ಜೀವನದಲ್ಲಿ ಪ್ಲಸ್, ಮೈನಸ್ ಎರಡೂ ಇರುತ್ತವೆ. ನಾವು ಶಿಸ್ತಿನಿಂದ ಇದ್ದರೆ, ಆ ಸೋಲು-ಗೆಲುವು ಎರಡೂ ಹೆಚ್ಚು ಬಾಧಿಸುವುದಿಲ್ಲ. ಗೆಲುವು ಬಂದಾಗ ಹಿಗ್ಗುವುದಿಲ್ಲ, ಸೋಲು ಬಂದಾಗ ಕುಗ್ಗುವುದಿಲ್ಲ. ಎರಡನ್ನೂ ಸಮನಾಗಿ ಸ್ವೀಕರಿಸುವಂತಾಗುತ್ತದೆ. ಏಕೆಂದರೆ, ಇವತ್ತು ಯಶಸ್ಸಿದ್ದರೂ, ನಾಳೆ ಹೇಗಿರಬಹುದು ಎಂಬ ಸಣ್ಣ ಆತಂಕ ಇರುತ್ತದೆ. ನಾಳೆ ಸೋತಾಗ, ಮುಂದೆ ಒಳ್ಳೆಯ ಸಮಯ ಬರಬಹುದು ಎಂಬ ಆಶಾಭಾವನೆ ಇರುತ್ತದೆ. ಹಾಗಾಗಿ, ಏನೇ ಬಂದರೂ ನೆಲದ ಮೇಲೆ ನಿಲ್ಲುವಂತೆ ಮಾಡುತ್ತದೆ. ನನ್ನ ವಿಷಯವನ್ನೇ ತೆಗೆದುಕೊಂಡರೆ, ವೃತ್ತಿಜೀವನದಲ್ಲಿ ಸಾಕಷ್ಟು ಸೋಲು ಕಂಡಿದ್ದೇನೆ. ಹತ್ತು ವರ್ಷಗಳಿಗೂ ಹೆಚ್ಚು ಕಾಲ ನಾನು ಯಶಸ್ಸು ನೋಡುವುದಕ್ಕೆ ಸಾಧ್ಯವಾಗಲಿಲ್ಲ. ‘ಕಲ್ಲರಳಿ ಹೂವಾಗಿ’, ‘ಸೇವಂತಿ ಸೇವಂತಿ’ ತರಹದ ಗೆಲುವನ್ನು ಮತ್ತೆ ಕೊಡುವುದಕ್ಕೆ ಆಗಲಿಲ್ಲ. ಆದರೆ, ಯಾರು ಸಹ ಅದು ಸೋಲು ಎನ್ನಲಿಲ್ಲ. ‘ನಿಮಗೆ ಒಳ್ಳೆಯದಾಗಬೇಕು’ ಎಂದು ಹಾರೈಸುತ್ತಾರೆ. ಇದೆಲ್ಲದರ ನಡುವೆಯೂ ಜನ ನನ್ನ ಜತೆಗೆ ಕೆಲಸ ಮಾಡುವುದಕ್ಕೆ ಪ್ರೀತಿಯಿಂದ ಬರುತ್ತಾರೆ. ಅದಕ್ಕೆ ಕಾರಣ ನಾನು ಯಾವತ್ತೂ ಖುಷಿಯಾಗಿರುತ್ತೇನೆ. ಏನೇ ಕೆಲಸ ಬಂದರೂ ಅದನ್ನು ಮಾಡಿಕೊಂಡು ಹೋಗುತ್ತೇನೆ. ಖ್ಯಾತ ನೃತ್ಯ ನಿರ್ದೇಶಕ ಚಿನ್ನಿಪ್ರಕಾಶ್ ಮಾಸ್ಟರ್ ಒಮ್ಮೆ ಹೇಳಿದ್ದರು- ‘ರಾಜ, ವರ್ಕ್ ಕಮ್್ಸ ಫ್ರಮ್ ವರ್ಕ್’ ಅಂತ. ಅಂದರೆ ನಮ್ಮ ಕೆಲಸ ನೋಡಿ, ಇನ್ನೊಂದು ಕೆಲಸ ಸಿಗುತ್ತದೆ ಅಂತ. ನಾವು ಸರಿಯಾಗಿ ಕೆಲಸ ಮಾಡಿದರೆ, ಶಿಸ್ತುಬದ್ಧರಾಗಿದ್ದರೆ ಕೆಲಸ ನಮ್ಮನ್ನು ಹುಡುಕಿಕೊಂಡು ಬರುತ್ತದೆ. ಯಾವುದೇ ಕೆಲಸವಾದರೂ ಖುಷಿಯಿಂದ ಮಾಡುತ್ತೀನಿ ಎಂಬ ಮನಸ್ಥಿತಿ ಇರಬೇಕು ಅಷ್ಟೇ. ಹಾಗಾಗಿ, ಯಾವುದೇ ಕೆಲಸವಾದರೂ, ಅದು ನನಗೆ ಇಷ್ಟವಾದರೆ ಖಂಡಿತಾ ಮಾಡುತ್ತೇನೆ.
