ಪ್ರಾಮಾಣಿಕಳಾಗಿದ್ದ ಆ ತಾಯಿ ನುಡಿದಳು, ‘ನಿಜ ಹೇಳಬೇಕೆಂದರೆ ನಿನ್ನ ಅಪ್ಪ ಯಾರೂಂತ ನನಗೂ ಗೊತ್ತಿಲ್ಲ ಮಗೂ, ಅಂದ ಮೇಲೆ ನಿನ್ನ ಗೋತ್ರ ಯಾವುದೆಂಬುದನ್ನು ಹೇಗೆ ಹೇಳಲಿ? ನನ್ನ ಅಮ್ಮನ ಗೋತ್ರವೇ ನನ್ನ ಗೋತ್ರವೆಂದು ಗುರುಗಳಿಗೆ ಹೇಳು.’ ಇದನ್ನೇ ಹೇಳಿದ ಆ ಬಾಲಕ ಬ್ರಾಹ್ಮಣ ಮುನಿಯ ಆಶ್ರಮದಲ್ಲಿ ವಿದ್ಯಾಭ್ಯಾಸ ಪಡೆದು ಮುಂದೇ ಜಗತ್ತೇ ಒಪ್ಪಿಕೊಂಡ ಮಹಾಮುನಿಯಾಗುತ್ತಾನೆ. ಅವನೇ ಸತ್ಯಕಾಮಾ ಜಾಬಾಲ. ತನ್ನ ಜಾತಿಯೇ ಗೊತ್ತಿಲ್ಲದವನು ಮಹಾಜ್ಞಾನಿಯಾದುದು, ಜ್ಞಾನ ಜಾತ್ಯಾಧಾರಿತವಲ್ಲವೆಂಬುದನ್ನು ಸ್ಪಷ್ಟಪಡಿಸುತ್ತದೆ. ವೇದಗಳನ್ನು ವಿಂಗಡಿಸಿದ ಮಹರ್ಷಿ ವೇದವ್ಯಾಸರು ಮೇಲ್ಜಾತಿಯ ಕುಲದಲ್ಲಿ ಜನಿಸಿದವರಲ್ಲ; ಅಂಬಿಗರ ಸ್ತ್ರೀಗೆ ಹುಟ್ಟಿದವರು. ರಾಮಾಯಣವನ್ನು ಬರೆದ ವಾಲ್ಮೀಕಿ ಮಹರ್ಷಿ ಹಿಂದುಳಿದ ವರ್ಗಕ್ಕೆ ಸೇರಿದ ವ್ಯಾಧ. ಕವಿರತ್ನ ಕಾಳಿದಾಸ ಮತ್ತು ಸಂತ ಕನಕದಾಸರು, ಜಾತಿಯಲ್ಲಿ ಕುರುಬರು. ಆದಿ ಶಂಕರಾಚಾರ್ಯರ ಜ್ಞಾನವ್ಯಾಪ್ತಿಯನ್ನು ಹೆಚ್ಚಿಸಿದವನು, ಓರ್ವ ಚಾಂಡಾಲ. ಸಂತ ಕಬೀರದಾಸರು ಹಾಗೂ ಸಂತ ಶಿಶುನಾಳ ಷರೀಫರು ಮುಸ್ಲಿಂ ಸಮುದಾಯಕ್ಕೆ ಸೇರಿದವರು.
