ಕಾಕ್ರೋಚ್ ಜನತಾ ಪಾರ್ಟಿಯೋ ಆಮ್ ಕಾಕ್ರೋಚ್ ಕಾಂಗ್ರೆಸ್ಸೋ?

ಭಾರತೀಯರು ತಮ್ಮ ಸಾಂಸ್ಕೃತಿಕ ಪರಂಪರೆ, ಧಾರ್ವಿುಕ ನಂಬಿಕೆ, ಆಚರಣೆಗಳ ಬಗ್ಗೆ ಕೀಳರಿಮೆ ಬೆಳೆಸಿಕೊಳ್ಳುವಂತೆ ಶಿಕ್ಷಣ ಪದ್ಧತಿ ರೂಪಿಸುವ ವ್ಯವಸ್ಥಿತ ಪ್ರಯತ್ನವನ್ನು ಬ್ರಿಟಿಷ್ ಕ್ರಿಶ್ಚಿಯನ್ ಮಿಷನರಿ ಶಿಕ್ಷಣ ಸಂಸ್ಥೆಗಳು 19ನೇ ಶತಮಾನದ ಮಧ್ಯಭಾಗದಲ್ಲೇ ಆರಂಭಿಸಿದವು. ಅದು ಸ್ವತಂತ್ರ ಭಾರತದ ಕಾಂಗ್ರೆಸ್ ಶಾಸನ ಕಾಲದಲ್ಲಿ ಇನ್ನಷ್ಟು ಉಗ್ರವಾಗಿ ಮುಂದುವರೆಯಿತು. ಆ ಅವಧಿಯಲ್ಲಿ ಹಿಂದೂ ಇತಿಹಾಸಕಾಲದ ಋಣಾತ್ಮಕ ಚಿತ್ರಣ ಮತ್ತು ಮುಸ್ಲಿಂ ಶಾಸನದ ವೈಭವೀಕರಣ ಸರ್ಕಾರದ ಶಿಕ್ಷಣ ನೀತಿಯ ಪ್ರಮುಖ ಅಂಶವಾಗಿದ್ದರೆ, ಇತಿಹಾಸದ ವಸ್ತುನಿಷ್ಠ ಚಿತ್ರಣದ ಪ್ರಯತ್ನದಲ್ಲಿ ತೊಡಗಿದ ವ್ಯಕ್ತಿಗಳನ್ನು ಮತ್ತು ಸಂಸ್ಥೆಗಳನ್ನು ವ್ಯವಸ್ಥಿತವಾಗಿ ನಿಗ್ರಹಿಸುವ ಕೆಲಸವನ್ನು ಸರ್ಕಾರಿ ವಲಯದ ಶಿಕ್ಷಣ ಸಂಸ್ಥೆಗಳು, ಅಧ್ಯಯನ ಮತ್ತು ಸಂಶೋಧನಾ ಸಂಸ್ಥೆಗಳು ಮಾಡಿದವು.

ಇಷ್ಟು ಪ್ರಯತ್ನಗಳ ಹೊರತಾಗಿಯೂ ರಾಷ್ಟ್ರೀಯವಾದಿ ಭಾರತೀಯ ಜನತಾ ಪಕ್ಷ 1996ರ ಚುನಾವಣೆಗಳಲ್ಲಿ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿ ವಾಜಪೇಯಿ ಪ್ರಧಾನಿಯೂ ಆದರು. ಅವರ ಅಧಿಕಾರಾವಧಿ 13 ದಿನಗಳಷ್ಟೇ ಆದರೂ ಬಿಜೆಪಿ ಕೇಂದ್ರದಲ್ಲಿ ಅಧಿಕಾರಕ್ಕೇರಬಲ್ಲುದು ಎನ್ನುವುದಂತೂ ಸಾಬೀತಾಯಿತು. ಅದನ್ನು ತಡೆಯುವ ಪ್ರಯತ್ನಗಳು ತಕ್ಷಣ ಆರಂಭವಾದವು. ಭಾರತೀಯ ಪಾರಂಪರಿಕ ಮೌಲ್ಯಗಳ ಜತೆಗೆ ಭಾರತೀಯ ರಾಷ್ಟ್ರೀಯತೆಯನ್ನೇ ಪ್ರಶ್ನಿಸುವಂತಹ ವ್ಯಕ್ತಿಗಳಿಗೆ ಪ್ರಮುಖ ಅಂತಾರಾಷ್ಟ್ರೀಯ ಪ್ರಶಸ್ತಿಗಳನ್ನು ನೀಡಿ ಅವರನ್ನು ಭಾರತದ ಅಧಿಕೃತ ಧ್ವನಿಗಳೆಂದು ಜಗತ್ತಿನ ಮುಂದೆ ನಿಲ್ಲಿಸಲಾಯಿತು, ಅವರ ಅಭಿಪ್ರಾಯಗಳಿಗೆ ಆಂಗ್ಲ ಪತ್ರಿಕೆಗಳನ್ನು ಮುಖ್ಯವಾಗಿ ನಿಯತಕಾಲಿಕವೊಂದನ್ನು ನಿಯೋಜಿಸಲಾಯಿತು, ಅಂತಹ ‘ಧ್ವನಿ’ಗಳಿಗೆ ಎಲ್ಲ ಬಗೆಯಲ್ಲೂ ಹತ್ತಿರವಾದ ವ್ಯಕ್ತಿಗಳು ಆಂಗ್ಲ ಸುದ್ದಿಮಾಧ್ಯಮಗಳಲ್ಲಿ ಅಗ್ರಪಂಕ್ತಿಯಲ್ಲಿ ನಿಲ್ಲುವಂತೆ ಮಾಡುವ ಪಿತೂರಿಯೂ ನಡೆಯಿತು. 

