ಜನನಾಯಕರಿಗೂ ವಿದೇಶಿ ಏಜೆಂಟರಿಗೂ ಇರುವ ವ್ಯತ್ಯಾಸ

ಅದಕ್ಕೆ ಪ್ರತಿಭಟನೆಯಾಗಿ ಅವಾಮಿ ಲೀಗ್ ನಾಯಕರು ಮರುದಿನ ಅಂದರೆ ಮಾರ್ಚ್ 26ರ ಬೆಳಗ್ಗೆ ಬಾಂಗ್ಲಾದೇಶದ ಸ್ವಾತಂತ್ರ್ಯವನ್ನು ಘೊಷಿಸಿಬಿಟ್ಟರು. ಮುಂದಿನ ಒಂಬತ್ತು ತಿಂಗಳುಗಳಲ್ಲಿ ಪಾಕಿಸ್ತಾನಿ ಸೇನೆ ಕೊಂದದ್ದು ಸುಮಾರು ಮೂವತ್ತು ಲಕ್ಷ ಜನರನ್ನು. ಅದೊಂದು ಅಂದಾಜು ಅಷ್ಟೇ. ನಿಜವಾದ ಸಂಖ್ಯೆ ನಮಗೆಂದೂ ಸಿಗಲಾರದು. ಅಂತಿಮವಾಗಿ ಭಾರತ ಮಧ್ಯಪ್ರವೇಶಿಸಿ, ಡಿಸೆಂಬರ್ 3-16ರ ಯುದ್ಧದಲ್ಲಿ ಪಾಕಿಸ್ತಾನವನ್ನು ನಿರ್ಣಾಯಕವಾಗಿ ಸೋಲಿಸಿತು. ಪಾಕಿಸ್ತಾನಿ ಸೇನೆಯ ಲೆಫ್ಟಿನೆಂಟ್ ಜನರಲ್ ಎ.ಎ.ಕೆ. ನಿಯಾಜಿ ಡಿಸೆಂಬರ್ 16ರ ಸಂಜೆ 4.31ಕ್ಕೆ ಅಧಿಕೃತ ಶರಣಾಗತಿ ಪತ್ರಕ್ಕೆ ಸಹಿ ಹಾಕಿ ನಮ್ಮ ಲೆಫ್ಟಿನೆಂಟ್ ಜನರಲ್ ಜಗ್​ಜೀತ್ ಸಿಂಗ್ ಅರೋರಾ ಅವರಿಗೆ ನೀಡಿ 93,000 ಸೈನಿಕರೊಂದಿಗೆ ಶರಣಾದರು. ಸ್ವತಂತ್ರ ಬಾಂಗ್ಲಾದೇಶ ಅಸ್ತಿತ್ವಕ್ಕೆ ಬಂತು. ನಂತರ ಮಾರ್ಚ್ 26ನ್ನು ದೇಶದ ಸ್ವಾತಂತ್ರ್ಯ ದಿನವಾಗಿ ಸಂಭ್ರಮದಿಂದ ಪ್ರತಿ ವರ್ಷವೂ ಆಚರಿಸುವ ಸಂಪ್ರದಾಯ ಆರಂಭವಾಯಿತು.

