ನಾನು ಬರೆಯುತ್ತಿರುವ ಒಂದೊಂದು ವಾಕ್ಯವನ್ನೂ ಪ್ರಪಂಚದ ಯಾವ ವೇದಿಕೆಯಲ್ಲಾದರೂ ಸಾಬೀತುಪಡಿಸಬಲ್ಲೆ. ವಿದೇಶಗಳಲ್ಲಿ, ಸ್ವದೇಶದಲ್ಲಿ ಮತ್ತು ಹಲವಾರು ಸಭೆಗಳಲ್ಲಿ ಈ ಮಾತು ಹೇಳಿದ್ದೇನೆ. ಮುಂದೆ ಸ್ವಾಮಿ ವಿವೇಕಾನಂದರೆಂದು ಪ್ರಸಿದ್ಧರಾದ ಯುವಕ ನರೇಂದ್ರ ತಾನು ಅಧ್ಯಯನ ಮಾಡಿದ ಅದರಲ್ಲೂ ಧರ್ಮದ ಬಗ್ಗೆ ತನ್ನ ಗಮನಕ್ಕೆ ಬಂದ ಪ್ರತಿ ಪದ, ವಾಕ್ಯವನ್ನೂ ನೂರು ದೃಷ್ಟಿಕೋನಗಳಿಂದ ಸಂದೇಹಿಸಿ, ಪ್ರಶ್ನಿಸಿ, ವಿಶ್ಲೇಷಿಸಿ, ಪರಿಶೀಲನೆ ಮಾಡಿ ಒಪ್ಪಿಗೆ ಮುದ್ರೆ ಕೊಟ್ಟವನು. ನಮ್ಮ ಇಂದ್ರಿಯಗಳೇ ನಮಗೆ ಮೋಸ ಮಾಡುತ್ತವೆ. ನಮ್ಮ ಮನಸ್ಸೇ ನಮ್ಮನ್ನು ಭ್ರಾಂತಿಗೆ ತಳ್ಳುತ್ತದೆ ಎಂಬ ವೇದಾಂತ ಹಾಗೂ ಪಾಶ್ಚಾತ್ಯ ವಿದ್ವಾಂಸರ ಅನಿಸಿಕೆಯನ್ನು ನೂರಕ್ಕೆ ನೂರು ಆಧಾರವಾಗಿಟ್ಟುಕೊಂಡು ಪ್ರತಿಯೊಂದನ್ನೂ ಅಧ್ಯಯನ ಮಾಡಿದವನು. ರಾಮಕೃಷ್ಣರು ಅವನ ಕೈಯಲ್ಲಿ ಅಷ್ಠಾವಕ್ರ ಸಂಹಿತೆ ಓದಿಸಿದಾಗ ಅವರ ಮುಂದೆಯೇ ಆ ಚಿಂತನೆಯನ್ನು ಹಂಗಿಸಿ ಅವರಿಗೇ ಸವಾಲೆಸೆಯುವಂತೆ ನಕ್ಕಿದವನು. ಅವನ ಉದ್ದೇಶ ಕೇವಲ ಸತ್ಯಾನ್ವೇಷಣೆ! ಯಾವುದೋ ಪುಸ್ತಕದಲ್ಲಿದೆ; ಯಾರೋ ಮಹಾತ್ಮ ಹೇಳಿದ್ದಾರೆ ಎನ್ನುವುದು ಲೆಕ್ಕಕ್ಕೇ ಇಲ್ಲ ಅವನಿಗೆ. ಅಂಥ ವಿವೇಕಾನಂದರು ಕೊನೆಗೆ ಸಂಪೂರ್ಣವಾಗಿ ಶರಣಾಗಿದ್ದು ವೇದಾಂತ ಅಥವಾ ಅದರ ಭಾರತೀಯ ಆವೃತ್ತಿ (version) ಆದ ಹಿಂದೂಧರ್ಮಕ್ಕೆ. ಕಾರಣವಿಷ್ಟೇ! ಅದರ ಮಿತಿಯಿಲ್ಲದ ವ್ಯಾಪ್ತಿ (range) ಹುಬ್ಬೇರಿಸುವ ತರ್ಕಬದ್ಧತೆ (rationality) ಮತ್ತು ಮುದವೇರಿಸುವ ಸಾರ್ವತ್ರಿಕತೆ (universality), ಚಿಕಾಗೋ ಪಾರ್ಲಿಮೆಂಟಿನ ಕೊನೆಯ ಉಪನ್ಯಾಸದಲ್ಲಿ ವಿಶ್ವಧರ್ಮವೊಂದರ ಲಕ್ಷಣಗಳೇನು ಎಂಬುದನ್ನು ಸ್ಪಷ್ಟವಾಗಿ ವಿಷದಪಡಿಸುತ್ತಾರೆ. ಅದನ್ನು ಓದಿದವರಿಗೆ ಒಮ್ಮೆಲೆ ಅರ್ಥವಾಗುವುದು ಅವರು ’ಹಿಂದೂಧರ್ಮ’ವನ್ನು ಕುರಿತೇ ಪ್ರಸ್ತುತಪಡಿಸುತ್ತರುವುದು; ಹೆಸರನ್ನು