ವಿಜಯವಾಣಿಯಲ್ಲಿ ಭಾನುವಾರ (ಏಪ್ರಿಲ್ 18) ‘ಸೆಲೆಬ್ರಿಟಿ ಕಾರ್ನರ್’ನಲ್ಲಿ ಪ್ರಕಟಗೊಂಡ ಡಾ.ಸಿ.ಎನ್ ಮಂಜುನಾಥ್ರವರ ‘ಜೀವನದಲ್ಲಿ ಯಶಸ್ವಿಯಾಗಲು ನಾಲ್ಕು ಸರಳ ಸೂತ್ರ’ ಲೇಖನ ವಿದ್ಯಾರ್ಥಿಗಳಿಗೆ ಮತ್ತು ಯುವಜನತೆಗೆ ಬದುಕು ಕಟ್ಟಿಕೊಳ್ಳಲು, ಸಾಧನೆಯ ಪಥದಲ್ಲಿ ಮೇಲೇರಲು ದಿಕ್ಸೂಚಕ ಸೂತ್ರದಂತಿದೆ. ಬದ್ಧತೆ, ಸಹಾನುಭೂತಿ, ನಿರಂತರತೆ ಮತ್ತು ಸಂವಹನ ಎಂಬ ನಾಲ್ಕು ಕೌಶಲಗಳನ್ನು ಸರಿಯಾಗಿ ಬಳಕೆ ಮಾಡಿಕೊಂಡು, ನಿಗದಿತ ಗುರಿಯನ್ನು ಒತ್ತಡರಹಿತವಾಗಿ ತಲುಪಲು ಪ್ರೇರಣಾಶಕ್ತಿಯಂತೆ ಲೇಖನ ಮೂಡಿಬಂದಿದೆ. ಕರೊನಾದ ಸಂದಿಗ್ಧತೆಯಲ್ಲಿ ಪರೀಕ್ಷೆಗಳೇ ಗೊಂದಲದ ಗೂಡಾಗಿರುವಾಗ ‘ವ್ಯಕ್ತಿಯ ಸಾಧನೆಗೆ ಅಂಕಗಳಷ್ಟೇ ಮಾನದಂಡವಲ್ಲ. ಕಡಿಮೆ ಅಂಕ ಗಳಿಸಿದರೂ ಜೀವನದಲ್ಲಿ ಶ್ರದ್ಧೆಯಿಂದ ಸಾಗಿದರೆ, ಉತ್ತಮ ಸಾಧನೆ ಮಾಡಬಹುದು’ ಎಂಬುದನ್ನು ವ್ಯಕ್ತಿತ್ವ ರೂಪಿಸುವ ಸಾಧನವನ್ನಾಗಿ ಸಾದರಪಡಿಸಿದ್ದಾರೆ. ಕೇವಲ ಅಂತರ್ಜಾಲಕ್ಕೆ ಮಾರುಹೋಗದೆ, ಪೆನ್-ಪೇಪರ್ನಿಂದ ಬರೆದು ಕಲಿತ ಜ್ಞಾನ ಆಳವಾದದ್ದು ಎಂಬ ಕಿವಿಮಾತನ್ನೂ ವಿದ್ಯಾರ್ಥಿಗಳು ಅರಿತುಕೊಳ್ಳಬೇಕಿದೆ. ದಶಮಾನೋತ್ಸವ ಸಂಭ್ರಮದಲ್ಲಿರುವ ‘ವಿಜಯವಾಣಿ’ ಇಂಥ ಉತ್ತಮ ವಿಚಾರಧಾರೆಗಳುಳ್ಳ ಲೇಖನಗಳನ್ನು ನಿರಂತರವಾಗಿ ಪ್ರಕಟಿಸುತ್ತಿರುವುದು ಶ್ಲಾಘನೀಯ.