2024ರವರೆಗೂ ಹಾಗೇ ನಡೆದುಕೊಂಡು ಬಂತು. 2025ರಲ್ಲಿ ಹಾಗಾಗಲಿಲ್ಲ. ಈ ವರ್ಷ ಆ ಸಂಪ್ರದಾಯ ಮತ್ತೆ ದೊಡ್ಡದಾಗಿ ಕಾಣಿಸಿಕೊಂಡಿದೆ. ಹಾಗಿದ್ದರೆ ಹಿಂದಿನ ವರ್ಷ ನಡೆದದ್ದಾದರೂ ಏನು? ಈ ಪ್ರಶ್ನೆಗೆ ತೀರಾ ಸರಳವಾಗಿ ಉತ್ತರಿಸಬೇಕಾದರೆ, 2025ರ ಮಾರ್ಚ್ 26ರಂದು ಬಾಂಗ್ಲಾದೇಶದಲ್ಲಿ ದೇಶದ ಜನತೆಯೇ ಆರಿಸಿದ, ಅವರದೇ ಪ್ರತಿನಿಧಿಯಾದ ರಾಷ್ಟ್ರನಾಯಕ ಇರಲಿಲ್ಲ! ಮಹಮದ್ ಯೂನುಸ್ ಎಂಬ ನೊಬೆಲ್ ಪಾರಿತೋಷಕ ಪುರಸ್ಕೃತ ಮಹಾ ಮೇಧಾವಿ ಅರ್ಥಶಾಸ್ತ್ರಜ್ಞ ಇದ್ದರಲ್ಲ, ದೊಡ್ಡದಾಗಿ ಸದ್ದನ್ನೂ ಮಾಡುತ್ತಿದ್ದರಲ್ಲ ಎಂದು ನೀವು ಕೇಳಬಹುದು. ಆಗ ನಾನು ಎಲ್ಲವನ್ನೂ ಬಿಡಿಸಿ ನಿಮಗೆ ವಿವರವಾಗಿ ಹೇಳಬೇಕಾಗುತ್ತದೆ ನೋಡಿ!.

2024ರ ಜನವರಿಯಲ್ಲಿ ನಡೆದ ಸಂಸದೀಯ ಚುನಾವಣೆಗಳಲ್ಲಿ ಶೇಖ್ ಹಸೀನಾ ವಾಜಿದ್​ರ ಅವಾಮಿ ಲೀಗ್ ಅನ್ನು ಜನತೆ ಸತತ ನಾಲ್ಕನೆಯ ಬಾರಿಗೆ ಅಧಿಕಾರಕ್ಕೆ ತಂದರು. ಆ ಚುನಾವಣೆಗಳು ನ್ಯಾಯಸಮ್ಮತವಾಗಿಯೇ ನಡೆದವು, ಆಡಳಿತ ಪಕ್ಷದಿಂದ ಮೋಸವೇನೂ ನಡೆದಿಲ್ಲ ಎಂದು ಅಮೆರಿಕವೂ ಸೇರಿದಂತೆ ಹಲವು ದೇಶಗಳ ಚುನಾವಣಾ ವೀಕ್ಷಕರು ಅಭಿಪ್ರಾಯಪಟ್ಟರು. ಆದರೆ ಮುಂದಿನ ಐದಾರು ತಿಂಗಳಲ್ಲಿ ಹಸೀನಾ ವಿರುದ್ಧ ಜನತೆ ಮುಖ್ಯವಾಗಿ ವಿದ್ಯಾರ್ಥಿಗಳು ಆಂದೋಲನಕ್ಕಿಳಿದರು. ಅದು ಎಷ್ಟು ವಿಪರೀತಕ್ಕೆ ಹೋಯಿತೆಂದರೆ ಢಾಕಾದಲ್ಲೇ ಉಳಿದರೆ ನಿಮ್ಮ ಜೀವಕ್ಕೇ ಅಪಾಯ ಎಂದು ಹಸೀನಾರ ಬಾವ ಹಾಗೂ ಸೇನಾ ಮುಖ್ಯಸ್ಥ ಜ. ವಕಾರುಜ್ಜಮಾನ್ ಪ್ರಧಾನಿಗೆ ಸಲಹೆ ನೀಡಿದರು. ಅವರ ಸಹಕಾರ ಮತ್ತು ಭಾರತ ಸರ್ಕಾರದ ಸಕ್ರಿಯ ಪಾತ್ರದಿಂದ ಹಸೀನಾ ಕ್ಷೇಮವಾಗಿ ಬಾಂಗ್ಲಾದೇಶದ ಗಡಿ ದಾಟಿ ಭಾರತಕ್ಕೆ ಬಂದರು.