ಆದಾಗ್ಯೂ 1998ರಲ್ಲಿ ಬಿಜೆಪಿ ನೇತೃತ್ವದ ಎನ್​ಡಿಎ ಅಧಿಕಾರಕ್ಕೆ ಬಂದೇಬಿಟ್ಟಿತು. ಆಗ ಅದನ್ನು ದೇಶದೊಳಗೆ ಮತ್ತು ಹೊರಗೆ ಋಣಾತ್ಮಕವಾಗಿ ಬಿಂಬಿಸುವ ಪ್ರಯತ್ನಗಳು ತೀವ್ರಗೊಂಡವು. ವಾಜಪೇಯಿ ಸರ್ಕಾರದ ಅಣ್ವಸ್ತ್ರ ನೀತಿಯಿಂದ ಹಿಡಿದು ಬಿಜೆಪಿ ಆಡಳಿತದ ರಾಜ್ಯಗಳ ಅಭಿವೃದ್ಧಿ ಯೋಜನೆಗಳನ್ನು ಜನವಿರೋಧಿ, ಪರಿಸರವಿರೋಧಿ, ದೇಶಕ್ಕೆ ಗಂಡಾಂತರಕಾರಿ ಎಂದೆಲ್ಲಾ ಬಣ್ಣಿಸುವ ಲೇಖನಗಳು, ಹೇಳಿಕೆಗಳು ‘ಭಾರತದ ಅಧಿಕೃತ ಧ್ವನಿ’ಗಳಿಂದ ಪುಂಖಾನುಪುಂಖವಾಗಿ ಹೊರಡತೊಡಗಿದವು. ಅದು ಎಷ್ಟರ ಮಟ್ಟಿಗೆ ಹೋಯಿತೆಂದರೆ ನಕ್ಸಲ್ ಹಿಂಸಾಚಾರ ಮತ್ತು ಕಾಶ್ಮೀರದ ತಥಾಕಥಿತ ಆಜಾದಿ ಕೂಗುಗಳಿಗೂ ಸಮರ್ಥನೆಯ ಮಾತುಗಳು ದೊಡ್ಡದಾಗಿ ಬರತೊಡಗಿದವು. ಅಂದರೆ ಬಿಜೆಪಿ-ವಿರೋಧ ಭಾರತ-ವಿರೋಧವಾಗಿ ರೂಪಾಂತರಗೊಂಡಿತ್ತು!

