ಮೂರು ವರ್ಷಗಳ ಹಿಂದೆ ಎಂದರೆ 2016ರ ಡಿಸೆಂಬರ್ನಲ್ಲಿ ತೆರೆ ಕಂಡಿದ್ದ ತಮ್ಮ ‘ಕಿರಿಕ್ ಪಾರ್ಟಿ’ ಸಿನಿಮಾದ ಸೀಕ್ವೆಲ್ ರೀತಿಯಲ್ಲಿ ‘ಕಿರಿಕ್ ಪಾರ್ಟಿ 2’ ಮೂಡಿ ಬರಲಿದೆ ಎಂದು ಅವರು ತಿಳಿಸಿದ್ದಾರೆ. ಅಂದಹಾಗೆ ಈ ‘ಕಿರಿಕ್ ಪಾರ್ಟಿ 2’ಗೆ ಪ್ರೇರಣೆಯೇ ಕಿರಿಕ್. ಹಾಗಂತ ಅವರು ಈ ಹಿಂದೆ ಮಾಡಿರುವ ಸಿನಿಮಾ ಸ್ಫೂರ್ತಿಯಲ್ಲ. ಬದಲಿಗೆ, ಆ ‘ಕಿರಿಕ್ ಪಾರ್ಟಿ’ಯಲ್ಲಿನ ‘ಹೇ ಹೂ ಆರ್ ಯೂ..’ ಹಾಡಿನ ಸಂಬಂಧ ಕಾಪಿರೈಟ್ ಕಾಯ್ದೆ ಅನ್ವಯ ‘ಲಹರಿ ರೆಕಾರ್ಡಿಂಗ್ ಕಂಪನಿ’ ಹೂಡಿರುವ ಮೊಕದ್ದಮೆಯೇ ಈ ‘ಕಿರಿಕ್ ಪಾರ್ಟಿ 2’ಗೆ ಪ್ರೇರಣೆ. ಮೂರು ವರ್ಷಗಳ ಹಿಂದೆ ಆ ಕೇಸ್ನಲ್ಲಿ ಜಯ ಸಿಕ್ಕಿದ್ದರೂ ಮತ್ತೆ ಅದೇ ವಿಷಯದ ಸಂಬಂಧ ಇತ್ತೀಚೆಗೆ ಮತ್ತೆ ಕೇಸ್ ದಾಖಲಿಸಿ ಕಿರಿಕ್ ಸೃಷ್ಟಿಸಿರುವ ಹಿನ್ನೆಲೆಯಲ್ಲಿ ರಕ್ಷಿತ್ಗೆ ಈ ಸೀಕ್ವೆಲ್ ಐಡಿಯಾ ಹೊಳೆದಿದೆ. ‘ಸಿನಿಮಾ ಬಿಡುಗಡೆ ಮುನ್ನ ಕೇಸ್ ಹಾಕಿ ಕಿರಿಕ್ ಮಾಡುವ ಪ್ರಕರಣಗಳ ಹಿನ್ನೆಲೆಯಲ್ಲಿ ಒಂದೆಳೆ ಕಥೆ ಹೊಳೆದಿದ್ದು, ಚಿತ್ರಕಥೆ ರಚಿಸಲು ಸಿದ್ಧತೆ ನಡೆಸಿದ್ದು, ಶೀಘ್ರದಲ್ಲೇ ಸ್ಕ್ರಿಪ್ಟ್ ಪೂರ್ಣಗೊಳ್ಳಲಿದೆ. ಇದಕ್ಕೂ ‘ಕಿರಿಕ್ ಪಾರ್ಟಿ’ ತಂಡವೇ ಕೆಲಸ ಮಾಡಲಿದೆ. ರಿಷಬ್ ಶೆಟ್ಟಿ ನಿರ್ದೇಶನ, ಸಂಯುಕ್ತಾ ಹೆಗಡೆ ನಾಯಕಿಯರಲ್ಲಿ ಒಬ್ಬರಾಗಿರಲಿದ್ದಾರೆ. ನಾಯಕನಾಗಿ ನಾನೇ ಅಭಿನಯಿಸಲಿದ್ದೇನೆ’ ಎಂದಿರುವ ರಕ್ಷಿತ್, ಹೆಚ್ಚಿನ ಮಾಹಿತಿ ಸದ್ಯದಲ್ಲೇ ಹಂಚಿಕೊಳ್ಳಲಾಗುವುದು ಎಂದಿದ್ದಾರೆ.
