ಕಲಿಯುಗದಲಿ ಕರಿಕಾಫಿಯ ಕುಡಿದರೆ... ಕರುಣಿಸೊ ಕಣ್ಣ!

decoction ಎಂದರೆ ಕಾಫಿಹುಡಿ ಹಾಕಿದ ಕುದಿನೀರು ಎಂಬುದಷ್ಟಕ್ಕೇ ಸೀಮಿತವಲ್ಲ. ಯಾವುದೇ ಪದಾರ್ಥವನ್ನು ನೀರಲ್ಲಿ ಕುದಿಸಿ ಅದರ ಸತ್ತ್ವವನ್ನು ಪಡೆಯುವುದಕ್ಕೆ decoction ಎನ್ನುತ್ತೇವೆ. ಚಹದ ಎಲೆಗಳನ್ನು ಅಥವಾ ಹುಡಿಯನ್ನು ನೀರಲ್ಲಿ ಕುದಿಸಿದರೆ ಅದು ಚಹ ಡಿಕಾಕ್ಷನ್. ಇನ್ನಾವುದೋ ಗಿಡಮೂಲಿಕೆಯನ್ನು ನೀರಲ್ಲಿ ಕುದಿಸಿ ತಯಾರಿಸಿದ ದ್ರಾವಣವೂ ಡಿಕಾಕ್ಷನ್ನೇ. ಇಂಗ್ಲಿಷ್‌ನಲ್ಲಿ ಈ ಪದದ ವ್ಯಾಖ್ಯೆ act of boiling in water ಎಂದೇ ಇರುವುದು. ಈ ದೃಷ್ಟಿಯಿಂದ, ಸಂಸ್ಕೃತ/ ಆಯುರ್ವೇದದಿಂದ ಬಂದ ‘ಕಷಾಯ’ ಪದ ಡಿಕಾಕ್ಷನ್‌ಗೆ ಸೂಕ್ತ ಪರ್ಯಾಯವಾಗಬಲ್ಲದು. ರೂಢಿಯಲ್ಲಿ ನಮಗೆ ಕಷಾಯ ಎಂದೊಡನೆ ಕಾಫಿ/ಚಹ ಕಣ್ಮುಂದೆ ಬರಲಿಕ್ಕಿಲ್ಲ. ಶುಂಠಿಯದೋ ಜೀರಿಗೆಯದೋ ಕಷಾಯವೇ ನೆನಪಾದೀತು. ಆದರೆ ಕಸಾಪ ನಿಘಂಟುವಿನಲ್ಲೂ ಕಷಾಯ ಪದಕ್ಕೆ ಕೊಟ್ಟಿರುವ ಬೇರೆಬೇರೆ ಅರ್ಥಗಳಲ್ಲಿ ‘ಮೂಲಿಕೆಗಳನ್ನು ಭಟ್ಟಿಯಿಳಿಸಿ ತೆಗೆದ ರಸ’ ಮತ್ತು ‘ಚಹ ಕಾಫಿ ಮೊದಲಾದವುಗಳ ಅರ್ಕ’ ಕೂಡ ಇವೆ. ಔಷಧಂ ಬೇಯಲು ಕಷಾಯಮೆನಿಸಿಕ್ಕು- ಅಂತೊಂದು ಹಳಗನ್ನಡ ನುಡಿಯೂ ಇದೆ. ಕಾಫಿ/ಚಹ ಕೂಡ ಚೈತನ್ಯದಾಯಕ ಔಷಧಗಳೆಂದೇ ಪರಿಗಣಿಸಿದರೆ ಆಯ್ತಲ್ಲ! ನೂರಕ್ಕೂ ಹೆಚ್ಚು ಪ್ರವೇಶಿಕೆಗಳಲ್ಲಿ ಓದುಗರು ಡಿಕಾಕ್ಷನ್‌ಗೆ ಪರ್ಯಾಯ ಪದವಾಗಿ ‘ಕಷಾಯ’ವನ್ನೇ ಸೂಚಿಸಿದ್ದಾರೆ- ನಾಗಮಣಿ ಶಾಂಪುರ್, ಸಿ.ಪ್ರಭಾಕರ ರಾವ್, ರಾಜೇಶ್ವರಿ ಟಿ.ಆರ್., ಶ್ರೀಶಕಿರಣ್ ಪ್ರಭು, ತ್ರಿವೇಣಿ ಬೆಂಗಳೂರು, ಗಗನ ಶಿವಮೊಗ್ಗ, ಆರ್.ವಿ. ಮೂರ್ತಿ, ರೇವತಿ ಜೋಶಿ, ವಿ.ವಿಜಯೇಂದ್ರ ರಾವ್, ಸುಬ್ರಹ್ಮಣ್ಯ ಎಸ್., ವೀರೇಶ ವಾಲಿ, ಕಂಪಲಾಪುರ ಸುರೇಶ್, ಬೊ.ನಾ. ಕೃಷ್ಣಮೂರ್ತಿ, ಕೆ.ಎ. ಭಟ್, ಸೌಭಾಗ್ಯ ಸುಬ್ರಹ್ಮಣ್ಯ, ಡಾ. ಎನ್.ಎಂ. ತುಳಪುಳೆ, ಕೆ.ವಿ. ಪದ್ಮಾವತಿ ಐಯರ್, ಜಿ.ಕೆ. ಲಕ್ಷ್ಮೀನರಸಿಂಹಯ್ಯ, ಮನೋನ್ಮಣಿ ಕೆ.ವಿ., ಅನಿಲಕುಮಾರ್ ಎಂ.ಕೆ., ವಿಜಯಲಕ್ಷ್ಮಿ ಎಸ್., ಗುರುದತ್ತ ಎನ್. ಮುಂತಾದವರು. ಸಂಸ್ಕೃತ/ ಆಯುರ್ವೇದದಿಂದಲೇ ಬಂದ ಇನ್ನೊಂದು ಪದ ‘ಕ್ವಾಥ’ಕ್ಕೂ ಡಿಕಾಕ್ಷನ್‌ನದೇ ಅರ್ಥ. ಸೂಚಿಸಿದವರು ಶೋಭಾ ಪಿ. ಭಟ್ಟ ಮತ್ತು ಭಾರತಿ ಆರ್. ಭಟ್. ಕ್ವಥನ ಎಂದರೆ ಕುದಿಸುವ, ಬೇಯಿಸುವ ಪ್ರಕ್ರಿಯೆ. ಕ್ವಥಿತ ಅಥವಾ ಕ್ವಾಥ ಕುದಿಸಲ್ಪಟ್ಟದ್ದು. ಹಾಗೆಯೇ ‘ಅರ್ಕ’ (ಎನ್.ಆರ್. ರಮೇಶ್ ಮತ್ತು ವಿಜಯಕಲಾ ಬೆಂಗಳೂರು) ಸಹ ಕಷಾಯ ಎಂಬರ್ಥದ್ದೇ ಆದ್ದರಿಂದ ಹೊಂದುತ್ತದೆ.