ಬಿಜೆಪಿ ವಿರುದ್ಧ ಜನಾಭಿಪ್ರಾಯ ಮೂಡಿಸಲು ಕಾರ್ಯತಂತ್ರ ರೂಪಿಸುವುದಕ್ಕಾಗಿ ತಥಾಕಥಿತ ಸಾಮಾಜಿಕ ಕಾರ್ಯಕರ್ತೆಯೊಬ್ಬರು 1999ರಲ್ಲೇ ಪ್ರಯತ್ನ ಆರಂಭಿಸಿದ್ದರು, ಅದಕ್ಕಾಗಿ ಸಭೆಯೊಂದನ್ನು ಆಯೋಜಿಸಿದರು, ಅದರಲ್ಲಿ ತಮ್ಮನ್ನೂ ಸೇರಿಸಿಕೊಳ್ಳಲು ವಿಫಲ ಪ್ರಯತ್ನ ನಡೆಸಿದ ವಿವರಗಳನ್ನು ಸಂಶೋಧಕಿ ಪೊ›. ಮಧುಪೂರ್ಣಿಮಾ ಕಿಶ್ವರ್ ಹೇಳುತ್ತಾರೆ. ಆ ಸಾಮಾಜಿಕ ಕಾರ್ಯಕರ್ತೆಗೆ ಕೈತುಂಬ ಕೆಲಸ ಸಿಕ್ಕಿದ್ದು 2002ರ ಗುಜರಾತ್ ಗಲಭೆಗಳು ಘಟಿಸಿದಾಗ. ಆಗ ಮತ್ತು ನಂತರದ ವರ್ಷಗಳಲ್ಲಿ ಆಕೆ ಮೋದಿಯವರ ವಿರುದ್ಧ ನಡೆಸಿದ ಋಣಾತ್ಮಕ ಕೆಲಸಗಳು ಈಗೆಲ್ಲರಿಗೂ ತಿಳಿದ ವಿಷಯ. ಆ ಬಗ್ಗೆ 4 ವರ್ಷಗಳ ಹಿಂದೆ ಸವೋಚ್ಚ ನ್ಯಾಯಾಲಯವೂ ತೀರ್ಪು ನೀಡಿ ಈಕೆಯ ಪೂವೋತ್ತರಗಳನ್ನು ಪರಿಶೀಲಿಸಬೇಕು ಎಂದು ಹೇಳಿತು.

ಗಲಭೆಗಳಿಗೆ ಮೋದಿಯವರನ್ನು ದೂಷಿಸಿ ‘ಸಾವಿನ ವ್ಯಾಪಾರಿ’ ಎಂದು ಸೋನಿಯಾ ಗಾಂಧಿ ಕರೆದದ್ದೂ ಬಿಜೆಪಿಯನ್ನು ಜನಮನದಿಂದ ದೂರವಾಗಿಸುವ ಪ್ರಯತ್ನ. ಮೋದಿಯವರ ಮೇಲಿನ ಆರೋಪಗಳು ನಿರಾಧಾರ ಎಂದು ಸವೋಚ್ಚ ನ್ಯಾಯಾಲಯ ನೇಮಿಸಿದ್ದ ತನಿಖಾ ತಂಡ ಯುಪಿಎ ಆಡಳಿತಾವಧಿಯಲ್ಲೇ ವರದಿ ನೀಡಿ, ನ್ಯಾಯಾಲಯ ಅದನ್ನು ಒಪ್ಪಿಕೊಂಡು ಮೋದಿಯವರನ್ನು ದೋಷಮುಕ್ತರನ್ನಾಗಿಸಿತು. ಆದರೆ ಅಷ್ಟರಲ್ಲಾಗಲೇ ಬಿಜೆಪಿ ಅಧಿಕಾರ ಕಳೆದುಕೊಂಡಾಗಿತ್ತು, ಕಾಂಗ್ರೆಸ್ ನೇತೃತ್ವದ ಯುಪಿಎ ಅಧಿಕಾರ ವಹಿಸಿಕೊಂಡು 8 ವರ್ಷಗಳಾಗುತ್ತಿದ್ದವು!

