ಸ್ಟಾರ್ಟಪ್ ಫಂಡಿಂಗ್ ಸೂಕ್ತ ಆಯ್ಕೆ ಹೇಗೆ?

ಭಾರತದಲ್ಲಿ ಸ್ಟಾರ್ಟಪ್ ಕ್ಷೇತ್ರ ಕ್ಷಿಪ್ರವಾಗಿ ಬೆಳೆಯುತ್ತ ಸಾಗಿದೆ. ಇದುವರೆಗೆ ದೇಶದಲ್ಲಿ 57 ಸಾವಿರಕ್ಕೂ ಹೆಚ್ಚು ಸ್ಟಾರ್ಟಪ್​ಗಳು ಶುರುವಾಗಿವೆ. ಒಂದೊಮ್ಮೆ ನೀವು ಕೂಡ ಸ್ಟಾರ್ಟಪ್ ಅಥವಾ ನವೋದ್ಯಮ ಸ್ಥಾಪಿಸಲು ಉದ್ದೇಶಿಸಲು ಬಯಸಿದರೆ, ಅದಕ್ಕೆ ಧನ ಸಂಪನ್ಮೂಲ ಹೊಂದಿಸಲು ಪ್ರಯತ್ನಿಸುವುದೇ ಆದರೆ, ಕೆಲವೊಂದು ಪ್ರಾಥಮಿಕ ಮಾಹಿತಿಗಳು ನಿಮಗೆ ತಿಳಿದಿರಬೇಕು. ಸ್ಟಾರ್ಟಪ್ ಫಂಡಿಂಗ್ ಆಯ್ಕೆಗಳ ವಿಚಾರದಲ್ಲಿರುವ ವಿಭಿನ್ನತೆಯನ್ನು ಅರ್ಥಮಾಡಿಕೊಂಡಿರಬೇಕು. ಈ ಮಾಹಿತಿ ಮತ್ತು ತಿಳಿವಳಿಕೆ ಇದ್ದಾಗ ಮಾತ್ರವೇ ಸ್ಟಾರ್ಟಪ್​ಗೆ ಅಗತ್ಯವಾದ ಸೂಕ್ತ ಫಂಡಿಂಗ್ ಆಯ್ಕೆಯನ್ನು ಆರಿಸಿಕೊಳ್ಳುವುದಕ್ಕೆ ಸಾಧ್ಯವಿದೆ. ಇದಕ್ಕೆ ಹೊರತಾಗಿ, ಸ್ವಂತ ಉಳಿತಾಯ ಮತ್ತು ಸಂಬಂಧಿಕರ ಹಣಕಾಸು ನೆರವು ಪಡೆದು ಹೂಡಿಕೆ ಮಾಡುವುದು ಮತ್ತು ಇನ್ನೂ ಹಲವು ಅವಕಾಶಗಳಿವೆ.

ಏಂಜೆಲ್ ಫಂಡಿಂಗ್

ನವೋದ್ಯಮ ಆರಂಭಿಸುವ ಸಂದರ್ಭದಲ್ಲಿ ಹಣಕಾಸಿನ ಅವಶ್ಯಕತೆ ಪೂರೈಸುವುದಕ್ಕೆ ಲಭ್ಯವಿರುವುದೇ ಏಂಜೆಲ್ ಫಂಡ್. ಇಲ್ಲಿ ವ್ಯಾಪಾರೋದ್ಯಮದ ಚಿಂತನೆಯನ್ನು ಮೆಚ್ಚಿ, ಅದರ ಸಾಧಕ ಬಾಧಕಗಳನ್ನು ವಿಶ್ಲೇಷಿಸಿ ಏಂಜೆಲ್ ಫಂಡಿಂಗ್ ಕಂಪನಿಯು ಅದರ ಮೇಲೆ ಹೂಡಿಕೆ ಮಾಡುತ್ತದೆ. ಅರ್ಬನ್ ಕಂಪನಿ, ಓಲಾ, ಸ್ನಾ್ಯಪ್​ಡೀಲ್ ಮುಂತಾದ ನವೋದ್ಯಮಗಳು ಏಂಜೆಲ್ ಫಂಡಿಂಗ್ ನೆರವಿನೊಂದಿಗೆ ವ್ಯವಹಾರ ಶುರುಮಾಡಿದ್ದವು. ಏಂಜೆಲ್ ಫಂಡಿಂಗ್ ಮಾಡುವವರು ಇಂತಹ ಕಂಪನಿಗಳಲ್ಲಿ ಗರಿಷ್ಠ ಶೇಕಡ 30ರ ತನಕ ಈಕ್ವಿಟಿ ಷೇರುಗಳನ್ನು ಕೇಳುವ ಸಾಧ್ಯತೆ ಇರುತ್ತದೆ.

