ಕ್ರಿಯೋಜೆನಿಕ್ ತಂತ್ರಜ್ಞಾನಕ್ಕಾಗಿ ಭಾರತ-ಸೋವಿಯೆತ್ ಒಪ್ಪಂದವಾದ ತುಸುವೇ ಸಮಯದಲ್ಲಿ ಸೋವಿಯೆತ್ ಯೂನಿಯನ್ ಕುಸಿದು ಹದಿನೈದು ಚೂರುಗಳಾಗಿ ಇತಿಹಾಸ ಸೇರಿತು. ಆದರೆ ಅದರ ಉತ್ತರಾಧಿಕಾರಿಯಾಗಿ, ಅದರ ಎಲ್ಲ ಅಂತಾರಾಷ್ಟ್ರೀಯ ಒಪ್ಪಂದಗಳನ್ನು ಮುಂದುವರಿಸುವ ಜವಾಬ್ದಾರಿ ಹೊತ್ತುಕೊಂಡ ರಷ್ಯಾ, ಭಾರತದೊಂದಿಗಿನ ಒಪ್ಪಂದಕ್ಕೆ ಅನುಗುಣವಾಗಿ ನಡೆದುಕೊಳ್ಳುವ ನಿರ್ಧಾರ ತೆಗೆದುಕೊಂಡಿತು. ಆದರೆ ಬೈಡೆನ್ಗೆ ಇದು ಸಮ್ಮತವಾಗಲಿಲ್ಲ. ಭಾರತ-ರಷ್ಯಾ ಒಪ್ಪಂದವನ್ನು ‘ಅಪಾಯಕಾರಿ’ ಎಂದು ಬಣ್ಣಿಸಿದ ಬೈಡೆನ್, ಅಮೆರಿಕದಿಂದ ಸಹಾಯಧನ ಮುಂದುವರಿಯಬೇಕಾದರೆ ಭಾರತದೊಂದಿಗಿನ ಒಪ್ಪಂದವನ್ನು ರಷ್ಯಾ ರದ್ದುಗೊಳಿಸಲೇಬೇಕೆಂದು ಆಗ್ರಹಿಸಿದರು ಮತ್ತು ಅದಕ್ಕನುಗುಣವಾಗಿ, ಸಹಾಯಧನಕ್ಕೆ ಸಂಬಂಧಿಸಿದಂತೆ ಸೆನೆಟ್ ತೆಗೆದುಕೊಂಡಿದ್ದ ನಿರ್ಣಯದಲ್ಲಿ ತಿದ್ದುಪಡಿಯಾಗಬೇಕೆಂದು ವಾದಿಸಿ ಮಸೂದೆಯೊಂದನ್ನು ಮಂಡಿಸಿದರು. ಅವರು ಸೂಚಿಸಿದ ತಿದ್ದುಪಡಿಯನ್ನು ಸೆನೆಟ್ ಒಪ್ಪಿಕೊಂಡ ಪರಿಣಾಮವಾಗಿ ಅಮೆರಿಕದ ಸಹಾಯಧನ ಅಥವಾ ಭಾರತದೊಂದಿಗಿನ ಒಪ್ಪಂದಗಳಲ್ಲಿ ಒಂದನ್ನು ಆಯ್ಕೆ ಮಾಡಿಕೊಳ್ಳುವ ಇಕ್ಕಟ್ಟಿಗೆ ಬೋರಿಸ್ ಯೆಲ್ತ್ಸಿನ್ರ ರಷ್ಯಾ ಸಿಲುಕಿತು. ಭಾರತಕ್ಕೆ ತಂತ್ರಜ್ಞಾನ ಮಾರುವುದಿಂದ ಬರಬಹುದಾದ ಹಣಕ್ಕಿಂತಲೂ ಅಮೆರಿಕದಿಂದ ಬರುತ್ತಿದ್ದ ಸಹಾಯಧನ ಅದೆಷ್ಟೋ ಪಟ್ಟು ಅಧಿಕವಾಗಿದ್ದ ಕಾರಣ ಭಾರತದೊಂದಿಗಿನ ಒಪ್ಪಂದವನ್ನು ರಷ್ಯಾ ರದ್ದುಗೊಳಿಸಿತು.