ಆ ನಡುವೆ ಪಾಕಿಸ್ತಾನ ಪ್ರಾಯೋಜಿತ ಇಸ್ಲಾಮಿಕ್ ಭಯೋತ್ಪಾದಕರು ಹೈದರಾಬಾದ್​ನ ಮಕ್ಕಾ ಮಸೀದಿ, ಮಾಲೆಗಾಂವ್ ಮತ್ತು ಸಂಜೋತಾ ಎಕ್ಸ್​ಪ್ರೆಸ್​ಗಳಲ್ಲಿ ನಡೆಸಿದ ಸ್ಪೋಟಗಳಿಗೆ ಯುಪಿಎ ಸರ್ಕಾರ ಹಿಂದೂ ಸಾಧಿ್ವ ಸೇನಾಧಿ ಕಾರಿಗಳನ್ನು ಆರೋಪಿಗಳನ್ನಾಗಿಸಿ ಬಂಧಿಸಿ, ಹಿಂಸಾಪೂರ್ಣ ‘ತನಿಖೆ’ ನಡೆಸಿತು; 2002ರ ಗುಜರಾತ್ ಕೋಮುಗಲಭೆಗಳ ವಿಶ್ಲೇಷಣೆ ಮಾಡುತ್ತ ಲೇಖಕ ಪ್ರವೀಣ್ ಸ್ವಾಮಿ ಫ್ರಂಟ್​ಲೈನ್ ಪತ್ರಿಕೆಯ ಲೇಖನದಲ್ಲಿ ಅನುಚಿತವಾಗಿ ಬಳಸಿದ್ದ ಕೇಸರಿ ಭಯೋತ್ಪಾದನೆ ಎಂಬ ಪದಗುಚ್ಛವನ್ನು ಯುಪಿಎ ಗೃಹಮಂತ್ರಿ ಪಿ. ಚಿದಂಬರಂ ಸಹ ಬಳಸಿ ಹಿಂದೂ ಭಯೋತ್ಪಾದನೆ ಎಂಬ ಇಲ್ಲದ ಭೂತವನ್ನು ಸೃಷ್ಟಿಸಿ ಜನರ ಮುಂದೆ ನಿಲ್ಲಿಸಲು ನೋಡಿದರು. ಇಷ್ಟಾಗಿಯೂ 2014ರ ಚುನಾವಣೆಗಳಲ್ಲಿ ಮತದಾರರು ಎನ್​ಡಿಎಗೆ ಪ್ರಚಂಡ ಬೆಂಬಲ ನೀಡಿದರು.

ಇದರ ಹೊಡೆತ ಬಿದ್ದದ್ದು ಆಂಗ್ಲೋಸ್ಪಿಯರ್​ಗೆ. ಅದರ ಒಂದೂಮುಕ್ಕಾಲು ಶತಮಾನದ ಕಾರ್ಯಾಚರಣೆಗೆ ಭಾರತದಲ್ಲಿ ತೀವ್ರ ಹಿನ್ನಡೆ ಉಂಟಾಗಿತ್ತು. ಇದು ಮುಂದುವರೆದು 2019ರ ಚುನಾವಣೆಗಳಲ್ಲಿ ಬಿಜೆಪಿಯ ಸ್ಥಾನಗಳು 303ಕ್ಕೇರಿದ್ದು ಅಭೂತಪೂರ್ವ ಬೆಳವಣಿಗೆ. ಇದರ ಸಾಧ್ಯತೆಯನ್ನು ಮೊದಲೇ ಕಂಡು, ಆಂಗ್ಲೋಸ್ಪಿಯರ್ ತನ್ನ ನಡೆಗಳನ್ನು ಬದಲಿಸಿದಂತೆ ಕಾಣುತ್ತದೆ. ಇಲ್ಲಿ ನಾವು ಗಮನಿಸಬೇಕಾದ್ದು ಅರವಿಂದ್ ಕೇಜ್ರಿವಾಲ್ ಮತ್ತವರ ಪುಕ್ಕಟೆ ಕೊಡುಗೆ ರಾಜಕಾರಣ. ಸಿಐಎ ಜತೆಗೆ ಕೇಜ್ರಿವಾಲ್​ರಿಗೆ ಸಂಬಂಧವಿದೆ ಎಂದು ನಮ್ಮ ಗುಪ್ತಚರ ಸಂಸ್ಥೆ ‘ರಾ’ದ ಮಾಜಿ ಅಧಿಕಾರಿ ಕರ್ನಲ್ ಆರ್​ಎಸ್​ಎನ್ ಸಿಂಗ್ 2014ರ ಮಾರ್ಚ್​ನಲ್ಲೇ ಲೇಖನವೊಂದರಲ್ಲಿ ವಿವರವಾಗಿ ಬರೆದಿದ್ದರು. ಯುಎಸ್​ಎಐಡಿಯ ಅಂಗವಾದ ಫೋರ್ಡ್ ಫೌಂಡೇಷನ್​ನಿಂದ ಕೇಜ್ರಿವಾಲ್​ರ ಎನ್​ಜಿಓಗಳಿಗೆ ಹಣ ಸಂದಾಯವಾಗುತ್ತಿದ್ದುದು ಮತ್ತು ಅದೇ ಯುಎಸ್​ಎಐಡಿಯ ಕೈವಾಡವಿರುವ ಮ್ಯಾಗ್ಸೇಸೇ ಪ್ರಶಸ್ತಿ ಕೇಜ್ರಿವಾಲ್​ರಿಗೆ ಸಿಕ್ಕಿರುವುದು ಗಮನಿಸಬೇಕಾದ ಅಂಶ. ಸಿಂಗ್ ಹೇಳುವ ಈ ಮಾತುಗಳ ಜತೆ ಕೇಜ್ರಿವಾಲ್​ರ ಖಲಿಸ್ತಾನ್ ಪರ ನೀತಿಯನ್ನೂ ನೋಡಬೇಕು.

