ಇಷ್ಟಕ್ಕೂ ಕ್ಸಿ ಸುಲಭವಾಗಿ ಈ ಜಾಗಕ್ಕೆ ಬಂದವರೇನಲ್ಲ. ತಂದೆ ಕಮ್ಯುನಿಸ್ಟ್ ಪಾರ್ಟಿಯ ಸದಸ್ಯರಾಗಿದ್ದರು. ಆದರೆ ಭಿನ್ನ ಭಿನ್ನ ಕಾರಣಗಳಿಗೆ ಅವರನ್ನು ಕ್ರಾಂತಿ ವಿರೋಧಿ ಎಂದು ಕರೆದು ಹೊರದಬ್ಬಲಾಗಿತ್ತು. ಕ್ಸಿ ಚಿಕ್ಕ ವಯಸ್ಸಿನಲ್ಲೇ ಪಕ್ಷದ ಸಂಪರ್ಕಕ್ಕೆ ಬಂದರಾದರೂ ನಿಯಮಗಳಿಗೆ ಬದ್ಧರಾಗಿ ನಡೆದುಕೊಳ್ಳಲಾಗದೆ ಕೊಟ್ಟ ಜವಾಬ್ದಾರಿಯಿಂದ ನುಣುಚಿಕೊಂಡಿದ್ದರು. ಹೀಗಾಗಿಯೇ ಕ್ಸಿಗೆ ಹಳ್ಳಿಗಳಲ್ಲಿ ರೈತರೊಂದಿಗೆ ಬದುಕುವ ಶಿಕ್ಷೆ ನೀಡಲಾಗಿತ್ತು. ಅಲ್ಲಿ ಕೆಲಸ ಮಾಡುತ್ತ ನಿಧಾನವಾಗಿ ಮೇಲೇರುತ್ತ ಬಂದ ಕ್ಸಿ ಪಕ್ಷದಲ್ಲಿ ಸ್ಥಾನ ಗಿಟ್ಟಿಸಿಕೊಂಡರು. ಕಾರ್ಯಕ್ಷಮತೆಯಿಂದ ಮೇಲೇರುತ್ತ ಹೋದರು. 2012ರಲ್ಲಿ ಅಧ್ಯಕ್ಷರಾಗಿ ಆಯ್ಕೆಯಾಗುವ ವೇಳೆಗೆ ಕ್ಸಿಗೆ ಅವರ ಅಧಿಕಾರಾವಧಿಯ ಉದ್ದೇಶ ಸ್ಪಷ್ಟವಾಗಿತ್ತು. ಚೀನಾದ ಜನರ ಪ್ರೇಮವನ್ನು ಗಳಿಸಿ ಮಾವೋನಂತೆ ಶಾಶ್ವತವಾದ ಸ್ಥಾನವನ್ನು ಗಿಟ್ಟಿಸಬೇಕು ಎಂದು ನಿಶ್ಚಯಿಸಿಬಿಟ್ಟಿದ್ದರು. ರಷ್ಯಾದಲ್ಲಿ ಗೋರ್ಬಚೇವ್ ಸರ್ಕಾರಿ ಸಂಸ್ಥೆಗಳಲ್ಲಿ ಪಾರದರ್ಶಕತೆಯನ್ನು ತಂದು ಸರ್ಕಾರದ ತಪು್ಪಗಳನ್ನು ಟೀಕಿಸುವ ಅಧಿಕಾರವನ್ನು ಜನರಿಗೆ ಕೊಟ್ಟರಲ್ಲ, ಆ ತಪು್ಪ ಮಾಡಲೇಬಾರದೆಂದು ಜಿನ್ಪಿಂಗ್ ನಿಶ್ಚಯಿಸಿದರು. ಜೊತೆಗೆ ಮಾವೋ ಜನರೊಂದಿಗೆ ಬೆಳೆಸಿಕೊಂಡಿದ್ದ ಭಾವನಾತ್ಮಕ ಸಂಬಂಧವನ್ನು ಬೆಳೆಸಿಕೊಳ್ಳುವ ಮತ್ತು ರಾಷ್ಟ್ರೀಯತೆಯ ಚೈತನ್ಯವನ್ನು ಜಾಗೃತಗೊಳಿಸುವ ಮಾರ್ಗವನ್ನು ಆರಿಸಿಕೊಂಡರು. ಅದಕ್ಕೆಂದೇ ಆರಂಭದಲ್ಲಿಯೇ ಭ್ರಷ್ಟ ಅಧಿಕಾರಿಗಳನ್ನು