ಕೋವಿಡ್ 19 ಸೋಂಕಿನ ಸಂಕಷ್ಟದ ಕಾರಣ ಕಳೆದ ಎರಡು ವರ್ಷಗಳ ಅವಧಿ ಯುವ ಸಮೂಹದ ಪಾಲಿಗೆ ಅತ್ಯಂತ ಸಂಕಷ್ಟಮಯವಾದುದಾಗಿತ್ತು. ಅನೇಕರು ಉದ್ಯೋಗ ಕಳೆದುಕೊಂಡಿದ್ದರು, ಆರ್ಥಿಕ ಸಂಕಷ್ಟ ಎದುರಿಸಿದ್ದರು ಮತ್ತು ಎದುರಿಸುತ್ತಿದ್ದಾರೆ. ಕೋವಿಡ್ ಸಂಕಷ್ಟದ ಈಗ ಸ್ವಲ್ಪ ಮಟ್ಟಿಗೆ ಕಡಿಮೆಯಾದಂತೆ ಭಾಸವಾಗುತ್ತಿದೆ. ಹೀಗಾಗಿ, ಒಂದು ಸಲ ನಿಂತೇ ಹೋಗಿದ್ದ ಬಹುತೇಕ ವಾಣಿಜ್ಯ ಚಟುವಟಿಕೆಗಳು ಮತ್ತೆ ನಿಧಾನವಾಗಿ ಗರಿಗೆದರಿವೆ. ಕಳೆದ ಮೇ ತಿಂಗಳಿಂದೀಚೆಗೆ ಹಂತ ಹಂತವಾಗಿ ಪ್ರಗತಿ ಪಥದಲ್ಲಿ ಮುಂದುವರಿಯತೊಡಗಿವೆ. ಕೋವಿಡ್ ಬಂದ ನಂತರದಲ್ಲಿ ಕೈಗಾರಿಕೆ, ವಹಿವಾಟುಗಳು ಬಹುತೇಕ ಡಿಜಿಟಲೀಕರಣಗೊಂಡಿವೆ. ಉದ್ಯೋಗ ನೇಮಕಕ್ಕೆ ಸಂಬಂಧಿಸಿದ ಹಲವು ವೇದಿಕೆಗಳು ಪ್ರಕಟಿಸಿರುವ ವರದಿ ಪ್ರಕಾರ ಕಳೆದ ವರ್ಷಕ್ಕೆ ಹೋಲಿಸಿದರೆ ಸಾಫ್ಟ್ವೇರ್, ಹಾರ್ಡ್ ವೇರ್, ಟೆಲಿಕಾಂ ಮುಂತಾದ ಕ್ಷೇತ್ರಗಳಲ್ಲಿ ಶೇಕಡ 35ರಷ್ಟು ಹೆಚ್ಚು ಉದ್ಯೋಗ ಸೃಷ್ಟಿಯಾಗಿವೆ. ಅಲ್ಲದೆ ಈ ವಲಯದಲ್ಲಿ ಉದ್ಯೋಗ ಸೃಜನೆ ನಿರಂತರವಾಗಿ ಸಾಗಿದೆ. ಜೂನ್ ತಿಂಗಳಿಗಿಂತ ಜುಲೈನಲ್ಲಿ ಶೇಕಡ 11ರ ಪ್ರಮಾಣದಲ್ಲಿ ಹೆಚ್ಚು ಉದ್ಯೋಗ ಸೃಷ್ಟಿಯಾಗಿದೆ. ಕಳೆದ ತಿಂಗಳು ಪ್ರವಾಸೋದ್ಯಮ ವಲಯದಲ್ಲಿ ಶೇಕಡ 35 ಹೆಚ್ಚು ಉದ್ಯೋಗ ಸೃಷ್ಟಿಯಾಗಿದ್ದು, ಯುವಜನರ ನೆರವಿಗೆ ಬಂದಿದೆ. ಈ ವಲಯದಲ್ಲಿ ಉದ್ಯೋಗ ಸೃಜನೆ ಪ್ರಮಾಣ ಮೇ ತಿಂಗಳಿಗೆ ಹೋಲಿಸಿದರೆ ಜೂನ್ನಲ್ಲಿ ಶೇಕಡ 3 ಬೆಳವಣಿಗೆ ಕಂಡಿತ್ತು. ಹಾಗೆಂದು ಎಲ್ಲ ವಲಯಗಳಲ್ಲೂ ಉದ್ಯೋಗ ಸೃಜನೆಯಾಗುತ್ತಿದೆ ಎಂದರ್ಥವಲ್ಲ. ಜುಲೈ ತಿಂಗಳಲ್ಲಿ ಫಾರ್ವ, ಬಯೋಟೆಕ್, ಕ್ಲಿನಿಕಲ್ ರಿಸರ್ಚ್ ಮುಂತಾದ ಕ್ಷೇತ್ರಗಳಲ್ಲಿ ಉದ್ಯೋಗ ಸೃಜನೆ ಪ್ರಮಾಣ ಶೇಕಡ 5, ಮಾಧ್ಯಮ, ಡಾಟ್ಕಾಮ್ ಮನರಂಜನಾ ವಲಯದಲ್ಲಿ ಶೇಕಡ 15ರ ಪ್ರಮಾಣದಲ್ಲಿ ಇಳಿಕೆಯಾಗಿದೆ. ಶಿಕ್ಷಣ ಕ್ಷೇತ್ರದಲ್ಲಿ ಶೇಕಡ 24ರಷ್ಟು ನೇಮಕಾತಿ ಇಳಿಕೆಯಾಗಿದೆ.