ಖಲಿಸ್ತಾನ್ ಕೂಗು ಪಾಕಿಸ್ತಾನದ ಸೃಷ್ಟಿ ಎನ್ನುವುದು ಸಾಮಾನ್ಯ ನಂಬಿಕೆ. ಆದರೆ ಅದರಲ್ಲಿ ಅಮೆರಿಕದ ಪಾತ್ರವೂ ಇದೆ. 1971ರಲ್ಲೇ ಇಂದಿರಾರ ಕೈಗಳನ್ನು ಕಟ್ಟಿಹಾಕಲು ಖಲಿಸ್ತಾನ್ ಪಿತೂರಿಗೆ ಅಮೆರಿಕ ಕುಮ್ಮಕ್ಕು ನೀಡಿದ ಉದಾಹರಣೆ ಇದೆ. ಇಂದಿಗೂ ಖಲಿಸ್ತಾನ್ ಉಗ್ರರು ಮತ್ತು ಕಾರ್ಯಕರ್ತರು ಮುಕ್ತವಾಗಿ ಭಾರತ-ವಿರೋಧಿ ಚಟುವಟಿಕೆಗಳಲ್ಲಿ ತೊಡಗಲು ಅವಕಾಶವಿರುವುದು ಐದು ಆಂಗ್ಲೋಸ್ಪಿಯರ್ ದೇಶಗಳಲ್ಲಿ ಮಾತ್ರ. ಜರ್ಮನಿ ಮತ್ತು ಇತರ ಯೂರೋಪಿಯನ್ ದೇಶಗಳಲ್ಲಿ ನೆಲೆಸಿರುವ ಅಪಾರ ಸಂಖ್ಯೆಯ ಸಿಖ್ ಜನಾಂಗದವರಿಗೆ ಆ ವಿಷಯದಲ್ಲಿ ಆಸಕ್ತಿಯೂ ಇಲ್ಲ, ಆ ಸರ್ಕಾರಗಳು ಅವಕಾಶ ಕೊಡುವುದೂ ಇಲ್ಲ. 

ಕೇಜ್ರಿವಾಲ್ ಖಲಿಸ್ತಾನಿಗಳ ಜತೆಗೆ ಹೊಂದಿರುವ ಸಂಬಂಧಗಳು, ಅಮೆರಿಕ ಮತ್ತು ಕೆನಡಾ ಎರಡೂ ಆಂಗ್ಲೋಸ್ಪಿಯರ್ ದೇಶಗಳ ಪೌರತ್ವ ಹೊಂದಿರುವ ಖಲಿಸ್ತಾನಿ ಗುರುಪತ್ವಂತ್ ಸಿಂಗ್ ಪನ್ನು ಕೇಜ್ರಿವಾಲ್​ರ ಆಪ್​ಗೆ 136 ಕೋಟಿ ರೂ. ದೇಣಿಗೆ ನೀಡಿದ್ದನ್ನೂ, ಸ್ವತಂತ್ರ ಖಲಿಸ್ತಾನದ ಮೊದಲ ಪ್ರಧಾನಿ ಕೇಜ್ರಿವಾಲ್ ಎಂದು ಆಗಾಗ ಕೇಳಿಬಂದ ಮಾತುಗಳನ್ನು ಗಮನಿಸಿದರೆ ಅಮೆರಿಕ-ಖಲಿಸ್ತಾನ್-ಕೇಜ್ರಿವಾಲ್ ಬಾಂಧವ್ಯದ ಸೂಚನೆ ಸಿಗಬಹುದು.