ಸತತ ನಾಲ್ಕನೆಯ ಬಾರಿಗೆ ಸ್ವದೇಶೀಯರ ಬೆಂಬಲ ಗಳಿಸಿದರೂ ತಮಗೆ ಹೊರಗಿನಿಂದ ಅಪಾಯ ಇದೆಯೆಂದು ಹಸೀನಾ ಮೇ ತಿಂಗಳಲ್ಲೇ ಆತಂಕಗೊಂಡಿದ್ದರು. ಆಯಕಟ್ಟಿನ ಸೇಂಟ್ ಮಾರ್ಟಿನ್ ದ್ವೀಪವನ್ನು ನಮಗೆ ಕೊಟ್ಟರೆ ನಿಮ್ಮ ಚುನಾವಣಾ ವಿಜಯವನ್ನು ನ್ಯಾಯಸಮ್ಮತ ಎಂದು ಹೇಳಿ ನಿಮ್ಮ ಪ್ರಧಾನಮಂತ್ರಿತ್ವವನ್ನು ಬೆಂಬಲಿಸುವುದಾಗಿಯೂ, ಇಲ್ಲದಿದ್ದರೆ ನಿಮ್ಮ ಗತಿ ನೆಟ್ಟಗಿರುವುದಿಲ್ಲವೆಂದೂ ‘ಬಿಳಿಯ ಮನುಷ್ಯ’ನೊಬ್ಬ ತಮ್ಮನ್ನು ಹೆದರಿಸಿದ್ದಾಗಿ ಹಸೀನಾ ಸಾರ್ವಜನಿಕವಾಗಿಯೇ ಹೇಳಿದ್ದರು. ಆ ಬಿಳಿಯ ಮನುಷ್ಯ ವರ್ಷದ ಹಿಂದೆ ಪಾಕಿಸ್ತಾನದಲ್ಲಿ ಇಮ್ರಾನ್ ಖಾನ್​ರ ಎತ್ತಂಗಡಿಗೆ ಕಾರಣನಾಗಿದ್ದ ಅಮೆರಿಕದ ಉಪ ವಿದೇಶಾಂಗ ಕಾರ್ಯದರ್ಶಿ ಡೊನಾಲ್ಡ್ ಲು ಎನ್ನುವ ರಹಸ್ಯವೂ ಕೆಲವೇ ದಿನಗಳಲ್ಲಿ ಬಯಲಾಯಿತು. ಅಲ್ಲಿಗೆ ದೊಡ್ಡಣ್ಣನ ಕೆಟ್ಟ ಕಣ್ಣು ಹಸೀನಾ ಮೇಲೆ ಬಿದ್ದಿದೆ ಎನ್ನುವುದು ಸ್ಪಷ್ಟವಾಯಿತು. ಆಮೇಲೆ ಬಾಂಗ್ಲಾದೇಶದಲ್ಲಿ ನಡೆದದ್ದೆಲ್ಲವೂ ಹಿಂದೆ ಹಲವಾರು ದೇಶಗಳಲ್ಲಿ ನಡೆದಿದ್ದಂತಹದೇ. ಹಿಂದಿನ ಡೆಮೊಕ್ರಾಟಿಕ್ ಅಧ್ಯಕ್ಷ ಬರಾಕ್ ಹುಸೇನ್ ಒಬಾಮಾ ಆಡಳಿತ ಪ್ರಜಾಪ್ರಭುತ್ವದ ಸ್ಥಾಪನೆಯ ನೆಪದಲ್ಲಿ ಉತ್ತರ ಆಫ್ರಿಕಾ ಮತ್ತು ಆಗ್ನೇಯ ಯೂರೋಪ್​ನಲ್ಲಿ ಜನರನ್ನು ಎತ್ತಿಕಟ್ಟಿ ಸರ್ಕಾರಗಳನ್ನು ಉರುಳಿಸಿತ್ತು. ಹಾಗೆಯೇ ಈಗ ಮತ್ತೊಬ್ಬ ಡೆಮೊಕ್ರಾಟಿಕ್ ಅಧ್ಯಕ್ಷ ಜೋ ಬೈಡನ್ ಆಡಳಿತ ಬಾಂಗ್ಲಾದೇಶದಲ್ಲಿ ಯುವಜನತೆಯನ್ನು ಎತ್ತಿಕಟ್ಟಿ ಹಸೀನಾ ಸರ್ಕಾರವನ್ನು ಉರುಳಿಸಿತು.

2025ರ ಆಗಸ್ಟ್ 5ರಂದು ಹಸೀನಾ ಭಾರತಕ್ಕೆ ಓಡಿಬಂದ ಇಪ್ಪತ್ತನಾಲ್ಕು ತಾಸುಗಳೊಳಗೆ ಢಾಕಾದಲ್ಲಿ ಬಂದು ಕೂತದ್ದು ಮಹಮದ್ ಯೂನುಸ್. ಈತ ಸ್ಥಾಪಿಸಿದ್ದ ಗ್ರಾಮೀಣ ಬ್ಯಾಂಕ್ ಅನ್ನು ಮಹತ್ ಸಾಧನೆಯಂತೆ ಜಗತ್ತಿನಾದ್ಯಂತ ಅಟ್ಟಕ್ಕೇರಿಸಿದ್ದು ಅಮೆರಿಕದ ಡೆಮೊಕ್ರಾಟಿಕ್ ಪಕ್ಷ. ಅವರಿಗೆ ಎರಡು ದಶಕಗಳ ಹಿಂದೆ ನೊಬೆಲ್ ಬಹುಮಾನ ಕೊಡಿಸಿದ್ದು ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್. 2016ರಲ್ಲಿ ಹಿಲರಿ ಕ್ಲಿಂಟನ್ ಅಧ್ಯಕ್ಷಗಿರಿಗಾಗಿ ಡೊನಾಲ್ಡ್ ಟ್ರಂಪ್ ವಿರುದ್ಧ ಕಣಕ್ಕಿಳಿದಾಗ ಈ ಅರ್ಥಶಾಸ್ತ್ರಜ್ಞ ಅವರ ಚುನಾವಣಾ ಪ್ರಚಾರಕ್ಕಾಗಿ ದೇಣಿಗೆ ನೀಡಿದ್ದರು! ಆದರೆ ಮನೆಗೆ ಮಾರಿ, ಪರರಿಗೆ ಉಪಕಾರಿ ಎನ್ನುವಂತೆ ಈ ಇಷ್ಟು ಶ್ರೀಮಂತ ವ್ಯಕ್ತಿ ಪದ್ಮಾ ನದಿಯ ಮೇಲೆ ಸೇತುವೆ ನಿರ್ವಿುಸಲು ಹಸೀನಾ ಸರ್ಕಾರ 2012ರಲ್ಲಿ ಐಎಂಎಫ್ ಸಾಲ ಕೇಳಿದಾಗ ಅದರ ವಿರುದ್ಧ ಕೆಲಸ ಮಾಡಿದ್ದರು. ಆ ಸೇತುವೆ 2019ರಲ್ಲಿ ಹೇಗೋ ಪೂರ್ಣಗೊಂಡಾಗ ಅದನ್ನು ಉದ್ಘಾಟಿಸುತ್ತಾ ಈ ಅರ್ಥಶಾಸ್ತ್ರಜ್ಞನನ್ನು ಹೊಸ ಸೇತುವೆ ಕೆಳಗೆ ನೇಣುಹಾಕಿ ನೇತಾಡಿಸಬೇಕು ಎಂದು ಅಬ್ಬರಿಸಿದ್ದರು. ಆಗಸ್ಟ್ 5ರಂದು ಅದೃಷ್ಟಚಕ್ರ ಒಂದು ಸುತ್ತು ತಿರುಗಿ ಹಸೀನಾ ಕೆಳಗುರುಳಿದಾಗ ಬೈಡನ್ ಆಡಳಿತ ಪ್ಯಾರಿಸ್​ನಲ್ಲಿದ್ದ ಡೆಮೊಕ್ರಾಟಿಕ್ ಪಕ್ಷದ ಸಾಕುಮಗ ಯೂನುಸ್​ರನ್ನು ಢಾಕಾಗೆ ಕರೆತಂದು ಕೂರಿಸಿತು. ಉಸ್ತುವಾರಿ ಸರ್ಕಾರದ ಮುಖ್ಯ ಸಲಹೆಗಾರ ಎಂಬ ಅಧಿಕೃತ ಸ್ಥಾನವಾದರೂ ಇವರಿಗೆ ದೊರೆತದ್ದು ಪ್ರಧಾನಮಂತ್ರಿಯ ಅಧಿಕಾರ, ಸವಲತ್ತು, ದೌಲತ್ತು.

