ನಾಯಕ ಬೆಂಗಳೂರಿಗೆ ಹೋದರೆ, ಆದನ ತಮ್ಮ ಶ್ರೀಪತಿ ಹೆಂಡತಿಯ ಒತ್ತಾಸೆಗೆ ಮನೆಬಿಟ್ಟು ಪಟ್ಟಣ ಸೇರುತ್ತಾನೆ. ವೃದ್ಧ ತಂದೆತಾಯಿಗೆ ಆಸರೆಯಾಗುವವನು ಗೋವಿಂದನೆನ್ನುವ ಯುವಕ. ಊರಿನಲ್ಲಿರುವ ಹವ್ಯಕ ಮಾಣಿಗಳಿಗೆ ಹೆಣ್ಣು ಕೊಡುವವರಿಲ್ಲ. ನಂಬಿಕೆಯ ಮಾಣಿ ಮದುವೆಯ ಹುಚ್ಚಿನಲ್ಲಿ ಯಜಮಾನನ ಬ್ಯಾಂಕ್ ಖಾತೆಯಿಂದ 2 ಲಕ್ಷ ರೂ. ಎಗರಿಸಿ ದಲ್ಲಾಳಿಗೆ ಕೊಟ್ಟು ಮೋಸ ಹೋಗುವ ಮತ್ತು ಇದರ ಪರಿಹಾರಕ್ಕಾಗಿ ತಾನು ಇಷ್ಟ ಪಟ್ಟು ಖರೀದಿಸಿದ ಬೈಕನ್ನು ಮಾರಿ ಸಿಕ್ಕಷ್ಟು ಹಣವನ್ನು ತೆಗೆದುಕೊಂಡು ಹೆಗಡೆಯವರ ಮನೆಗೆ ಒಪ್ಪಿಸುವ ಭಾಗ; ಕತೆಯುದ್ದಕ್ಕೂ ಹಳ್ಳಿಯ ಬದುಕಿನ ತುಮುಲ, ಹಿರಿಯರ ಅಸಹಾಯಕತೆ, ನಗರವನ್ನು ಬಿಟ್ಟಿರಲಾರದ, ಹಳ್ಳಿಗೆ ಹೋಗಲಾರದ ಕಥಾನಾಯಕನ ವಿವಶತೆ ಮನಮುಟ್ಟುವಂತಿದೆ.
