ಮನುಷ್ಯತ್ವ: ತನ್ನ ಶಿಕ್ಷಣ, ಜ್ಞಾನ, ಸಂಸ್ಕಾರ ಹಾಗೂ ಬುದ್ದಿಮತ್ತೆಯಿಂದ, ಮನುಷ್ಯ, ಮೃಗತ್ವದಿಂದ ಮನುಷ್ಯತ್ವವನ್ನು ಏರಿ ಮಾನವನಾಗಿ ಬಾಳಬಲ್ಲ. ಆದುದರಿಂದಲೇ ತನಗೆ ಹಸಿವೆಯಾಗಿದೆ ಎಂದ ಮಾತ್ರಕ್ಕೆ ಉಪವಾಸವಿದ್ದರೂ ಸರಿ, ಆದರೆ ಇನ್ನೊಬ್ಬರ ತಟ್ಟೆಗೆ ಅವನು ಕೈ ಹಾಕಲಾರ. ಬಾಯಾರಿಕೆ ಆಗಿದೆ ಎಂದ ಮಾತ್ರಕ್ಕೆ ಚರಂಡಿಯ ನೀರನ್ನು ಕುಡಿಯಲಾರ. ಇನ್ನೊಬ್ಬರದನ್ನು ಆಶಿಸಲಾರ. ಪರಸ್ತ್ರೀಯರನ್ನು ಬಯಸಲಾರ. ದುಡಿದು ತಿನ್ನುವುದು, ಹಂಚಿ ತಿನ್ನುವುದು, ಜಾತಿ, ಮತ, ಭೇದ ಭಾವವಿಲ್ಲದೆ, ಎಲ್ಲರನ್ನೂ ಪ್ರೀತಿಸುವುದು, ಗೌರವಿಸುವುದು, ಮನುಷ್ಯತ್ವ. ಅಂತೆಯೇ, ದಯೆ, ಕೃತಜ್ಞತಾಭಾವ, ಇನ್ನೊಬ್ಬರ ಕುರಿತಾದ ಕರುಣೆ, ಕಾಳಜಿ, ಕನಿಕರ, ಸಂಕಷ್ಟದಲ್ಲಿರುವವರಿಗೆ ಸೇವೆ-ಸಹಾಯ, ಸಾಮಾಜಿಕ ಕಳಕಳಿ ಸಾಮರಸ್ಯ, ಸೌಹಾರ್ದ, ಪ್ರೀತಿ, ಪ್ರೇಮ, ಸ್ನೇಹ, ವಿಶ್ವಾಸ, ನಂಬಿಕೆ-ಎಲ್ಲವೂ, ಮುನುಷ್ಯತ್ವದ ನಾನಾ ರೂಪಗಳು. ನನ್ನದು ನನ್ನದೇ - ನಿನ್ನದು ನಿನ್ನದೇ ಈ ಭಾವ ಕೂಡ ಮನುಷ್ಯತ್ವ.