ತಾನು ಬಾಂಗ್ಲಾದೇಶದ ಅನಭಿಷಿಕ್ತ ಸಾಮ್ರಾಟನಾದದ್ದು ಭಾರತಕ್ಕೆ ಮತ್ತು ದೇಶದಲ್ಲಿನ ಹಿಂದೂ ಅಲ್ಪಸಂಖ್ಯಾತರಿಗೆ ಕಾಟ ಕೊಡಲೆಂದೇ ಎಂದು ತಿಳಿದು ಆ ದಿಕ್ಕಿನಲ್ಲಿ ಎಲ್ಲೆ ಮೀರಿ ವರ್ತಿಸತೊಡಗಿದ ಯೂನುಸ್​ಗೆ ತಮ್ಮ ಭವಿಷ್ಯ ಕರಾಳವಾಗುತ್ತಿದೆಯೆನಿಸಿದ್ದು 2024ರ ನವೆಂಬರ್ ಚುನಾವಣೆಗಳಲ್ಲಿ ತಮ್ಮ ಪೋಷಕ ಡೆಮೊಕ್ರಾಟಿಕ್ ಪಕ್ಷದ ಬೈಡನ್ ಸೋಲಬಹುದು ಎಂಬ ಸೂಚನೆ ಕಂಡುಬಂದಾಗ ಮತ್ತು ರಿಪಬ್ಲಿಕನ್ ಅಭ್ಯರ್ಥಿ ಟ್ರಂಪ್ ದೀಪಾವಳಿಯ ಸಂದರ್ಭದಲ್ಲಿ ಬಾಂಗ್ಲಾದೇಶಿ ಹಿಂದೂಗಳ ಪರವಾಗಿ ಮಾತಾಡಿದಾಗ. ಯೂನುಸ್​ರ ದುಃಸ್ವಪ್ನ ನಿಜವಾದದ್ದು 2025ರ ಫೆಬ್ರವರಿ 14ರಂದು ಹೊಸ ಅಧ್ಯಕ್ಷ ಟ್ರಂಪ್ ಭಾರತದ ಪ್ರಧಾನಿ ಮೋದಿಯವರನ್ನು ವಾಷಿಂಗ್ಟನ್​ನಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಪಕ್ಕದಲ್ಲಿ ಕೂರಿಸಿಕೊಂಡು ಬಾಂಗ್ಲಾದೇಶವನ್ನು ನಾನು ಮೋದಿಯವರಿಗೆ ಬಿಟ್ಟುಬಿಟ್ಟಿದ್ದೇನೆ. ಅದನ್ನು ಅವರೇ ಸಮರ್ಥವಾಗಿ ನಿಭಾಯಿಸುತ್ತಾರೆ ಎಂದು ಘೊಷಿಸಿದಾಗ. ತಾನು ಕೆಟ್ಟೆ ಎಂದು ಕಂಗಾಲಾದ ಯೂನುಸ್ ಓಡಿದ್ದು ಚೀನಾಗೆ.

