ಹೋಲಿಕೆ ಮಾಡುವುದು ವ್ಯರ್ಥ: ದೊಡ್ಡ ದೊಡ್ಡ ಸಾಧಕರೊಂದಿಗೆ ಹೋಲಿಕೆ ಮಾಡಿ ಸಮಯ ವ್ಯರ್ಥ ಮಾಡುವ ಬದಲು, ನಮ್ಮ ಸಾಮರ್ಥ್ಯ, ಅನುಭವಕ್ಕೆ ಅನುಗುಣವಾಗಿ ಜೀವನದಲ್ಲಿ ಸಾಧನೆ ಮಾಡಲು ಕನಸು ಕಂಡರೆ ಅದು ಫಲಿಸುತ್ತದೆ. ನಾವು ವ್ಯಾಸಂಗ ಮಾಡಿರುವ, ಹೆಚ್ಚಿನ ಅನುಭವವಿರುವ ಕ್ಷೇತ್ರದಲ್ಲಿ ಹೊಸದಾಗಿ ಯಾವುದೋ ಸಾಧನೆ ಮಾಡುತ್ತೇವೆ ಎಂದರೆ ಅದಕ್ಕೆ ಹೆಚ್ಚಿನ ಮೌಲ್ಯವಿರುತ್ತದೆ. ತಾನು ಅನುಭವ ಹೊಂದಿರುವ ಕ್ಷೇತ್ರ ಬಿಟ್ಟು, ಮನಸ್ಸಿಗೆ ತೋಚಿದ ಇನ್ಯಾವುದೋ ಮಾರ್ಗದಲ್ಲಿ ಹೊಸ ಸಾಧನೆ ಮಾಡುತ್ತೇನೆ ಎಂದರೆ ಅದು ಕಷ್ಟಸಾಧ್ಯ. ಸಜ್ಜನರ ಸಹವಾಸದಿಂದ ಜೀವನದಲ್ಲಿ ಬದಲಾವಣೆ ಕಾಣಬಹುದು. ಏಕೆಂದರೆ, ಸಜ್ಜನರು ಮಾತ್ರ ನಮ್ಮನ್ನು ಸನ್ಮಾರ್ಗದಲ್ಲಿ ತೆಗೆದುಕೊಂಡು ಹೋಗುತ್ತಾರೆ. ಇದರಿಂದ ಕಾಲಕ್ರಮೇಣ ಚಿಂತನೆಗಳ ದಿಕ್ಕೂ ಬದಲಾಗುತ್ತದೆ. ದುರ್ಜನರ ಸಂಗದಿಂದ ಮನಸ್ಸು ಕೆಟ್ಟ ಹಾದಿ ತುಳಿಯುತ್ತದೆ.
