ಕೇಂದ್ರ ನೌಕರರಿಗೆ ನಿವೃತ್ತರಾದ ದಿನವೇ ಪಿಂಚಣಿ ಸೌಲಭ್ಯ ನೀಡಲು ಕೇಂದ್ರ ಸರ್ಕಾರ ಮುಂದಾಗಿದ್ದು, ಈ ಕುರಿತಂತೆ ಹಲವಾರು ಕಾರ್ಯಸೂಚಿಗಳನ್ನು ತಯಾರು ಮಾಡಿದೆ. ಆದರೆ, ಅಂಚೆ ಇಲಾಖೆಯಲ್ಲಿ ಈಗಾಗಲೇ ಇಂಥದ್ದೊಂದು ವ್ಯವಸ್ಥೆ ಜಾರಿಯಲ್ಲಿದೆ. ಅಂಚೆ ಇಲಾಖೆಯ ಅಧಿಕಾರಿ, ಸಿಬ್ಬಂದಿಗೆ ನಿವೃತ್ತರಾದ ದಿನವೇ ಪಿಂಚಣಿ, ಡಿಸಿಆರ್ಜಿ ಮತ್ತಿತರ ಸೌಲಭ್ಯಗಳನ್ನು ನೀಡಲಾಗುತ್ತದೆ. ಇದು ಕಳೆದ 20 ವರ್ಷಗಳಿಂದ ನಡೆಯುತ್ತಿದೆ. ಅನಿವಾರ್ಯ ಕಾರಣದಿಂದ ಸ್ವಯಂನಿವೃತ್ತಿ ಪಡೆದವರಿಗೆ ಮತ್ತು ಶಿಕ್ಷೆಯಾಗಿ ಕಡ್ಡಾಯ ಸ್ವಯಂನಿವೃತ್ತಿ ಹೊಂದುವವರಿಗೆ ಈ ಸೌಲಭ್ಯಗಳು ಕೂಡಲೇ ಸಿಗುವುದಿಲ್ಲ. ಆದರೆ, ಉಳಿದ ಸಿಬ್ಬಂದಿಗೆ ನಿವೃತ್ತಿ ದಿನದಂದೇ ಪ್ರಾಪ್ತವಾಗುತ್ತವೆ.