ಡೆಟ್ ಫಂಡಿಂಗ್

ಯಂತ್ರೋಪಕರಣಗಳ ಖರೀದಿ, ಪ್ರಚಾರ ಅಭಿಯಾನ ಮುಂತಾದ ಕಂಪನಿಯ ವಿಶೇಷ ಕಾರ್ಯಗಳಿಗೆ ಬಳಸುವುದಕ್ಕೆ ಹಣಕಾಸಿನ ಅವಶ್ಯಕತೆ ಬರುವುದು ಸಹಜ. ಇಂತಹ ಸಂದರ್ಭದಲ್ಲಿ ನೆರವಿಗೆ ಬರುವುದೇ ಡೆಟ್ ಫಂಡಿಂಗ್. ಇದು ಒಂದು ರೀತಿಯ ಸಾಲದ ರೂಪದಲ್ಲಿ ಬಂಡವಾಳವನ್ನು ಪಡೆದುಕೊಳ್ಳುವುದಾಗಿದೆ. ಅಪಾಯದಿಂದ ತಪ್ಪಿಸಿಕೊಳ್ಳಲು ಹೂಡಿಕೆದಾರರು ಈ ರೀತಿ ಮಾಡುವುದಿದೆ. ವೆಂಚರ್ ಕ್ಯಾಪಿಟಲ್ ಫಂಡಿಂಗ್ ಮಾಡುವವರು ಇಂತಹ ಡೆಟ್ ಫಂಡ್ ನೆರವನ್ನು ನೀಡುತ್ತಾರೆ.

ವೆಂಚರ್ ಫಂಡಿಂಗ್

ಸ್ಟಾರ್ಟಪ್ ಫಂಡಿಂಗ್​ನ ವಿಚಾರದಲ್ಲಿ ಸರಿಯಾದ ಸಮಯದಲ್ಲಿ ಸರಿಯಾದ ಫಂಡಿಂಗ್ ಪಡೆದುಕೊಳ್ಳುವುದು ಅತೀಅವಶ್ಯವಾಗಿರುತ್ತದೆ. ಪ್ರಸ್ತುತ ನವೋದ್ಯಮಗಳ ವಿಸ್ತರಣೆಗಾಗಿಯೇ ವೆಂಚರ್ ಕ್ಯಾಪಿಟಲ್ ಫಂಡಿಂಗ್ ಆಯ್ಕೆ ಲಭ್ಯವಿದೆ. ಫ್ಲಿಪ್​ಕಾರ್ಟ್, ಬುಕ್ ಮೈ ಶೋ ಮುಂತಾದ ನವೋದ್ಯಮಗಳು ಇಂತಹ ವೆಂಚರ್ ಕ್ಯಾಪಿಟಲ್ ಫಂಡಿಂಗ್ ನೆರವು ಪಡೆದು ತಮ್ಮ ವ್ಯವಹಾರ ವಿಸ್ತರಣೆ ಮಾಡಿಕೊಂಡಿವೆ. ಇದರಲ್ಲಿ ಗಮನಿಸಬೇಕಾದ ಅಂಶ ಎಂದರೆ, ಇಂತಹ ವೆಂಚರ್ ಕ್ಯಾಪಿಟಲ್ ಫಂಡಿಂಗ್ ಅನ್ನು ಮೂರರಿಂದ ಐದು ವರ್ಷದ ಅವಧಿಯಲ್ಲಿ ಕಂಪನಿಗಳು ಹಿಂದಕ್ಕೆ ನೀಡಬೇಕಾಗುತ್ತದೆ.

ಕ್ರೌಡ್ ಫಂಡಿಂಗ್

ಸ್ಟಾರ್ಟಪ್​ಗಳಿಗೆ ಹಣಕಾಸಿನ ನೆರವು ಒದಗಿಸುವ ಒಂದು ಆಯ್ಕೆ ಕ್ರೌಡ್ ಫಂಡಿಂಗ್. ಕೆಟೋ, ವಿಶ್​ಬೆರ್ರಿ, ಫಂಡ್​ಲೈನ್ಡ್ ಮುಂತಾದ ವೇದಿಕೆಗಳು ಇದನ್ನು ಒದಗಿಸುವ ನಿಟ್ಟಿನಲ್ಲಿ ನವೋದ್ಯಮಗಳಿಗೆ ನೆರವು ನೀಡುತ್ತವೆ. ಈ ನೆರವು ಪಡೆದುಕೊಳ್ಳಲು ನವೋದ್ಯಮ ಆರಂಭಿಸುವವರು ತಮ್ಮ ಚಿಂತನೆಗಳನ್ನು ಕ್ರೌಡ್ ಫಂಡಿಂಗ್ ವೇದಿಕೆಗಳಲ್ಲಿ ನಮೂದಿಸಬೇಕು. ಹಣಕಾಸಿನ ನೆರವಿಗಾಗಿ ಮನವಿ ಮಾಡಬೇಕು. ಈ ರೀತಿ ಪಡೆದುಕೊಂಡ ಹಣವನ್ನು ಯಾವ ರೀತಿ, ಯಾವ ಉದ್ದೇಶಕ್ಕೆ ಬಳಸಲಾಗುತ್ತದೆ ಎಂಬ ವಿವರವನ್ನೂ ವೆಬ್​ಸೈಟ್​ನಲ್ಲಿ ನೀಡಬೇಕು. ನಿಮ್ಮ ಯೋಜನೆ ಇಷ್ಟವಾದವರು ಇದರಲ್ಲಿ ಹೂಡಿಕೆ ಮಾಡುತ್ತಾರೆ.

https://www.vijayavani.net/vehicles-glassed-damaged-reason-is-the-one-who-was-sending-messages-to-rowdys-wife/

https://www.vijayavani.net/pdo-who-mis-used-gok-software-is-suspended/