ಮನಸ್ಸು ಹಲವು ಕಾರಣಗಳಿಂದಾಗಿ ವಿಕೃತಗೊಳ್ಳುತ್ತದೆ. ಹಾಗಾದಾಗ ಅಪಾಯಕಾರಿ ಘಟನೆಗಳು ಸಂಭವಿಸುತ್ತವೆ. ಮಾದಕ ವಸ್ತುಗಳ ಬಳಕೆ ಕೂಡ ಮನೋವಿಕೃತಿಯ ಒಂದು ಬಗೆ. ಒತ್ತಡ ಪರಿಸ್ಥಿತಿ ನಿಭಾಯಿಸಲಾಗದೇ ಸಂಶಯಗ್ರಸ್ತ ತರ್ಕ ಮಾಡುವುದು, ದೃಶ್ಯ ಹಾಗೂ ಶ್ರಾವ್ಯ ಭ್ರಾಂತಿಗಳು, ಉನ್ಮಾದ, ಅವಾಸ್ತವಿಕ ನಂಬಿಕೆಗಳು ಮತಿವಿಕಲ್ಪಕ್ಕೆ ಎಡೆ ಮಾಡಿಕೊಡುತ್ತವೆ. ಆಗ ಮನೋವಿಕೃತಿಗೆ ಒಳಗಾದ ವ್ಯಕ್ತಿಗೆ ತಾನು ಏನು ಮಾಡುತ್ತಿರುವೆ? ಎದುರಿನ ವ್ಯಕ್ತಿ ಯಾರು? ಇದ್ಯಾವುದರ ಅರಿವೇ ಇರುವುದಿಲ್ಲ. ಎಲ್ಲರೂ ನನ್ನ ವಿರುದ್ಧ ಪಿತೂರಿ ಮಾಡುತ್ತಾರೆ ಎನ್ನುವುದು, ಫ್ಯಾಂಟಸಿ ಹುಚ್ಚು ಪ್ರೀತಿ, ಅಸೂಯೆಯುಕ್ತ ಆಕ್ರಮಣಶೀಲತೆ ಅಥವಾ ಉತ್ಪ್ರೇಕ್ಷೆ ಹೀಗೆ ಹಲವು ಭಾವನೆ ಸೃಷ್ಟಿಸುವ ಮನಸ್ಥಿತಿ ಅಪಾಯ ಆಹ್ವಾನಿಸುತ್ತವೆ. ವ್ಯಕ್ತಿ ಯಾರನ್ನೋ ಅತಿಯಾಗಿ ಪ್ರೀತಿಸುವುದು, ಅವರಿಂದ ಭಾರಿ ನಿರೀಕ್ಷೆ ಇಟ್ಟುಕೊಳ್ಳುವುದು, ಅವರನ್ನು ತನ್ನ ಹೊರತುಪಡಿಸಿ ಯಾರೂ ಮಾತನಾಡಿಸಬಾರದು, ನೋಡಬಾರದು ಎನ್ನುವ ಮನಸ್ಥಿತಿ ಅದಕ್ಕೆ ಧಕ್ಕೆಯಾದಾಗ ಯಾವ ಮಟ್ಟಕ್ಕಾದರೂ ಹೋಗಬಹುದು. ಅದೇ ರೀತಿ ಕೀಳರಿಮೆ ಮನಸ್ಥಿತಿ ಕೂಡ ವಿಕೃತಿಗೆ ಕಾರಣವಾಗಬಹುದು. ನಾನು ಅಸಮರ್ಥ, ನಾನು ನೋಡಲು ಸುಂದರವಾಗಿಲ್ಲ. ಎಲ್ಲರೂ ನನ್ನ ಬಗ್ಗೆಯೇ ಮಾತನಾಡಿಕೊಳ್ಳುತ್ತಾರೆ ಅವಕಾಶ ಸಿಕ್ಕಾಗ ಸೇಡು ತೀರಿಸಿಕೊಳ್ಳಬೇಕು ಎನ್ನುವ ಆಲೋಚನೆ ಹಲ್ಲೆ, ಹತ್ಯೆಯಂತಹ ದುಷ್ಕೃತ್ಯಕ್ಕೆ ಎಡೆ ಮಾಡಿಕೊಡಬಹುದು. ಇನ್ನು ಮಹಿಳೆಯರಲ್ಲೂ ಮನೋವಿಕೃತ ಅಸ್ವಸ್ಥತೆ ಕಾಣಬಹುದಾಗಿದೆ. ದೈನಂದಿನ ಜೀವನದಲ್ಲಿ ಅಂದುಕೊಂಡಂತೆ ಆಗದಿದ್ದಾಗ ಅಥವಾ ವಿಚ್ಛೇದನದಂತಹ ಪ್ರಸಂಗ ಎದುರಾದಾಗ ಕೂಡ ಮನಸ್ಸು ವಿಕಾರಗೊಳ್ಳುತ್ತದೆ. ಸಮಾಜ ನನ್ನ ನಡವಳಿಕೆಯನ್ನು ಸ್ವೀಕರಿಸುತ್ತದೆಯೋ ಇಲ್ಲವೋ ಎನ್ನುವ ಸಂಶಯಯುಕ್ತ ಆತಂಕವೂ ಮನಸ್ಸನ್ನು ಅಸ್ಥಿರಗೊಳಿಸಬಹುದು.
