ಕಳೆದ ವರ್ಷದ ಮೊದಲ ಅಲೆಯಲ್ಲಿಯೇ ನಾವು ಪಾಠ ಕಲಿಯಬೇಕಿತ್ತು. ಮೊದಲ ಅಲೆ ಕೊಂಚ ಪ್ರಖರತೆ ಕಳೆದುಕೊಂಡಿತು ಎಂದೆನ್ನುವಷ್ಟರಲ್ಲಿ ಬಹಳ ಅಜಾಗರೂಕತೆಯಿಂದ ವರ್ತಿಸಿಬಿಟ್ಟೆವು. ಅದರ ಫಲಶ್ರುತಿ ಎಂಬಂತೆ, ಕರೊನಾದ ಎರಡನೆಯ ಅಲೆಯಲ್ಲಿ ಅಪಾರ ಸಾವು-ನೋವುಗಳನ್ನು ಅನುಭವಿಸುತ್ತಿದ್ದೇವೆ. ವೈದ್ಯಕೀಯ ಆಮ್ಲಜನಕಕ್ಕೆ ಪರದಾಡುವ ಸ್ಥಿತಿಗೆ ಬಂದು ತಲುಪಿದ್ದೇವೆ. ಕರೊನಾ ಎಂಬ ಮಹಾಮಾರಿಗೆ ಜಾತಿ, ಕುಲ, ಬಡವ, ಬಲ್ಲಿದನೆಂಬ ಭೇದವಿಲ್ಲ. ಕೈಯಲ್ಲಿ ಹಣವಿದ್ದರೂ ಚಿಕಿತ್ಸೆ ಕೊಡಿಸಲಾಗದೆ ನರಳುವ ರೋಗಿಗಳು ಒಂದೆಡೆಯಾದರೆ, ಆರ್ಥಿಕ ಸಂಕಷ್ಟದಲ್ಲಿಯೂ ದುಡಿಮೆಯ ಆಧಾರಸ್ತಂಭವಾದ ಜೀವವನ್ನು ಉಳಿಸಿಕೊಳ್ಳಲು ಪರದಾಡುವ ಜನಸಾಮಾನ್ಯರು ಮತ್ತೊಂದೆಡೆ.