ಅದೇ ಕೇಜ್ರಿವಾಲ್ 2013ರ ದೆಹಲಿ ಚುನಾವಣೆಗಳಲ್ಲಿ ಬಹುಮತ ಗಳಿಸಲು ವಿಫಲರಾದಾಗ 2015ರಲ್ಲಿ ಅನುಸರಿಸಿದ್ದು ಪುಕ್ಕಟೆ ಕೊಡುಗೆಗಳ ಘೊಷಣೆ. ಅದರಲ್ಲಿ ಅವರಿಗೆ ಸಿಕ್ಕಿದ್ದು 70ರಲ್ಲಿ 67 ಸ್ಥಾನಗಳು! ಕ್ಲಾವರ್ಡ್-ಪಿವನ್ ತಂತ್ರ ನೆನಪಾಗುತ್ತದೆಯೇ? ಇದೇ ತಂತ್ರವನ್ನು ಕೇಜ್ರಿವಾಲ್ 2020ರಲ್ಲಿ ಮತ್ತೆ ಬಳಸಿ ದೆಹಲಿ ಚುನಾವಣೆಗಳನ್ನೂ, 2022ರಲ್ಲಿ ಪಂಜಾಬ್ ಚುನಾವಣೆಗಳಲ್ಲೂ ಭಾರಿ ಜಯಗಳಿಸಿದರು. ಅವರ ದಾರಿ ಹಿಡಿದ ರಾಹುಲ್ ಗಾಂಧಿ ಹಿಮಾಚಲ ಪ್ರದೇಶ, ಕರ್ನಾಟಕ ಮತ್ತು ತೆಲಂಗಾಣಗಳಲ್ಲಿ ಕಾಂಗ್ರೆಸ್​ಗೆ ಜಯ ತಂದುಕೊಟ್ಟರು.

ಸಾರಾಸಗಟಾಗಿ ಸಮಾಜದ ಒಂದು ದೊಡ್ಡ ವರ್ಗಕ್ಕೆ ಪುಕ್ಕಟೆ ಕೊಡುಗೆಗಳನ್ನು ನೀಡುವುದು ಕಲ್ಯಾಣ ರಾಜ್ಯದ (ವೆಲ್ಪೇರ್ ಸ್ಟೇಟ್) ನೀತಿ ಅಲ್ಲ. ಅದು ಕ್ಲಾವರ್ಡ್-ಪಿವನ್ ತಂತ್ರದ ಲಜ್ಜಾಹೀನ ಅನುಷ್ಠಾನ. ಅದರ ಮೂಲಕ ಹೆಚ್ಚು ಹೆಚ್ಚು ರಾಜ್ಯಗಳನ್ನು ಆಪ್ ಮತ್ತು ಕಾಂಗ್ರೆಸ್ ಕೈವಶ ಮಾಡಿಕೊಂಡು ಅವುಗಳ ಅರ್ಥವ್ಯವಸ್ಥೆಯನ್ನು ಪಾತಾಳಕ್ಕಿಳಿಸಿದರೆ ಅಂತಿಮವಾಗಿ ಅದು ಹಾನಿಯೆಸಗುವುದು ರಾಷ್ಟ್ರದ ಅರ್ಥವ್ಯವಸ್ಥೆಗೆ. ಸೋವಿಯೆತ್ ಯೂನಿಯನ್​ನ ಕಮ್ಯೂನಿಸ್ಟ್ ಸತ್ತೆಯನ್ನು ಅಮೆರಿಕ ಸಾಯಿಸಿದ್ದು ಹೀಗೆ.

