ಮನುಷ್ಯನಿಗೆ ವಯಸ್ಸಾಗುತ್ತಿದ್ದಂತೆಯೇ, ಒತ್ತಡಗಳು ಜಾಸ್ತಿಯಾಗುತ್ತಿದ್ದಂತೆಯೇ ಸಹಜವಾಗಿ ಕಾಂತಿ ಕಡಿಮೆಯಾಗುತ್ತದೆ. ಮುಖ ಬಾಡುತ್ತದೆ. ಕೂದಲು ಉದುರುತ್ತದೆ. ದೇಹದ ಆಕಾರದಲ್ಲಿ ಸಾಕಷ್ಟು ಏರುಪೇರಾಗುತ್ತವೆ. ಒಟ್ಟಾರೆ ಒಂದೇ ರೀತಿ ಕಾಣುವುದು ಸಾಧ್ಯವೇ ಇಲ್ಲ. ಒಬ್ಬ ಸ್ಟಾರ್ ನಟ ಅಥವಾ ನಟಿಗೆ ತನ್ನ ಸೌಂದರ್ಯವನ್ನು ಕಾಪಾಡಿಕೊಳ್ಳುವುದು ಅನಿವಾರ್ಯವಾಗಿರುತ್ತದೆ. ಅದರಲ್ಲೂ ಒಬ್ಬ ನಟಿಗೆ ಇದರ ಅವಶ್ಯಕತೆ ಹೆಚ್ಚಿರುತ್ತಿದೆ. ಮೊದಲೇ ಚಿತ್ರರಂಗದಲ್ಲಿ ನಟಿಯರ ಅವಧಿ ಕಡಿಮೆ. ಅದರಲ್ಲೇ ಆಕೆ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಉಳಿಯಬೇಕಾದರೆ ಪ್ರತಿಭೆ ಜತೆಗೆ ಸೌಂದರ್ಯ ಬಹಳ ಪ್ರಾಮುಖ್ಯತೆ ವಹಿಸುತ್ತದೆ. ಸುಮ್ಮನೆ ಒಮ್ಮೆ ಹಿಂದಿ ಚಿತ್ರರಂಗವನ್ನು ಸೂಕ್ಷ್ಮವಾಗಿ ಗಮನಿಸಿ. ಅಲ್ಲಿ ಪ್ಲಾಸ್ಟಿಕ್ ಸರ್ಜರಿ ಮಾಡಿಸಿಕೊಂಡವರು, ಹೇರ್ ಟ್ರಾನ್ಸ್ಪ್ಲಾಂಟ್ ಮಾಡಿಸಿಕೊಂಡವರು ಸಾಕಷ್ಟು ಸಂಖ್ಯೆಯಲ್ಲಿದ್ದಾರೆ. ಶ್ರೀದೇವಿ, ಪ್ರಿಯಾಂಕಾ ಚೋಪ್ರಾ, ಶಿಲ್ಪಾ ಶೆಟ್ಟಿ, ಅನುಷ್ಕಾ ಶರ್ಮ, ಕತ್ರೀನಾ ಕೈಫ್, ಕಂಗನಾ ರಣಾವತ್, ಮೌನಿ ರಾಯ್, ರಾಖಿ ಸಾವಂತ್, ಶ್ರುತಿ ಹಾಸನ್, ಕರೀನಾ ಕಪೂರ್, ನೋರಾ ಫತೇಹಿ ಮುಂತಾದವರು ಆಪರೇಷನ್ ಮಾಡಿಸಿಕೊಂಡಿದ್ದಾರೆ. ತಮ್ಮ ಮೂಗು, ತುಟಿಯನ್ನು ಇನ್ನಷ್ಟು ಸುಂದರವಾಗಿಸಿಕೊಂಡವರಿದ್ದಾರೆ. ಈ ಮೂಲಕ ಸಾಕಷ್ಟು ಬದಲಾಗಿದ್ದಾರೆ. ಬರೀ ನಟಿಯರಷ್ಟೇ ಅಲ್ಲ, ಹಲವು ನಟರು ಸಹ ವಿವಿಧ ಸರ್ಜರಿ ಮಾಡಿಸಿಕೊಂಡಿರುವ ಸುದ್ದಿ ಇದೆ. ಸಲ್ಮಾನ್ ಖಾನ್ ಕೂದಲು ಕಸಿ ಮಾಡಿಸಿಕೊಂಡಿರುವ ವಿಷಯ ರಹಸ್ಯವಾಗೇನೂ ಉಳಿದಿಲ್ಲ. ಶಾರೂಖ್ ಖಾನ್, ಆಮೀರ್ ಖಾನ್, ಅನಿಲ್ ಕಪೂರ್ ಮುಂತಾದವರು ಮುಖದ ಮೇಲೆ ಸುಕ್ಕಾಗದಂತೆ ಆಪರೇಷನ್ ಮಾಡಿಸಿಕೊಂಡಿದ್ದಾರೆ ಎಂಬ ವಿಷಯ ಆಗಾಗ ಕೇಳಿ ಬರುತ್ತಲೇ ಇರುತ್ತವೆ.
