಾನವಾಗಬಾರದು. ಅಹಂಕಾರ, ರಾಗ, ದ್ವೇಷಗಳೇ ನಮ್ಮೊಳಗಿರುವ ಶತ್ರುಗಳು. ಈ ಅಂತಃಶತ್ರುಗಳನ್ನು ಮೊದಲು ನಾವು ಹೊರಗೋಡಿಸಬೇಕು. ಇದಕ್ಕಾಗಿ ಬುದ್ಧಿ, ಜ್ಞಾನ, ವಿನಯ, ವಿವೇಕಗಳನ್ನು ಗಳಿಸಿ ಬೆಳೆಸಿಕೊಂಡರೆ ನಮ್ಮೊಳಗೆ, ಹೊರಗೆ ಶತ್ರುಗಳೇ ಇಲ್ಲದೆ ನಾವು ಅಜಾತಶತ್ರುಗಳಾಗುತ್ತೇವೆ’ ಎಂಬ ನೀತಿಪಾಠ ಭೋದಿಸಿ ಅಂತರ್ಧಾನನಾದ.
