ಪ್ರಾಗ್ಜ್ಯೋತಿಷಪುರದಿಂದ ಹೊರಟ ಯಜ್ಞಾಶ್ವವು ಮುನ್ನಡೆಯುತ್ತ ಸಿಂಧುರಾಜ್ಯವನ್ನು ಪ್ರವೇಶಿಸಿತು. ಅಲ್ಲಿ ಬಲವಾದ ಸಂಘರ್ಷ ಎದುರಾಯಿತು. ಆ ರಾಜ್ಯದ ದೊರೆಯಾಗಿದ್ದ ಜಯದ್ರಥ ಚರಿತ್ರವಾನ್ ಕ್ಷತ್ರಿಯವೀರ. ಅವನು ಧೃತರಾಷ್ಟ್ರನ ಪುತ್ರಿ ದುಶ್ಶಲಾಳ ಪತಿ. ಕೌರವರ ಬಾವ, ಸಂಬಂಧಿ. ಆದರೆ ಅವನು ಕುರುಕ್ಷೇತ್ರ ಯುದ್ಧದಲ್ಲಿ ಅರ್ಜುನನಿಂದಲೇ ಹತನಾಗಿದ್ದ. ಹಾಗಾಗಿ ಸಿಂಧುರಾಜ್ಯದ ಅನ್ಯ ಎಲ್ಲ ವೀರ ಯೋಧರೂ ವಿಶೇಷವಾಗಿ ಅರ್ಜುನನ ಮೇಲೆ ಹಗೆ ಕಾರುತ್ತಿದ್ದರು. ಆತನನ ರಕ್ಷಣೆಯಲ್ಲಿ ಯಜ್ಞಾಶ್ವವು ಸ್ವೇಚ್ಛೆಯಾಗಿ ಸಂಚರಿಸುತ್ತಿದೆ, ಅದೀಗ ತಮ್ಮ ರಾಜ್ಯವನ್ನು ಪ್ರವೇಶಿಸಿದೆ ಎಂದು ತಿಳಿದ ಸೈಂಧವವೀರರು ರೊಚ್ಚಿಗೆದ್ದು ದಂಡು ಕಟ್ಟಿ ಮುಗಿಬಿದ್ದು ಆ ಅಶ್ವವನ್ನು ಬಂಧಿಸಿ ಅರ್ಜುನನಿಗೆ ಯುದ್ಧಾಹ್ವಾನವಿತ್ತು ಕೇಕೆ ಹಾಕಿದ್ದರು. ಅರ್ಜುನನಿಗೆ ಆ ಘೋರ ಸಂಗ್ರಾಮ ಎದುರಾಯಿತು.