ದುರಂತವೆಂದರೆ ಆಪ್ ಮತ್ತು ಕಾಂಗ್ರೆಸ್​ಗಳ ಪುಕ್ಕಟೆ ರಾಜಕಾರಣವನ್ನು ವಿರೋಧಿಸಬೇಕಾದರೆ ಬಿಜೆಪಿ ಸಹ ಅದನ್ನೇ ಅನುಸರಿಸುವ ಒತ್ತಡಕ್ಕೊಳಗಾಗಿದೆ. ಇಲ್ಲದಿದ್ದರೆ ರಾಜ್ಯಗಳನ್ನು ಒಂದೊಂದಾಗಿ ಕಳೆದುಕೊಳ್ಳುತ್ತ ಹೋಗಬೇಕಾಗಬಹುದು. ಇದನ್ನು ಹರಿಯಾಣ, ಮಧ್ಯಪ್ರದೇಶದಲ್ಲಿ ನೋಡಿದ್ದೇವೆ. ಕ್ಲಾವರ್ಡ್-ಪಿವನ್ ತಂತ್ರ ಒಮ್ಮೆ ಆರಂಭವಾದರೆ ನಂತರ ಅದು ಇಡೀ ದೇಶವನ್ನೇ ಹೆಬ್ಬಾವಿನಂತೆ ನುಂಗುತ್ತಾ ಹೋಗುತ್ತದೆ. ಅಮೆರಿಕ ಈ ದೇಶಕ್ಕೆ ಬಯಸುವುದು ಅದೇ ಗತಿಯನ್ನಲ್ಲವೇ? ಇನ್ನು ಶಾರ್ಪ್ ಕುತಂತ್ರಗಳೆಂದರೆ ಆಂದೋಲನಗಳು, ಲೇವಡಿಗಳು. 2019ರ ಚುನಾವಣೆಗಳಲ್ಲಿ ಬಿಜೆಪಿಯೊಂದೇ 303 ಲೋಕಸಭಾ ಸ್ಥಾನ ಗಳಿಸಿದ್ದೇ ಇವುಗಳ ಭರಾಟೆ ಆರಂಭಗೊಂಡಿತು. ಪೌರತ್ವ (ತಿದ್ದುಪಡಿ) ಕಾಯಿದೆಯಿಂದಾಗಿ ಮುಸ್ಲಿಮರು ಪೌರತ್ವ ಕಳೆದುಕೊಳ್ಳುತ್ತಾರೆ ಎಂದು ಹೇಳಿಕೊಂಡು ಮುಸ್ಲಿಂ ಮಹಿಳೆಯರು 2019ರ ಡಿ. 15ರಿಂದ 2020ರ ಮಾ. 24ವರೆಗೆ ಶಾಹೀನ್ ಬಾಗ್​ನಲ್ಲಿ ಹೆದ್ದಾರಿಯಲ್ಲೇ ಧರಣಿ ಕೂತು 101 ದಿನಗಳವರೆಗೆ ಸಂಚಾರಕ್ಕೆ ಅಡ್ಡಿ ಮಾಡಿದರು. ಸಿಎಎಯಿಂದಾಗಿ ಯಾವ ಮುಸ್ಲಿಂ ನಾಗರಿಕನೂ ತನ್ನ ಪೌರತ್ವ ಕಳೆದುಕೊಳ್ಳಲಿಲ್ಲ. 

ಇನ್ನು 2020ರ ನವೆಂಬರ್​ನಿಂದ 2021ರ ಡಿಸೆಂಬರ್​ವರೆಗೆ ನಡೆದ ಕೃಷಿ ಕಾಯಿದೆಗಳ ವಿರುದ್ಧದ ಆಂದೋಲನದಲ್ಲಿ ಆಪ್ ಸರ್ಕಾರದ ಕೇಂದ್ರ ಸರ್ಕಾರ ವಿರೋಧಿ ನೀತಿ ಮತ್ತು ಕಾಂಗ್ರೆಸ್​ನ ಇಬ್ಬಂದಿ ನೀತಿ ಜಗಜ್ಜಾಹೀರಾದವು. ತಾನು ತನ್ನ ಚುನಾವಣಾ ಪ್ರಣಾಳಿಕೆಯಲ್ಲಿ ವಾಗ್ದಾನ ಮಾಡಿದ್ದಂತಹದೇ ಕಾಯಿದೆಗಳನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಾಗ ಕಾಂಗ್ರೆಸ್ ಅದನ್ನು ವಿರೋಧಿಸಿ ಆಂದೋಲನಕಾರರ ಬೆಂಬಲಕ್ಕೆ ನಿಂತಿತು. ಎರಡರಲ್ಲೂ ದೇಶವಿರೋಧಿಗಳು ಕಾರ್ಯನಿರತರಾಗಿದ್ದುದೂ ಕಂಡುಬಂತು. ಸಿಎಎ ವಿರುದ್ಧದ ಧರಣಿಗಳಲ್ಲಿ ದೇಶದ ಭದ್ರತೆಗೆ ಧಕ್ಕೆ ತರುವ ಮಾತುಗಳನ್ನು ಸರ್ಜೀಲ್ ಅಹ್ಮದ್ ಮತ್ತು ಉಮರ್ ಖಾಲಿದ್ ಆಡಿದರು. ಕೃಷಿ ಕಾಯಿದೆಗಳ ವಿರುದ್ಧದ ಆಂದೋಲನದಲ್ಲಿ ಖಲಿಸ್ತಾನಿಗಳು ಆಡಿದ ಆಟಗಳನ್ನು ದೇಶವಿರಲಿ, ಜಗತ್ತೇ ನೋಡಿತು.