ಗುರುತಿಸಿ ಹೊರದಬ್ಬುವ ಕೆಲಸ ಆರಂಭಿಸಿದ್ದು. ಕ್ಸಿ ಉದ್ದೇಶ ಸ್ಪಷ್ಟವಾಗಿತ್ತು. ಸರ್ಕಾರ ಕಮ್ಯುನಿಸ್ಟ್ ಪಾರ್ಟಿಯ ಕೈಲಿರಬೇಕು. ಅದಕ್ಕೆ ಕಮ್ಯುನಿಸ್ಟ್ ಪಾರ್ಟಿ ಬಲವಾಗಿರಬೇಕು. ಪಕ್ಷದ ವ್ಯಕ್ತಿಗಳಲ್ಲಿರಬಹುದಾದ ನ್ಯೂನತೆಗಳು ಸರ್ಕಾರದ ಹಿಡಿತ ತಪ್ಪಲು ಕಾರಣವಾಗಬಾರದು. ಹೀಗಾಗಿಯೇ 2019ರ ವೇಳೆಗೆ ಐದೂವರೆ ಲಕ್ಷ ಪಕ್ಷದ ಸದಸ್ಯರ ಮತ್ತು ಸರ್ಕಾರಿ ನೌಕರರ ವಿಚಾರಣೆ ನಡೆಸಿ ಹೆಚ್ಚು-ಕಡಿಮೆ ಐದು ಲಕ್ಷ ಜನರಿಗೆ ಭಿನ್ನ-ಭಿನ್ನ ಸ್ವರೂಪದ ಶಿಕ್ಷೆ ವಿಧಿಸಲಾಗಿತ್ತು. ಹೊರದೇಶಗಳಲ್ಲಿದ್ದ ಸುಮಾರು 800 ಮಂದಿಯನ್ನು ಎಳಕೊಂಡು ಬರಲಾಗಿತ್ತು. ಬಲು ಪ್ರಭಾವಿಯಾಗಿರುವ ಪಾಲಿಟ್ ಬ್ಯೂರೊ ಸದಸ್ಯರನ್ನೂ, ಅವರ ಮಕ್ಕಳನ್ನೂ ಬಿಟ್ಟಿರಲಿಲ್ಲ. ಇದು ಸಹಜವಾಗಿಯೇ ಜನಸಾಮಾನ್ಯರಲ್ಲಿ ಕ್ಸಿ ಬಗೆಗಿನ ಗೌರವವನ್ನು ಹೆಚ್ಚಿಸಿಬಿಟ್ಟಿತು. ಇದರಿಂದಾಗಿಯೇ ಕ್ಸಿ ಹೇರಿದ ಕಠಿಣ ಚೌಕಟ್ಟುಗಳನ್ನು ಜನ ಪ್ರೀತಿಯಿಂದಲೇ ಒಪ್ಪಿಕೊಳ್ಳುವಂತಾಯ್ತು. ಅಧಿಕಾರಕ್ಕೆ ಬರುವ ಮುನ್ನವೇ ತಮ್ಮ ಆಲೋಚನೆ ಸ್ಪಷ್ಟಪಡಿಸಿದ್ದರು ಜಿನ್ಪಿಂಗ್. ನಾಗರಿಕ ಹಕ್ಕುಗಳು, ನ್ಯಾಯ ಸ್ವಾತಂತ್ರ್ಯ, ವೈಯಕ್ತಿಕ ಸ್ವಾತಂತ್ರ್ಯಗಳ ಕುರಿತಂತೆ ಯಾರೂ ಮಾತನಾಡಬಾರದು ಅಂತ. ಅಧ್ಯಕ್ಷರಾದ ಮೇಲೆ ಅದನ್ನು ಬಲವಾಗಿ ಜಾರಿಗೊಳಿಸಿದರು. ಅದಾಗಲೇ ಇಂಟರ್ನೆಟ್ನ ಯುಗ ಬಲಗೊಂಡಿತ್ತು. ಕಮ್ಯುನಿಸ್ಟ್ ಪಕ್ಷ ಗೂಗಲ್, ಫೇಸ್ಬುಕ್, ಇತ್ಯಾದಿಗಳು ಒಳ ಕಾಲಿಡದಂತೆ ನೋಡಿಕೊಂಡಿತು. ಕ್ಸಿ ಅದನ್ನು ಇನ್ನೂ ಹೆಚ್ಚು ಬಲಗೊಳ್ಳುವಂತೆ ಮಾಡಿದರು.
