ಮಹಿಳೆ ಮಾನವೀಯತೆಯ ಶಕ್ತಿಯಾಗಿ, ಸಮಾಜದ ಕನ್ನಡಿಯಾಗಿ, ಆಡಳಿತ ಚತುರೆಯಾಗಿ, ಅಗತ್ಯ ಬಂದಾಗ ದೇಶದ ಮಗಳಾಗಿ, ನೆಲದ ರಕ್ಷಕಿಯಾಗಿ ದೇಶ ರಕ್ಷಣೆಯಲ್ಲೂ ಹಿಂದೆ ಬಿದ್ದಿಲ್ಲ ಎಂದು ತೋರಿಸಿಕೊಟ್ಟವಳು. ಅಂದು, ಇಂದು, ಎಂದೆಂದೂ ತಾನು ಕೇವಲ ನಾಲ್ಕು ಗೋಡೆಯ ಮಧ್ಯೆ ಇದ್ದ ಕಾಲದಲ್ಲಿಯೂ ದೇಶಕ್ಕಾಗಿ ಪ್ರಾಣದ ಹಂಗು ತೊರೆದು ಹೋರಾಡಿದ ಮಹಿಳೆಯರು, ತೊಟ್ಟಿಲು ತೂಗುವ ಕೈ ದೇಶವನ್ನು ಆಳಬಲ್ಲದು ಎಂದು ಸಾಬೀತುಪಡಿಸಿದ ಮಹಿಳೆಯರು ