ರವಿ ತನ್ನ ಸ್ನೇಹಿತರ ಜೊತೆ ಪಟಾಕಿ ಹೊಡೆಯಲು ಹೊರಟ. ಎಲ್ಲರೂ ಸಣ್ಣ ಪಟಾಕಿಗಳನ್ನು ಹೊಡೆದು ಸಂತೋಷ ಪಡುತ್ತಿದ್ದರು. ಆದರೆ ರವಿ, ನಾನು ದೊಡ್ಡ ಬಾಂಬ್ ಹೊಡೆಯುತ್ತೇನೆ ಎಂದು ಹೇಳಿ, ತುಂಬಾ ಹತ್ತಿರ ಹೋಗಿ ಬೆಂಕಿ ಹಚ್ಚಲು ಮುಂದಾದ. ಆಗ ಅವನ ಅಕ್ಕ ಕಿರುಚಿದಳು, ‘ರವಿ! ಹತ್ತಿರ ಹೋಗಬೇಡ! ಪಟಾಕಿಗೆ ಬೆಂಕಿ ಹಚ್ಚಿ ದೂರ ನಿಲ್ಲಬೇಕು.’ ರವಿ ತಕ್ಷಣ ಹಿಂದಕ್ಕೆ ಸರಿದ. ಕೆಲ ಕ್ಷಣಗಳಲ್ಲಿ ಬಾಂಬ್ ಭಾರಿ ಸದ್ದು ಮಾಡಿತು. ರವಿ ಬೆಚ್ಚಿಬಿದ್ದ, ಅದೃಷ್ಟವಶಾತ್ ಗಾಯವಾಗಲಿಲ್ಲ. ಆ ರಾತ್ರಿ ಆತನ ಅಮ್ಮ ಹೇಳಿದರು, ‘ದೀಪಾವಳಿ ಬೆಳಕಿನ ಹಬ್ಬ, ಆದರೆ ಪಟಾಕಿ ಹೊಡೆಯುವಾಗ ಜಾಗರೂಕರಾಗಬೇಕು. ಬೆಳಕು ಸಂತೋಷ ಕೊಡಬೇಕು, ನೋವು ಕೊಡಬಾರದು’. ಅದಾದ ನಂತರ ರವಿ ಯಾವಾಗಲೂ ಪಟಾಕಿ ಹೊಡೆಯುವಾಗ ದೂರ ನಿಂತು, ಮುಂಜಾಗ್ರತೆ ವಹಿಸುತ್ತಿದ್ದ. ಅಲ್ಲದೆ, ಸಣ್ಣ ಮಕ್ಕಳು ಪಟಾಕಿಯಿಂದ ಅಪಾಯ ತಂದುಕೊಳ್ಳದಂತೆ ನೋಡಿಕೊಳ್ಳುತ್ತಿದ್ದ. ಇದು ಕಥೆಯಲ್ಲ. ನಮ್ಮ ಸುತ್ತಮುತ್ತ ನಡೆಯುವ ಪ್ರಸಂಗಗಳೇ ಆಗಿವೆ. ದೀಪಾವಳಿ ಸಂದರ್ಭದಲ್ಲಿ ಮಾಧ್ಯಮಗಳು ಎಷ್ಟೇ ಜಾಗೃತಿ ಮೂಡಿಸಿದರೂ ಪಟಾಕಿ ಸಿಡಿತದಿಂದ ಸಾವು-ನೋವುಗಳು, ಚಿಕ್ಕಮಕ್ಕಳು ದೃಷ್ಟಿ ಕಳೆದುಕೊಳ್ಳುವ ಬಗ್ಗೆ ಪ್ರತಿವರ್ಷ ವರದಿಯಾಗುತ್ತಲೇ ಇವೆ. ಎಲ್ಲರೂ ಇನ್ನಷ್ಟು ಜಾಗೃತರಾಗಬೇಕಾದ ಅಗತ್ಯವಿದೆ. ಪಟಾಕಿಯೊಂದಿಗೆ ಮೋಜು-ಮಸ್ತಿ ಸಲ್ಲದು. ಪಟಾಕಿ ಕ್ಷಣಿಕ ಆನಂದ ನೀಡಿದರೂ, ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ. ಉಸಿರಾಟದ ತೊಂದರೆ, ಕಣ್ಣಿಗೆ ಹಾನಿ ಮತ್ತು ಚರ್ಮದ ಅಲರ್ಜಿ ಉಂಟುಮಾಡುತ್ತದೆ. ಅಸ್ತಮಾ, ಹೃದಯದ ತೊಂದರೆ ಇರುವವರಿಗೆ, ಹಿರಿಯ ನಾಗರಿಕರಿಗೆ, ಎಳೆಯ ಮಕ್ಕಳಿಗೆ ಇದು ಅಪಾಯಕಾರಿ ಎಂಬುದು ಮರೆಯಬಾರದು. ಹಾಗಾಗಿ ಆರೋಗ್ಯಕ್ಕೂ-ಪರಿಸರಕ್ಕೂ ಹಿತವಾದ ಪರಿಸರಸ್ನೇಹಿ ಪಟಾಕಿಗಳ ಬಳಕೆ ಒಳ್ಳೆಯದು.
