ಐಚ್ಛಿಕ ಉಪವಾಸದ ತಿಂಗಳು: ಮೊಹರಂ ತಿಂಗಳ 9 ಹಾಗೂ 10ನೇ ದಿವಸದಂದು ಮುಸ್ಲಿಂರು ಐಚ್ಛಿಕ ಉಪವಾಸವನ್ನು ಆಚರಿಸುತ್ತಾರೆ. ಈ ಉಪವಾಸಕ್ಕೂ ಹಿನ್ನೆಲೆ ಇದೆ. ಪ್ರವಾದಿ ಮುಹಮ್ಮದರು ಮಕ್ಕಾ ಪಟ್ಟಣದಿಂದ ಮದೀನಾಕ್ಕೆ ಹಿಜಿರಾ(ವಲಸೆ) ಬಂದಾಗ ಮದೀನಾ ನಗರದ ಯಹೂದಿಗಳು ‘ಅಶೂರ’ ದಿನ (ಮೊಹರಂ ತಿಂಗಳ 10ನೇ ದಿನ) ಉಪವಾಸ ಆಚರಿಸುತ್ತಿದ್ದರು. ಯಾವ ಕಾರಣಕ್ಕಾಗಿ ಅವರು ಉಪವಾಸ ಆಚರಿಸುತ್ತಿದ್ದಾರೆ ಎಂದು ಮುಹಮ್ಮದ್ ಪೈಗಂಬರರು ಕೇಳಿದಾಗ ಆ ದಿನದಂದು ಪ್ರವಾದಿ ಮೂಸ (ಮೋಶೆ) ಹಾಗೂ ಅವರ ಅನುಯಾಯಿಗಳನ್ನು ಸರ್ವಾಧಿಕಾರಿ, ಕ್ರೂರ ಆಡಳಿತಗಾರನಾಗಿದ್ದ ಫರೋವಾನ ಕಿರುಕುಳದಿಂದ ದೇವನು ವಿಮೋಚನೆಗೊಳಿಸಿದ. ಈ ಕಾರಣಕ್ಕೆ ದೇವನಿಗೆ ಕೃತಜ್ಞತೆ ಸಲ್ಲಿಸಲು ಪ್ರವಾದಿ ಮೋಶೆ ಉಪವಾಸ ಆಚರಿಸಿದರು ಎಂದು ತಿಳಿಸಿದಾಗ ಪ್ರವಾದಿ ಮುಹಮ್ಮದರು ಸ್ವಯಂ ತಾವು ಉಪವಾಸವಿದ್ದುದಲ್ಲದೆ ತಮ್ಮ ಸಮುದಾಯಕ್ಕೆ ಅದನ್ನು ಆಚರಿಸಲು ತಿಳಿಸಿದರು. ಮಾತ್ರವಲ್ಲ, ಮೊಹರಂ ತಿಂಗಳ 9 ಮತ್ತು 10ನೇ ದಿವಸದ ಉಪವಾಸ ಗತವರ್ಷದ ಪಾಪಗಳಿಗೆ ಪ್ರಾಯಶ್ಚಿತವಾಗಿದೆ ಎಂದು ತಿಳಿಸಿದ್ದಾರೆ.
