ದೇಸೀ ತಳಿಗಳನ್ನು ಉಳಿಸಬೇಕು ಎನ್ನುವುದು ನಿಜವೇ ಆದರೂ ಹಾಲು ಕೊಡುವ ಹಸುಗಳ ಬೆಲೆ ಬಡವರ ಕೈಗೆ ಎಟುಕುತ್ತದೆಯೇ? ಹಾಲನ್ನು ಬಡವರು ಕೊಳ್ಳಲು ಸಾಧ್ಯವೇ? ಶ್ರೀಮಂತರಿಗೋಸ್ಕರವೇ ಅವೆಲ್ಲಾ ಇದೆ ಎಂದಾದರೆ ದೇಶದಲ್ಲಿರುವ ಹೆಚ್ಚಿನ ಬಡವರು ಏನು ಮಾಡಬೇಕು? ದೇಸೀ ಹಸುಗಳು, ಹಾಲು, ತುಪ್ಪ ಎಲ್ಲವೂ ಇಂದು ಮಾರಾಟದ ವಸ್ತುಗಳೇ ಅಲ್ಲವೇ? ವಿನಿಮಯ ಪದ್ದತಿ ಎಲ್ಲಾದರೂ ಉಂಟೇ? ಓರ್ವ ಸಾವಯವ ಬದುಕನ್ನೇ ನಡೆಸುತ್ತಿದ್ದೇನೆ, ಯಾರಾದರೂ ನನ್ನ ಗಿರ್ ಕರುಗಳನ್ನು ಸಾಕುವವರಿದ್ದರೆ ಉಚಿತವಾಗಿ ಕೊಡುತ್ತೇನೆ ಎಂದು ಹೇಳಿಕೊಳ್ಳುತ್ತಿದ್ದ ಕೃಷಿಕರೊಬ್ಬರ ಮನೆಗೆ ಹಸು ಸಾಕುತ್ತೇನೆಂದು ಬಯಸಿದ ಬಡ ಕುಟುಂಬದ ಹುಡುಗನೊಬ್ಬನನ್ನು ಕಳಿಸಿದೆ. ಆತ ತನ್ನ ಬಳಿ ಇರುವ ಹಸುಗಳು, ಹುಲ್ಲು ಬೆಳೆಯುವ ಪ್ರದೇಶ, ಕಾಡು ಮುಂತಾದ ಎಲ್ಲಾ ವಿವರಗಳನ್ನು ಕೊಟ್ಟ ಮೇಲೂ ಕರುವಿನ ಸಂಗತಿ ಬಂದಾಗ 40 ಸಾವಿರಕ್ಕೆ ಹೋಗುವ ಕರುಗಳು ಇವು, ನಿಮಗೋಸ್ಕರ 20 ಸಾವಿರಕ್ಕೆ ಕೊಡುತ್ತೇನೆ ಎಂದರು. ಹೋಗಲಿ ಯಾರಿಗಾದರೂ ಆಸಕ್ತರಿಗೆ ಕೊಡುವುದಿರಲಿ, ಎರಡು ಮೂರು ಕರು ಇದೆ ಎಂದು ಮಗಳ ಮನೆಗೆ ಒಂದು ಹಸುವನ್ನು ಕಳಿಸುವ ರೂಢಿಯಾದರೂ ಇದೆಯಾ? ಅಥವಾ ಮಗಳು ಅದನ್ನು ಸಾಕಿ, ಸಲಹುವಂತೆ ನಾವು ಅವಳನ್ನು ಬೆಳೆಸುತ್ತಿದ್ದೇವಾ? ಅವಳಿಗೆ ಈ ಜಂಜಾಟಗಳೆಲ್ಲಾ ಬೇಡವೆಂದು ಕಾಸ್ಮೋಪಾಲಿಟನ್ ಸಿಟಿಗೆ ಕಳಿಸುತ್ತಿದ್ದೇವಾ?