ಅದಕ್ಕಾಗಿ ಅವರು ಆಯ್ದುಕೊಂಡ ಸಮಯ ಬಾಂಗ್ಲಾದೇಶದ ಸ್ವಾತಂತ್ರ್ಯ ದಿನವನ್ನು! 2025ರ ಮಾರ್ಚ್ 26ರಂದು ದೇಶದ ಸ್ವಾತಂತ್ರ್ಯ ದಿನವನ್ನು ಆಚರಿಸುವ ಬದಲು ಯೂನುಸ್ ಬೀಜಿಂಗ್​ಗೆ ಹೋದರು. ಅಲ್ಲಿ ಚೀನಾ ಜತೆ ಹಲವು ಒಪ್ಪಂದಗಳನ್ನು ಮಾಡಿಕೊಂಡದ್ದಲ್ಲದೇ ಚೀನಿ ನೆಲದಲ್ಲಿ ನಿಂತು ಭಾರತಕ್ಕೆ ಬೆದರಿಕೆಯ ಮಾತಿನ ಮಳೆ ಸುರಿಸಿದರು. ಬಾಂಗ್ಲಾದೇಶವನ್ನು ಗಾರ್ಡಿಯನ್ ಆಫ್ ದ ಸೀ ಎಂದು ಬಣ್ಣಿಸಿದ ಅವರು ನಮ್ಮ ಪೂವೋತ್ತರದ ಏಳು ರಾಜ್ಯಗಳಿಗೆ ಸಮುದ್ರ ಸಂಪರ್ಕವಿಲ್ಲವೆಂದು ಹೇಳಿ, ಅವುಗಳನ್ನು ಯಾವಾಗ ಬೇಕಾದರೂ ಭಾರತದಿಂದ ಕತ್ತರಿಸಬಹುದಾದ ಸ್ಥಿತಿಯಲ್ಲಿ ಬಾಂಗ್ಲಾದೇಶ ಇರುವುದೆಂದು ಕೊಚ್ಚಿಕೊಂಡರು. ತಮ್ಮ ಈ ಬುರುಡೆ ಚೀನೀಯರ ಕಿವಿಗೆ ಇಂಪು ಸಂಗೀತವೆಂದು ಅವರು ತಿಳಿದಂತಿತ್ತು.

ಈ ಬಗೆಯ ನಿಲುವುಗಳಿಂದಾಗಿ ತಮ್ಮ ತಲೆಯ ಮೇಲೆ ತಾವೇ ಚಪ್ಪಡಿ ಎಳೆದುಕೊಳ್ಳುತ್ತಿರುವುದರ ಅರಿವು ಈ ನೊಬೆಲ್ ಪುರಸ್ಕೃತ ಮೇಧಾವಿಗೆ ಅರಿವಾಗಲೇ ಇಲ್ಲ. ಅಮೆರಿಕಾ ಸೇಂಟ್ ಮಾರ್ಟಿನ್ ದ್ವೀಪವನ್ನು ಬಯಸಿದ್ದೇ ಚೀನಾದ ಮೇಲೆ ಅಲ್ಲಿಂದ ಕಣ್ಣಿಡಲು. ಈ ಲೆಕ್ಕಾಚಾರಕ್ಕೆ ಸಹಕಾರಿಯಾಗುತ್ತಾರೆಂದು ಕರೆತಂದು ಢಾಕಾದಲ್ಲಿ ಪಟ್ಟಕ್ಕೇರಿಸಿದರೆ ಈ ಮನುಷ್ಯ ಚೀನಾದ ಮಡಿಲಿಗೆ ಹೋಗಿ ಕೂತಿದ್ದಾನಲ್ಲ! ಈ ಭಾವನೆಯನ್ನು ಅಮೆರಿಕದ ಸಾಂಪ್ರದಾಯಿಕ ಸಾಮರಿಕ ತಜ್ಞರು ಮತ್ತವರ ಪೋಷಕ ಡೆಮೊಕ್ರಾಟಿಕ್ ಪಕ್ಷ ತಳೆದದ್ದೇ ಯೂನುಸ್​ರ ಅದೃಷ್ಟರೇಖೆ ಕೆಳಮುಖ ಹಿಡಿಯಿತು. ಚುನಾವಣೆಗಳನ್ನು ಮುಂದೂಡಿ ಅಧಿಕಾರದಲ್ಲೇ ಅಂಟಿ ಕೂರುವ ಅವರ ಹುನ್ನಾರಗಳಿಗೆ ಬೆಂಬಲದ ಸೆಲೆ ಬತ್ತಿಹೋಯಿತು. ಪರಿಣಾಮವಾಗಿ ಇದೇ ಫೆಬ್ರವರಿ 12ರಂದು ಸಂಸದೀಯ ಚುನಾವಣೆಗಳು ನಡೆದವು.

