ಲೋಕದೊಳಗೆ ಪರಸ್ಪರ ಬೆರೆತು ಬಾಳುವುದನ್ನು ಎಲ್ಲರೂ ಬಯಸುತ್ತಾರೆ. ಯಾರು ಕೂಡಾ ಒಂಟಿಯಾಗಿರಲು ಬಯಸುವುದಿಲ್ಲ. ಹಾಗಾಗಿಯೇ ಕುಟುಂಬ, ಸಂಘ-ಸಂಸ್ಥೆಗಳು. ಇಂಥ ಸಂದರ್ಭದಲ್ಲಿ ಸ್ವಕೇಂದ್ರಿತವಾಗಿ ಯೋಚಿಸುವುದು, ಪ್ರಾಮುಖ್ಯ ತೆಯ ಚಡಪಡಿಕೆ, ಅಭಿಪ್ರಾಯ ವ್ಯತ್ಯಾಸ, ಪ್ರತಿಕೂಲ ಸಂದರ್ಭ ಗಳು ಸರ್ವೆಸಾಮಾನ್ಯ. ಇವುಗಳಿಂದಾಗಿ ವ್ಯಕ್ತಿಯು ಜೀವನ ಶಿಕ್ಷಣವನ್ನು ಪಡೆಯುತ್ತಾನೆ. ವ್ಯಕ್ತಿಯಲ್ಲಿರುವ ದೌರ್ಬಲ್ಯಗಳು ಕಳಚಿಹೋಗಿ ಹದವಾಗುತ್ತಾನೆ. ವ್ಯಕ್ತಿಯಲ್ಲಿ ವಿವಿಧ ಗುಣ-ಸ್ವಭಾವ ಗಳಿರುತ್ತವೆ. ಸಾತ್ತಿ್ವಕ, ರಾಜಸ ಮತ್ತು ತಮೋ ಗುಣಗಳಿಂದ ಪ್ರೇರಿತನಾದ, ಭಾವಾವೇಶಕ್ಕೆ ಒಳಗಾಗುವ ವ್ಯಕ್ತಿಯ ಜೀವನ ದೃಷ್ಟಿಯೂ ಸದಾ ಬದಲಾಗುತ್ತಿರುತ್ತದೆ. ಸನ್ನಿವೇಶಕ್ಕೆ ಅನುಗುಣ ವಾಗಿ ವರ್ತನೆಯು ವ್ಯತ್ಯಾಸವಾಗುತ್ತದೆ. ಎಷ್ಟೋ ಸಲ ಸ್ವಯಂ ತನಗೆ ತಾನೆ ಪ್ರಶ್ನೆಯಾಗುವುದು, ತಾನು ಹೀಗೇಕೆ ಮಾಡಿದೆ ಎಂದು ವಿಷಾದಿಸುವುದೂ ಇದೆ. ಹಾಗಾಗಿ ಪ್ರತಿಕೂಲ ಸಂದರ್ಭಗಳು ವ್ಯಕ್ತಿಯನ್ನು ಸ್ಪಷ್ಟವಾಗಿ ಪರಿಚಯಿಸುತ್ತದೆ.