ಇಂದು ಕಾಕ್ರೋಚ್ ಜನತಾ ಪಾರ್ಟಿ ಎಂದು ಹೆಸರಿಟ್ಟುಕೊಂಡು ಆಂದೋಲನ ನಡೆಸುತ್ತಿರುವ ಪ್ರೆಷರ್ ಗ್ರೂಪ್​ನ ಪ್ರಮುಖ ನಾಯಕರು ಆಪ್​ನ ಹಳೆಯ ಕಾರ್ಯಕರ್ತರು! ಬೋಸ್ಟನ್ ಯೂನಿವರ್ಸಿಟಿಯಲ್ಲಿ ವ್ಯಾಸಂಗ ಮಾಡಿದೆ ಎಂದು ಹೇಳಿಕೊಳ್ಳುವ ಅಭಿಜಿತ್ ದೀಪ್ಕೆ ಆ ವ್ಯಾಸಂಗದ ಅವಧಿಯಲ್ಲೇ ಭಾರತದಲ್ಲಿ ಆಪ್​ಗಾಗಿ ಕೆಲಸ ಮಾಡುತ್ತಿದ್ದ ವಿವರಗಳು ಹೊರಬಂದಿವೆ. ಅವರು ಮತ್ತವರ ಸಹಚರರಿಗೆ ಕೇಜ್ರಿವಾಲ್ ಬೆಂಬಲ ದೊಡ್ಡದಾಗಿಯೇ ಬಂದಿದೆ. ಜತೆಗೆ ಜಂತರ್​ವುಂತರ್​ನಲ್ಲಿ ಸೇರಿದ್ದವರು ಮೋದಿಯವರನ್ನು ಬೈಯಲೆಂದೇ ಬಂದಿದ್ದರು ಎಂದು ಆಪ್ ನಾಯಕ ಹೇಳಿ ‘ಶಾರ್ಪ್ ಲೇವಡಿ ಕುತಂತ್ರ’ದ ಅನಾವರಣ ಮಾಡಿದ್ದಾರೆ.

ಈ ತಥಾಕಥಿತ ಆಂದೋಲನಕಾರರಿಗೆ ರಾಹುಲ್ ಗಾಂಧಿ ಸಂಸತ್ತಿನ ಹೊರಗೆ ಮತ್ತು ಒಳಗೆ ನೀಡಿದ ಬೆಂಬಲ, ಅದರಿಂದಾಗಿ ಸಂಸತ್​ನ ಮಾನ್ಸೂನ್ ಅಧಿವೇಶನ ಬಾಧಿತವಾದುದನ್ನೂ ನಾವು ನೋಡಿದ್ದೇವೆ. ಒಟ್ಟಾರೆ, ಜಂತರ್ ಮಂತರ್ ಆಂದೋಲನ ನಡೆಸಿದ್ದು ಆಮ್ ಕಾಕ್ರೋಚ್ ಕಾಂಗ್ರೆಸ್. ಈಗ ಈ ‘ಎಸಿಸಿ’ಯೇ ಶಿಕ್ಷಕರ ದಿನದಂದು ತನ್ನ ಆಂದೋಲನದ ಸೀಸನ್-2 ಆರಂಭಿಸುತ್ತದಂತೆ. ರಾಷ್ಟ್ರ ರಾಜಕಾರಣವೂ ವೆಬ್ ಸೀರೀಸ್ ಆಗುತ್ತಿದೆಯೇ? ಇದೆಲ್ಲದರ ಅಂತಿಮ ಗುರಿ ಸೆ. 12-13ರಂದು ದೆಹಲಿಯಲ್ಲಿ ನಡೆಯಲಿರುವ ಬ್ರಿಕ್ಸ್ ಸಮ್ಮೇಳನಕ್ಕೆ ಹಾನಿ ಮಾಡುವುದೇ? ಬ್ರಿಕ್ಸ್ ಬಗ್ಗೆ ಅಧ್ಯಕ್ಷ ಟ್ರಂಪ್​ರ ಹುಚ್ಚು ಕ್ರೋಧವನ್ನು ನಾವು ಕಂಡೇ ಇದ್ದೇವಲ್ಲ? ಇದನ್ನು ಮುಂದಿನವಾರ ವಿಶ್ಲೇಷಿಸೋಣ.