ನಾವು ತಾಯಿಯ ವಿಷಯದಲ್ಲಿ ಕೆಲವು ವಿಷಯಗಳನ್ನು ಕಾಳಜಿಯಿಂದ ನೋಡಿಕೊಂಡರೆ, ಮಗುವಿನ ಚಕ್ರಗಳ ರಚನೆಯನ್ನು ತಾಯಿಯ ಗರ್ಭದಲ್ಲೇ ಕೆಲ ಮಟ್ಟಿಗೆ ನಿರ್ಧರಿಸಬಹುದು. ಆದರೆ ಇಂದು ಆರ್ಥಿಕ ಮತ್ತು ಸಾಮಾಜಿಕ ಚಟುವಟಿಕೆಗಳು ಇಷ್ಟೊಂದು ಹೆಚ್ಚಾಗಿರುವುದರಿಂದ, ಗರ್ಭಿಣಿಯರೂ ಕಚೇರಿಗೆ ಹೋಗುತ್ತಾರೆ, ಪಾರ್ಟಿಗಳಿಗೆ ಹೋಗುತ್ತಾರೆ, ತಿನ್ನುತ್ತಾರೆ, ಕುಡಿಯುತ್ತಾರೆ, ಧೂಮಪಾನ ಮಾಡುತ್ತಾರೆ. ಈ ರೀತಿಯಲ್ಲಿ, ನಮ್ಮ ಪಾತ್ರವೇ ಇಲ್ಲದಂತೆ ಚಕ್ರಗಳ ಬೆಳವಣಿಗೆಯನ್ನು ಸಂಪೂರ್ಣವಾಗಿ ಪ್ರಕೃತಿಯ ಮೇಲೇ ಬಿಟ್ಟುಕೊಟ್ಟಿದ್ದೇವೆ. ಆದರೆ ನಾವು ಸೂಕ್ತವಾದದ್ದನ್ನು ಮಾಡಿದಲ್ಲಿ, ನಿರ್ದಿಷ್ಟ ಗುಣಗಳ ಬೆಳವಣಿಗೆಯ ನಿಟ್ಟಿನಲ್ಲಿ ಮಾರ್ಗಗಳಿವೆ. ನೀವಿದನ್ನು ಬೆಳೆಯನ್ನು ಬೆಳೆಯುವುದಕ್ಕೆ ಹೋಲಿಸಬಹುದು, ಫಲ ಶೇಕಡ ನೂರಕ್ಕೆ ನೂರು ನಿಮ್ಮ ನಿಯಂತ್ರಣದಲ್ಲಿ ಇರಲಾರದು, ಆದರೆ ಸರಿಯಾದ ಕೆಲಸಗಳನ್ನು ಮಾಡಿದರೆ ಉತ್ತಮ ಫಲಿತಾಂಶ ಸಿಗುತ್ತದೆ. ಇದೆಲ್ಲದರ ಹಿಂದಿನ ಆಶಯವೆಂದರೆ, ನಮ್ಮಿಂದಾಗುವ ಸಂತಾನ ನಮಗಿಂತ ಉತ್ತಮ ಗುಣಮಟ್ಟದ್ದಾಗಿರಬೇಕು. ಆದರೆ ಆ ಕಾಳಜಿ, ಅದನ್ನು ಸಾಕಾರಗೊಳಿಸಲು ಬೇಕಾದ ತೊಡಗಿಸಿಕೊಳ್ಳುವ ಮನೋಭಾವ ಇಂದು ಕಾಣುತ್ತಿಲ್ಲ, ಏಕೆಂದರೆ ನಮ್ಮದೇ ಜೀವನಗಳು ಅತಿಯಾಗಿ ಮುಖ್ಯವಾಗಿಬಿಟ್ಟಿವೆ. ಒಮ್ಮೆ ಬಹಳ ಸಣ್ಣ ಮೈಕಟ್ಟಿನ ಮಹಿಳೆ ನಮ್ಮನ್ನು ಭೇಟಿ ಮಾಡಿದರು. ತುಂಬು ಗರ್ಭಿಣಿಯಾಗಿದ್ದ ಅವರು ನಮ್ಮೊಂದಿಗೆ ಕೆಲಸ ಮಾಡಲು ಬಂದರು, ನಾನು ಕೇಳಿದೆ ‘ನಿಮ್ಮ ಮಗುವಿನ ಜನನ ಎಂದಾಗಲಿದೆ?’ ಅವರು ಹೇಳಿದರು- ‘ಬಹುಶಃ ನಾಳೆ ಬೆಳಗ್ಗೆ’. ನಾನು ಕೇಳಿದೆ, ‘ನೀವು ಇಲ್ಲಿ ಏನು ಮಾಡುತ್ತಿದ್ದೀರಿ?’ ಅವರು ಹೇಳಿದರು, ‘ಇದು ನನ್ನ ಎರಡನೇ ಮಗು. ಹಿಂದಿನ ಸಲವೂ ನಾನು ಪ್ರಸವಕ್ಕೂ ಎರಡು ಗಂಟೆಗಳ ಮುಂಚಿನವರೆಗೆ ಕೆಲಸ ಮಾಡಿದ್ದೆ’.