ಪ್ರಾದೇಶಿಕವಾಗಿ ಬಳಕೆಯಲ್ಲಿರುವ, ಮುಖ್ಯವಾಗಿ ಕರ್ನಾಟಕದ ಕರಾವಳಿಯಲ್ಲಿ ಚಿರಪರಿಚಿತ ‘ಕಣ್ಣ’ - ಇದು ಕಾಫಿ ಮತ್ತು ಚಹ ಎರಡಕ್ಕೂ ಅನ್ವಯವಾಗುವುದರಿಂದ ಡಿಕಾಕ್ಷನ್‌ಗೆ ಸೂಕ್ತಸಂವಾದಿ ಪದ. ಸುರೇಂದ್ರ ಪೈ, ಜ್ಯೋತಿ ಮಹಾದೇವ್, ಸುದರ್ಶನ ಭಟ್ಟ, ನಾರಾಯಣ ಟಿ. ಹೆಗಡೆ, ಗಂಗಾ ಹೆಗಡೆ, ಪ್ರಭಾಕರ ಅಡಿಗ, ಮಮತಾ ಕುಂದಾಪುರ ಮುಂತಾದವರೆಲ್ಲರ ಆಯ್ಕೆ ‘ಕಣ್ಣ’. ಕೃಷ್ಣನನ್ನು ಮುದ್ದಾಗಿ ‘ಕಣ್ಣ’ ಎಂದು ಕರೆಯುವುದಿದೆಯಷ್ಟೆ. ಕೃಷ್ಣವರ್ಣದ ದ್ರಾವಣ ‘ಕಣ್ಣ’ ಎನಿಸುವುದು ಸಹಜವೇ. ಈಗ ಹಲವರು ಆರೋಗ್ಯದೃಷ್ಟಿಯಿಂದ ಕಣ್ಣ ಚಾ/ಕಾಫಿ ಒಪ್ಪಿಕೊಂಡಿರುವುದಾದರೂ ಹಿಂದೆಲ್ಲ ಬಡತನದಿಂದಾಗಿ ಹಾಲು-ಸಕ್ಕರೆಗಳಿಲ್ಲದ ಕಣ್ಣ ಚಾ/ಕಾಫಿ ಅನಿವಾರ್ಯವಾಗಿದ್ದದ್ದೂ ಹೌದು. ‘ಕರೋನಾ ಬರದಂತೆ ತಡೆಯಲು ಇಂದೇ ಸಂಜೆಯೊಳಗೆ ಚಾ ಕಣ್ಣ ಮಾಡಿ ಅದಕ್ಕೆ ಸ್ವಲ್ಪ ಬೆಲ್ಲ, ಅರಸಿನ ಹಾಕಿ ಕುಡಿಯಬೇಕು!’ ಅಂತೊಂದು ವದಂತಿ ಕೋವಿಡ್ ಕಾಲದಲ್ಲಿ ಕರಾವಳಿಯಲ್ಲಿ ಹರಡಿ ಸುದ್ದಿಯಾಗಿತ್ತು. ಇನ್ನೊಂದು ಪ್ರಾದೇಶಿಕ ಪದ ಕಾಣಿಸಿಕೊಂಡಿರುವುದು ‘ಕಾಢೆ’. ಇದು ಬಹುಶಃ ಮರಾಠಿಯ ಪ್ರಭಾವವುಳ್ಳದ್ದು. ಸೂಚಿಸಿದವರು- ಜಿ.ಎಚ್. ಸಂಕಪ್ಪ, ಸಿದ್ದನಗೌಡ ಮುದಿಗೌಡ್ರ, ಸಂಜೀವ ಮತ್ತಿಕೊಪ್ಪ, ನಿತ್ಯಾನಂದ ಬ್ರಹ್ಮಾವರ, یو.ಎನ್. ಸಂಗನಾಳಮಠ, ಉಮಾ ಪ್ರಭು ಮತ್ತಿತರರು. ನಾಮಪದವಾಗಿ ‘ಕಟ್ಟು’ ಪದಕ್ಕೆ ‘ಬೇಳೆ ಕಾಳುಗಳನ್ನು ಕುದಿಸಿ ತೆಗೆದ ನೀರು’ ಎಂಬರ್ಥವಿರುವುದರಿಂದ ಅದೂ ಡಿಕಾಕ್ಷನ್‌ಗೆ ಸಮವೇ. ಸೂಚಿಸಿದವರು: ಡಾ. ರಂಗನಾಥ ಕಟ್ಟಿ, ಶಂಭು ಇರಾಣಿ, ಗೋಪಾಲ ಜೋಶಿ, ಗೋಪಾಲ ಹರೆಗೊಪ್ಪ, ಷಡಕ್ಷರಮುನಿ ಸ್ವಾಮೀಜಿ, ವಿನೋದ ಅಣ್ಣಿಗೇರಿ, ಅಂಜಲಿ ಬರ್ವೆ, ಸೀತಾ ವ್ಯಾಸಮುದ್ರಿ, ನಾಗೇಶ ಫಾಟಕ್ ಮುಂತಾದವರು.