ಹೇಳುತ್ತಿಲ್ಲ ಅಷ್ಟೇ ಎಂದು. ಇಲ್ಲದಿದ್ದಲ್ಲಿ ತಮ್ಮ ಲಾಹೋರ್ ಉಪನ್ಯಾಸದಲ್ಲಿ ನಾನು ಹಿಂದೂ ಎಂದು ಹೇಳಿಕೊಳ್ಳುವುದೇ ನನಗೊಂದು ಹೆಮ್ಮೆ. ಜಗತ್ತು ಎಂದೂ ಇನ್ನೆಲ್ಲಿಯೂ ಕಾಣದ ಮಹಾಮಹಿಮ ಋಷಿಗಳ ವಂಶಕ್ಕೆ ಸೇರಿದ ನೀವು ನನ್ನ ಬಾಂಧವರಾಗಿರುವುದೇ ನನಗೊಂದು ಹೆಮ್ಮೆ. ಆದ್ದರಿಂದ ಆತ್ಮಶ್ರದ್ಧೆ ಉಳ್ಳವರಾಗಿ ನಿಮ್ಮ ಹಿರಿಯರಿಂದ ನಿಮಗೆ ಅಪಕೀರ್ತಿ ತಾಗಿತೆನ್ನದಿರಿ. ಅವರಿಂದ ನಿಮಗೆ ಕೀರ್ತಿ ಬಂದಿತೆಂದು ಹೆಮ್ಮೆಪಡಿ ಎಂದು ಹೇಳುತ್ತಿರಲಿಲ್ಲ. ಅಷ್ಟೇ ಅಲ್ಲ ಮುಂದುವರೆದು ಸಂಪ್ರದಾಯಗಳಿಗಾಗಲಿ ಜನರಿಗಾಗಲಿ ಗಮನಕೊಡದೆ ‘ಹಿಂದೂ’ ಎಂಬ ಹೆಸರನ್ನು ತಾಳಿದ ಪ್ರತಿಯೊಬ್ಬರ ಮಹತ್ವವನ್ನು ತಿಳಿದು ಅವನನ್ನು ಆಲಂಗಿಸಿ, ಯಾವುದೇ ದೇಶಕ್ಕೆ ಸೇರಿದವರಾಗಲಿ, ಯಾವುದೇ ಭಾಷೆಯನ್ನು ಮಾತನಾಡುತ್ತಿರಲಿ ಹಿಂದೂ ಎಂಬ ಹೆಸರನ್ನು ಹೊತ್ತವನು ನಮಗೆ ಅತ್ಯಂತ ನಿಕಟನೂ, ಪ್ರಿಯನೂ ಆದಾಗ ಮಾತ್ರ ನೀವು ಹಿಂದೂಗಳು! ಎಂದು ’ಹಿಂದೂ’ ಎಂಬ ಹೆಸರನ್ನು ಕೇಳಿದ ತಕ್ಷಣ ನಮ್ಮಲ್ಲಿ ಶಕ್ತಿ ಉದ್ಭವಿಸುವುದೋ, ಎಂದು ಆ ಹೆಸರಿನಿಂದ ಜೀವಿಸುತ್ತಿರುವ ಪ್ರತಿಯೊಂದರ ಸಂಕಟವೂ ನಿಮ್ಮ ಮನಸ್ಸನ್ನು ತಾಗಿ ನಿಮ್ಮ ಪುತ್ರನ ಸಂಕಟ ನಿಮಗೆ ಎಷ್ಟು ವ್ಯಥೆಯನ್ನುಂಟುಮಾಡುವುದೋ ಅಷ್ಟೇ ವ್ಯಥೆಯನ್ನುಂಟು ಮಾಡುವುದೋ ಆಗ ನೀವು ನಿಜವಾದ ಹಿಂದೂಗಳು ಎಂದೂ ತಮ್ಮ ಅದೇ ಉಪನ್ಯಾಸದಲ್ಲಿ ಅಬ್ಬರಿಸುತ್ತಿರಲಿಲ್ಲ! ಕಾರಣವೇನು? ವಿಶ್ವಮಾನವನ ಈ ಅನನುಕರಣೀಯ ರಾಷ್ಟ್ರಪ್ರೇಮದ ಹಿಂದಿನ ನಾಡಿ ಮಿಡಿತ ಯಾವುದು ಎಂದು ವಿಶ್ಲೇಷಿಸಿದರೆ ಅವರೇ ಹೇಳುವಂತೆ ಇಡೀ ಮಾನವ ಜನಾಂಗಕ್ಕೆ ಅತ್ಯಂತ ಉತ್ಕೃ್ಟವಾದ, ಉನ್ನತವಾದ, ಶಾಶ್ವತವಾದ ಉದ್ಧಾರದ ನಾಡಿಯನ್ನು ನಿರ್ವಿುಸಿ ಕೊಡುಗೆಯನ್ನಾಗಿ ನೀಡಿದ ಜನಾಂಗ ಹಿಂದೂವಿನದ್ದು. ಇಡೀ ಮಾನವ ಜನಾಂಗಕ್ಕೆ! ಕೇವಲ ತಮ್ಮ ಜನರಿಗಾಗಿ ಅಲ್ಲ!!