ಚುನಾವಣೆಗಳು ನಡೆದ 297 ಕ್ಷೇತ್ರಗಳಲ್ಲಿ ಯೂನುಸ್​ರ ಕಣ್ಗೊಂಬೆ ಜಮಾತ್-ಇ-ಇಸ್ಲಾಮಿಗೆ ಸಿಕ್ಕಿದ್ದು ಕೇವಲ 68 ಸ್ಥಾನಗಳು. ಹಸೀನಾ ಸರ್ಕಾರವನ್ನು ಉರುಳಿಸಿದ ವೀರಾಗ್ರಣಿಗಳು ಎಂದು ಪ್ರಚಾರ ಪಡೆದಿದ್ದ ವಿದ್ಯಾರ್ಥಿಗಳ ಪಕ್ಷ ನ್ಯಾಷನಲ್ ಸಿಟಿಜನ್ಸ್ ಪಾರ್ಟಿಗೆ ಸಿಕ್ಕಿದ್ದು ಕೇವಲ 6 ಅಷ್ಟೇ! 209 ಸ್ಥಾನಗಳ ಭಾರಿ ಬಹುಮತ ಗಳಿಸಿದ ಬಾಂಗ್ಲಾದೇಶ್ ನ್ಯಾಷನಲಿಸ್ಟ್ ಪಾರ್ಟಿಯ ನೇತಾರ ತಾರಿಖ್ ರಹಮಾನ್ ಇಂದು ಬಾಂಗ್ಲಾದೇಶದ ಪ್ರಧಾನಮಂತ್ರಿ. ಅವರು ಈ ಬಾರಿಯ ಸ್ವಾತಂತ್ರ್ಯದಿನದಂದು ದೇಶದಲ್ಲೇ ಇದ್ದರು, ಪಾಕಿಸ್ತಾನಿ ಸೇನೆ ಎಸಗಿದ ಭೀಕರ ಹತ್ಯಾಕಾಂಡವನ್ನು ತೀವ್ರವಾಗಿ ಖಂಡಿಸಿದರು, ಮಡಿದ ಬಂಗಾಲಿಗಳಿಗಾಗಿ ಅಶ್ರುತರ್ಪಣ ನೀಡಿದರು, ಅವರ ಬಲಿದಾನವನ್ನು ತುಂಬುಹೃದಯದಿಂದ ಸ್ಮರಿಸಿದರು, ಸ್ವಾತಂತ್ರ್ಯೋತ್ಸವವನ್ನು ವಿಧಿವತ್ತಾಗಿ ಆಚರಿಸಿದರು. ಜನರಿಂದ ಆಯ್ಕೆಯಾದ ನಾಯಕನಿಗೂ, ಹೊರಗಿನವರ ಸಂಚಿನಿಂದಾಗಿ ಕುರ್ಚಿ ಗಿಟ್ಟಿಸಿಕೊಂಡ ಅಧಿಕಾರಲಾಲಸಿ ಸ್ವಾರ್ಥಿಗೂ ಇರುವ ವ್ಯತ್ಯಾಸ ಇದು.