ಕಳೆದ ಸಲ ಕೇಳಿದ್ದ ಎರಡನೆಯ ಪದ jogging. ಇಂಗ್ಲಿಷ್‌ನಲ್ಲಿ ಐದಾರು ಶತಮಾನಗಳಿಂದೀಚೆಗೆ ಬಳಕೆಯಲ್ಲಿರುವ ಪದ. ಆದರೂ ಶಾರೀರಿಕ ವ್ಯಾಯಾಮಕ್ಕೆಂದು ಓಡುವುದನ್ನು jogging ಎನ್ನತೊಡಗಿದ್ದು 1948ರಿಂದೀಚೆಗಷ್ಟೇ! ಅದಕ್ಕಿಂತ ಹಿಂದೆ ಕುಲುಕಾಟ, ಮೃದುವಾಗಿ ತಟ್ಟಿ ಅಥವಾ ದೂಡಿ ಚಲನೆ ನೀಡುವುದು, ಕುಲುಕುತ್ತ ನಡೆಸುವುದು ಅಥವಾ ಸವಾರಿ ಮಾಡುವುದು ಮುಂತಾದ ಅರ್ಥಗಳಲ್ಲಿ ಬಳಕೆಯಿದ್ದದ್ದು. ಮುಖ್ಯವಾಗಿ ಕುದುರೆಗಳ ಪಾಲನೆ-ಪೋಷಣೆ ಮತ್ತು ಕುದುರೆ ಸವಾರಿಗೆ ಸಂಬಂಧಿಸಿದಂತೆ ಮಾತ್ರ ಬಳಕೆಯಾಗುತ್ತಿತ್ತು. ತೂಕ ಇಳಿಸಿಕೊಳ್ಳಲು, ಹೃದಯ ಮತ್ತು ಮೂಳೆಗಳನ್ನು ಬಲಪಡಿಸಲು ಅತ್ಯಂತ ಪರಿಣಾಮಕಾರಿ ದೈಹಿಕ ವ್ಯಾಯಾಮ ಅಂತೆಲ್ಲ ಇತ್ತೀಚಿನ ಬೆಳವಣಿಗೆ. ಅದಕ್ಕೆ ವೈದ್ಯರಿಂದ, ಬೊಜ್ಜು ಕರಗಿಸುವ ತಜ್ಞರಿಂದ ಶಿಫಾರಸೂ ಸೇರುತ್ತದೆ. ಒಟ್ಟಿನಲ್ಲಿ ಈಗ ಜಾಗಿಂಗ್ ಒಂದು ಜೀವನಶೈಲಿಯೇ ಆಗಿಬಿಟ್ಟಿದೆ. ಉದ್ಯಾನದವರೆಗೆ ವಾಹನದಲ್ಲಿ ಹೋಗುವುದು, ಅಲ್ಲಿ ಜಾಗಿಂಗ್ ಮಾಡುವುದು, ಹಿಂದಿರುಗುವಾಗ ಎಂಟಿಆರ್‌ನಲ್ಲೋ ಮತ್ಯಾವುದೋ ದರ್ಶಿನಿಯಲ್ಲೋ ಪೊಗದಸ್ತಾಗಿ ಇಡ್ಲಿ-ವಡೆ-ದೋಸೆ-ಪೂರಿ ಜಮಾಯಿಸಿಯೇ ಬರುವುದು ಕೂಡ ಹಲವರ ಜೀವನಶೈಲಿಯೇ. jogging ಪದದ ಪ್ರಾಚೀನ ಅರ್ಥವನ್ನಷ್ಟೇ ಪರಿಗಣಿಸಿದರೆ ‘ಕುಲುಕೋಟ’ (ಪ್ರಭುಪ್ರಸಾದ್ ನಡುತೋಟ, ಶ್ರೀನಾಥ್ ಕೆ.ಟಿ., ನಾರಾಯಣ ಬೈಪಡಿತ್ತಾಯ, ವಸಂತಕುಮಾರ್ ಕಲ್ಯಾಣಿ) ಮತ್ತು ‘ಕುಲುಕುನಡೆ’ (ಪಿ.