ಹೀಗೆ ಮಾಡಿ: ಕರೊನಾ ತಂದ ಈ ಬಿಕ್ಕಟ್ಟು ಮಕ್ಕಳೊಂದಿಗೆ ಇರುವ ಅವಕಾಶವನ್ನು ಕಲ್ಪಿಸಿದೆ ಎಂದುಕೊಳ್ಳಬೇಕು. ಮಕ್ಕಳಿಗೆ ಹೆಚ್ಚು ಪೋಷಕಾಂಶಯುಕ್ತ ಆಹಾರವನ್ನು ತಿನ್ನಿಸಬೇಕು. ಮನೆಯಲ್ಲಿಯೇ ಮಾಡಿದ ಅಡುಗೆ, ಪಾನೀಯಗಳು ಆರೋಗ್ಯಕ್ಕೆ ಹಿತ ಎನ್ನುವುದನ್ನು ಮಕ್ಕಳಿಗೆ ಮನವರಿಕೆ ಮಾಡಬೇಕು. ಮೂರ್ನಾಲ್ಕು ವರ್ಷ ಮೇಲ್ಪಟ್ಟ ಮಕ್ಕಳಿಗೆ ರೋಗದ ಅನಾಹುತದ ಬಗ್ಗೆ ಅವರಿಗೆ ಅರ್ಥವಾಗುವ ಭಾಷೆಯಲ್ಲಿ ತಿಳಿಸಿಕೊಡಬೇಕು. ಮಕ್ಕಳೊಂದಿಗೆ ಒಳಾಂಗಣ ಕ್ರೀಡೆ, ಪೇಂಟಿಂಗ್, ಹಾಡು, ಕುಣಿತ.. ಹೀಗೆ ಮಕ್ಕಳ ಆಸಕ್ತಿಗೆ ಪೂರಕವಾದ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳಬೇಕು. ಹಿರಿಯರ ಜತೆ ಮನಸ್ತಾಪಗಳಿದ್ದರೆ ಅದನ್ನು ಮರೆತು ಫೋನ್ ಮೂಲಕವಾದರೂ ಮತ್ತೆ ಬಾಂಧವ್ಯ ವೃದ್ಧಿಸಿ ಕೊಳ್ಳಬೇಕು. ತಾವು ಸಮಾನ ಮನಸ್ಕ ಸ್ನೇಹಿತೆಯರಿದ್ದರೆ, ಪರಿಚಿತರಿದ್ದರೆ, ಫೋನಲ್ಲಿ ಆಗಾಗ ಮಾತಾಡಿಸುತ್ತಿರಬೇಕು. ಸುನಾಮಿ ನೆರೆಹಾವಳಿ.. ಹೀಗೆ ಸಾವಿನ ಆತಂಕ ಹೆಚ್ಚಾದಾಗಲೆಲ್ಲ ಮನುಷ್ಯತ್ವ ಮುನ್ನೆಲೆಗೆ ಬಂದಿದೆ. ಈಗಲೂ ಹಾಗಾಗಬೇಕು. ಅಮ್ಮಂದಿರೇ, ಕರೊನಾ ಆತಂಕವನ್ನು ಎಚ್ಚರಿಕೆಯಿಂದ ಎದುರಿಸಿ. ಮಳೆಗಾಲದಲ್ಲಿ ಬಗ್ಗಡವಾದ ನೀರು ನಿಧಾನವಾಗಿ ತಿಳಿಯಾಗುತ್ತದೆ. ಪರಿಸ್ಥಿತಿ ನಿರಾತಂಕವಾಗುವವರೆಗೂ ಸಂಯಮದಿಂದಿದ್ದು ಮಕ್ಕಳನ್ನು ಈ ಮಹಾಮಾರಿಯಿಂದ ಬಚಾವ್ ಮಾಡಿ.
