ಎಲ್ಲ ವರ್ಗದ ಜನರೂ ಅರ್ಥಿಕ ಬೆಳವಣಿಗೆಗೆ ಕೊಡುಗೆ ನೀಡುವ ಕಾರಣಕ್ಕೆ, ಇಂದು ಕಾರ್ಪೊರೇಟ್ ಸಂಸ್ಕೃತಿ ಒಂದೇ ರೀತಿಯ ಮನಸ್ಥಿತಿಗೆ ಸೀಮಿತವಾಗಿಲ್ಲ. ಆದ್ದರಿಂದ ಯಶಸ್ವಿ ಕಾರ್ಪೊರೇಟ್ ನಾಯಕನಾದವನು ನಿಜಕ್ಕೂ ಬಹುಮುಖ ಪ್ರತಿಭೆಯುಳ್ಳವನೂ, ಸಂಕೀರ್ಣ ಪರಿಸ್ಥಿತಿಯಲ್ಲಿ ಮಲ್ಟಿಟಾಸ್ಕ್ ಮಾಡಬಲ್ಲವನೂ ಆಗಿರಬೇಕು. ಯಾವುದೇ ಮನುಷ್ಯ, ವಿಷಮ ಪರಿಸ್ಥಿತಿಯಲ್ಲೂ ಅಧೀರನಾಗದೆ, ದಿನನಿತ್ಯ ಅತಿ ಸಂಕೀರ್ಣ ವಿಷಯಗಳನ್ನು ನಿಭಾಯಿಸಬೇಕೆಂದರೆ, ಆ ಮನುಷ್ಯ ಆಧ್ಯಾತ್ಮಿಕವಾಗಿ ಸಜ್ಜಾಗಿರಬೇಕಾದುದು ಅತ್ಯಂತ ಅವಶ್ಯಕ. ನಾವು ಆಧ್ಯಾತ್ಮಿಕವೆಂದು ಹೇಳುವುದು ಆಂತರಿಕ ಯೋಗಕ್ಷೇಮಕ್ಕಾಗಿ ಇರುವ ತಂತ್ರಜ್ಞಾನವಷ್ಟೆ. ದುರದೃಷ್ಟವಶಾತ್ ತಲೆತಲಾಂತರದಿಂದ ಆಧ್ಯಾತ್ಮಿಕ ಪ್ರಕ್ರಿಯೆಗಳನ್ನು ಉಪದೇಶಿಸುವಾಗ ಸಹಜವಾಗಿ ಸಾಂಸ್ಕೃತಿಕ ಹಾಗೂ ಮತೀಯ ಪ್ರಭಾವಗಳು ಅದರ ಅಂಗವಾಗಿ ಬಿಡುತ್ತವೆ. ಆಧ್ಯಾತ್ಮಿಕ ವಿಜ್ಞಾನಕ್ಕೆ ಅಂಟಿಕೊಂಡ ಈ ಮತೀಯ ಮತ್ತು ಸಾಂಸ್ಕೃತಿಕ ಲೇಪಗಳು, ಕಾರ್ಪೊರೇಟ್ ಜಗತ್ತಿನಲ್ಲಿ ಆಧ್ಯಾತ್ಮಿಕ ವಿಜ್ಞಾನದ ಸ್ವೀಕಾರಕ್ಕೆ ತಡೆಗೋಡೆಯಾಗಿವೆ. ಈ ಸಾಂಸ್ಕೃತಿಕ ಹಾಗೂ ಮತೀಯ ಬಲೆಗಳಿಂದ ಮುಕ್ತವಾದ ಆಧ್ಯಾತ್ಮಿಕ ಪ್ರಕ್ರಿಯೆಯೊಂದು ಇಂದು ಅವಶ್ಯವಿದೆ. ಆಧ್ಯಾತ್ಮಿಕ ಪ್ರಕ್ರಿಯೆಯನ್ನು ಒಂದು ವೇದಾಂತವಾಗಿಯೋ ಅಥವಾ ನಂಬಿಕೆ ವ್ಯವಸ್ಥೆಯಂತೆಯೋ ಕಲಿಸಬೇಕಾಗಿಲ್ಲ. ಸರಳ ವಿಧಾನವಾಗಿ ಅದನ್ನು ನೀಡಬಹುದು, ಅದು ಸಹಜವಾಗಿ ಜೀವನವನ್ನು ಹೆಚ್ಚು ಆಳವಾಗಿ ಎಲ್ಲವನ್ನೂ ಮತ್ತು ಎಲ್ಲರನ್ನೂ ಒಳಗೊಳ್ಳುವಂತೆ ಅನುಭವಿಸಲು ಸಹಕಾರಿ.
