ರಾಜ್ಯದಲ್ಲಿ ವ್ಯಾಕ್ಸಿನ್ ಸಂಗ್ರಹ ಇಲ್ಲದೆ ಲಸಿಕಾ ಅಭಿಯಾನ ಆರಂಭಿಸುವ ಅಗತ್ಯ ಏನಿತ್ತು? ಗುಜರಾತ್, ಉತ್ತರ ಪ್ರದೇಶ ರಾಜ್ಯಗಳಿಗೆ ಹೋಲಿಸಿದರೆ ಕರ್ನಾಟಕಕ್ಕೆ ಬರಬೇಕಾದ ಅಗತ್ಯ ಲಸಿಕೆ ಬಂದಿಲ್ಲ. ಇದು ಕೇಂದ್ರ ಸರ್ಕಾರದ ತಾರತಮ್ಯವೋ ಅಥವಾ ರಾಜ್ಯ ಸರ್ಕಾರದ ನಿರ್ಲಕ್ಷ್ಯವೋ ಅರ್ಥವಾಗದ ಯಕ್ಷಪ್ರಶ್ನೆ. ಮೂರನೇ ಅಲೆ ಆರಂಭವಾಗುವ ಮುನ್ನವೇ ರಾಜ್ಯ ಸರ್ಕಾರ ಮುತುವರ್ಜಿ ವಹಿಸಿ ರಾಜ್ಯದ ಜನತೆಗೆ ಸಂಪೂರ್ಣ ಲಸಿಕೆ ನೀಡುವುದು ತುಂಬ ಅನಿವಾರ್ಯವಾಗಿದೆ. ನೋಂದಣಿ ಮಾಡಿದವರಿಗೂ ಲಸಿಕೆಯ ಬರ ಉಂಟಾದ ಇಂಥ ಸಂದರ್ಭದಲ್ಲಿ ನೋಂದಣಿ ಮಾಡದೇ ಇರುವ ಅನಕ್ಷರಸ್ಥ, ಕೂಲಿಕಾರರಿಗೆ ಲಸಿಕೆ ಇನ್ನೆಂದು ಸಿಗಬಹುದು? ನಿಗದಿತ ಅವಧಿಗೆ ಎರಡು ಡೋಸ್ ಕರೊನಾ ಲಸಿಕೆ ಪಡೆದವರಿಗೆ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ, ಅಷ್ಟೇ ಅಲ್ಲ, ಕರೊನಾ ವೈರಸ್ ಎದುರಿಸುವಲ್ಲಿ ‘ವ್ಯಾಕ್ಸಿನ್’ ‘ರಾಮಬಾಣ’ ಎಂಬುದು ಈಗಾಗಲೇ ಹಲವು ದೇಶಗಳಲ್ಲಿ ಸಾಬೀತಾಗಿದೆ. ಹೀಗಾಗಿ ಸರ್ಕಾರ ತುರ್ತಾಗಿ ಜನರಿಗೆ ಮೊದಲು ವ್ಯಾಕ್ಸಿನ್ ನೀಡಲು ಮುಂದಾಗಬೇಕು ಹಾಗೂ ಲಸಿಕೆಗಾಗಿ ನೋಂದಣಿ ಕಡ್ಡಾಯಗೊಳಿಸದೆ ಎಲ್ಲರಿಗೂ ಮುಕ್ತವಾಗಿ ನೀಡಬೇಕು.