ಜೆ. ರಾಘವೇಂದ್ರ) ಸೂಕ್ತವೆನಿಸುತ್ತವೆ. ಈಗಿನ ದೈಹಿಕ ವ್ಯಾಯಾಮದ ಸಂದರ್ಭಕ್ಕಾದರೆ, ಜಾಗಿಂಗ್ ಎನ್ನುವುದು ವೇಗದ ನಡಿಗೆಯೂ ಹೌದು ಮೆಲ್ಲನೆಯ ಓಟವೂ ಹೌದು. ಆದ್ದರಿಂದ- ‘ದಾಪುನಡಿಗೆ’ (ಮಹಾಂತೇಶ ಗೋಲಪ್ಪನವರ), ‘ಬಿರುನಡಿಗೆ’ (ಡಾ.ದಯಾನಂದ ಭಟ್ಟ), ‘ಓಡುನಡಿಗೆ’ (ಅನಿತಾ ಕಿಶೋರ್, ಅಂಜನಾ ಗುರುರಾಜ್, ಎಂ.ಕೆ. ರಮೇಶ್, ಜಯಲಕ್ಷ್ಮಿ ಅಡಿಗ), ‘ಓಡುನಡೆ’ (ಅನ್ನಪೂರ್ಣ ಹೇಮಚಂದ್ರ, ಸಂತೋಷರಾವ್ ಕಡಬ), ‘ಮೆಲುಓಟ’ (ಚಂದನಾ ಸೂರಜ್, ಯು. ಪರಮೇಶ್ವರ ಭಟ್ಟ, ಶ್ರೀರಾಮ ಡೋಂಗ್ರೆ, ಅನಂತಕೃಷ್ಣ ಶಿವಮೊಗ್ಗ, ಗೀತಾ ಗುರುಸ್ವಾಮಿ, ವೀಣಾ ಕರುಣಾಕರ್, ಉಮೇಶ ಪ್ರಭು, ನೇತ್ರಾ ವಿನೋದ್, ಪ್ರಸನ್ನ ಶೆಂಡ್ಯೆ, ಉಲ್ಹಾಸ್ ಕುಲ್ಕರ್ಣಿ ಮುಂತಾದವರು) ಕೂಡ ಅರ್ಥಬದ್ಧವಾಗಿವೆ.

ಕೊನೆಯದಾಗಿ silhouette. ಇದೊಂದು ಸ್ವಾರಸ್ಯಕರ ಪದ. ಕ್ರಿ.ಶ. 18ನೆಯ ಶತಮಾನದಲ್ಲಿ ಬಾಳಿದ್ದ ಫ್ರೆಂಚ್ ರಾಜಕಾರಣಿ ಎತಿಯೆನ್ ದ್ಹ ಸಿಲುಎತ್ ಎಂಬುವವನ ಹೆಸರಿಂದ ಬಂದದ್ದು. ಇಂಗ್ಲಿಷ್ ಸ್ಪೆಲ್ಲಿಂಗ್ ಗಮನಿಸಿದರೆ ‘ಸಿಲ್ಹೊಟ್ಟೆ’ ಎಂದು ಉಚ್ಚರಿಸುವ ಸಾಧ್ಯತೆಯಿದೆಯಾದರೂ ಫ್ರೆಂಚ್ ಮೂಲದಲ್ಲಿ ‘ಸಿಲುಎತ್’ ಸರಿಯಾದ ಉಚ್ಚಾರ ಎಂದು ತಿಳಿಸಿದ್ದಾರೆ ಕನಾಕಪ ಅಂಕಣದ ಓದುಗ, ಫ್ರಾನ್ಸ್‌ನಲ್ಲಿರುವ ಕನ್ನಡಿಗ ಕಾರ್ತಿಕ ಶರ್ಮ. ಎತಿಯೆನ್ ಸಿಲುಎತ್‌ನ ಕಥೆಯೇನೆಂದರೆ ಆತ 1759ರಲ್ಲಿ ಫ್ರಾನ್ಸ್‌ನ ಹಣಕಾಸು ಸಚಿವನಾಗಿದ್ದವನು. ಆತನ ದುರದೃಷ್ಟವೋ ಎಂಬಂತೆ ಆಗಲೇ ಏಳು ವರ್ಷಗಳ ಯುದ್ಧವೊಂದರಲ್ಲಿ ಫ್ರಾನ್ಸ್‌ನ ಆರ್ಥಿಕತೆ ತತ್ತರಿಸಿತು. ಮಿತವ್ಯಯ ಮಾಡುವಂತೆ ಪ್ರಜೆಗಳನ್ನು ಕೋರಬೇಕಾಯಿತು. ತಮ್ಮ ದುಬಾರಿ ವರ್ಣಚಿತ್ರಗಳನ್ನು ಕೊಳ್ಳುವ ಗಿರಾಕಿಗಳಿಲ್ಲವೆಂದು ಹತಾಶರಾದ ಕೆಲವು ಚಿತ್ರಕಲಾವಿದರು ಬರೀ ಕಪ್ಪುಬಣ್ಣದ, ನೆರಳಿನಂತೆ ಕಾಣುವ ಸರಳ ಚಿತ್ರಗಳನ್ನು ರಚಿಸಿದರು. ಅವುಗಳನ್ನು ಹಣಕಾಸು ಸಚಿವನ ಹೆಸರಿಂದಲೇ, ಅಂದರೆ ಒಂಥರ ಕುಹಕದಿಂದಲೇ ‘ಸಿಲುಎತ್’ ಎಂದು ಕರೆದರು. ಆದರೆ ಆಮೇಲೆ ಅದೊಂದು ಜನಪ್ರಿಯ, ಸರಳ ಮತ್ತು ಉಪಯುಕ್ತ ಚಿತ್ರರಚನೆ ಶೈಲಿಯೇ ಆಗಿಬಿಟ್ಟಿತು. ಕಾಮಿಕ್ಸ್ ಸರಣಿಗಳಲ್ಲಿ ಪಾತ್ರಗಳನ್ನು ದೂರದಿಂದ ನೋಡಿದಾಗ ಎಂಬ ಭಾವನೆ ಬರುವಂತೆ ಸಿಲುಎತ್ ಶೈಲಿಯಲ್ಲಿ ಚಿತ್ರಿಸುವುದು ವಾಡಿಕೆಯಾಯ್ತು. ಲಯನ್ ಕಿಂಗ್‌ನಲ್ಲಿ ತಂದೆಸಿಂಹ ಮುಫಾಸಾ ಮರಿಸಿಂಹ ಸಿಂಬಾನನ್ನು ಹಿಡಿದುಕೊಂಡು ಬೆಟ್ಟದ ತುದಿಯಲ್ಲಿ ನಿಂತ ದೃಶ್ಯದ ಸಿಲುಎತ್ ಸುಪ್ರಸಿದ್ಧ. ನಮ್ಮ ನಾಡಿನ ತೊಗಲು ಬೊಂಬೆಯಾಟ ಕಲಾಪ್ರದರ್ಶನವು ಒಂದು ರೀತಿಯಲ್ಲಿ ಸಿಲುಎತ್ ಎನ್ನಲಡ್ಡಿಯಿಲ್ಲ.

ಕ್ಸೆರಾಕ್ಸ್, ನಿಕೊಟಿನ್, ಸೆಲ್ಸಿಯಸ್, ಆಲ್ಝೈಮರ್ ಮುಂತಾಗಿ ವ್ಯಕ್ತಿಗಳ ಹೆಸರು ಅಥವಾ ಕುಲನಾಮಗಳೇ ಇಂಗ್ಲಿಷ್ ಭಾಷೆಯ ಪದವಾದಾಗ ಅದನ್ನು ಅನುವಾದಿಸುವುದು ಸಮಂಜಸವಲ್ಲವಾದರೂ ಸಿಲುಎತ್ ಅನ್ನು ಕನ್ನಡದಲ್ಲಿ ಹೇಳಬೇಕಿದ್ದರೆ ‘ನೆರಳುಚಿತ್ರ’ (ಎನ್. ಸುಬ್ರಾಯ ಭಟ್, ರಾಜೇಶ್ವರಿ ಶಿವಮೊಗ್ಗ, ಮಲ್ಲಿಕಾ ಭಟ್, ಜಿ. ನಾರಾಯಣ ರಾವ್, ಕುಸುಮಾ ಡಿ.ಎನ್., ನಳಿನಿ ಜಿ. ಭಟ್, ಮಂಜುನಾಥ ಡಿ.ಎಸ್., ರಶ್ಮಿ ರಾಜೇಂದ್ರ, ಸುಜಯ ಬಿ.ಜಿ., ಸಂಜೀವ ಜೋಶಿ, ಡಾ. ಸಂಗಮೇಶ ಸುರಭಿ ಮತ್ತಿತರರು), ‘ಛಾಯಾರೂಪ’ (ಕಾಡೇಶ್ ವಿ.ಬಿ., ರಂಗನಾಥ ಟಿ.ಕೆ., ಪ್ರೇಮಾ ಮೊಣ್ಣಪ್ಪ, ಗೋಗಿನಾಥ್ ಭರಮಸಾಗರ, ನರೇಂದ್ರನಾಥ ಎಚ್.ಎಂ., ಸುಜಾತಾ ಕುರ್ಪಾಡ್, ಮಿಸ್ಕಿನ್ ಕುಟುಂಬಸ್ಥರು, ಗೋಪಾಲಕೃಷ್ಣ ಹೆಮ್ಮಿಗೆ ಮುಂತಾದವರು), ‘ಛಾಯಾಕೃತಿ’ (ಯಮನಪ್ಪ ಕೊಟ್ನಿಕಲ್, ಶಾಂತಲಾ ರಾಜಗೋಪಾಲ್, ಬಿ.ಡಿ. ರವೀಂದ್ರ ಮತ್ತಿತರರು) ಸರಿಯೆನಿಸಬಹುದು. ಅಥವಾ, ತಮಾಷೆಗಾಗಿ ಆಯಾ ಪ್ರಾಂತ್ಯಗಳ ಪ್ರಚಲಿತ ಹಣಕಾಸು ಸಚಿವರ ಹೆಸರನ್ನೇ ಬಳಸಿ ಹೇಳುವುದಾದರೆ ಕರ್ನಾಟಕದ ಮಟ್ಟಿಗೆ ‘ಸಿದ್ಧಚಿತ್ರ’ ಅಂತಲೂ, ಭಾರತವ್ಯಾಪ್ತಿಯಲ್ಲಿ ‘ನಿರ್ಮಲಬಿಂಬ’ ಅಂತಲೂ ಹೇಳಬಹುದು! ಗಿರೀಶ್ ಕೆ.ಎಸ್. ಅವರ ಈ ತರ್ಕ ಚೆನ್ನಾಗಿದೆ.

catering: ಸಮಾರಂಭಗಳಿಗಷ್ಟೇ ಅಲ್ಲ, ಕೆಲವರಲ್ಲಿ ನಿತ್ಯಾವಳಿಗೂ ಹಬ್ಬಿದೆ ಊಟ-ಉಪಾಹಾರ ತಯಾರಿಯ ಹೊರಗುತ್ತಿಗೆ.

pro rata: ಪರೋಟಾ ಎಂದು ಓದಿಕೊಳ್ಳಬೇಡಿ! ಪ್ರಮಾಣಕ್ಕೆ ಅನುಗುಣವಾಗಿ ಪಾಲು ಮಾಡಿಕೊಳ್ಳುವುದಕ್ಕೊಂದು ಕನ್ನಡ ಪದ ಕೊಡಿ.

ಓದುಗರು ಪ್ರತಿಯೊಂದು ಆಂಗ್ಲ ಪದಕ್ಕೆ ತಲಾ ಒಂದರಂತೆ ಕನ್ನಡ ಪದ ತಿಳಿಸಬೇಕು. ತಮ್ಮ ಹೆಸರು ಮತ್ತು ಊರಿನ ಹೆಸರನ್ನೂ ಕನ್ನಡದಲ್ಲಿ ಬರೆಯಬೇಕು. ಪದಗಳನ್ನು ಕಳುಹಿಸಲಿಕ್ಕೆ ಗಡುವು: ಮುಂದಿನ ಶನಿವಾರ ಸಂಜೆ 6 ಗಂಟೆಯೊಳಗೆ. ವಾಟ್ಸ್‌ಆಪ್ ಸಂಖ್ಯೆ: +12404010945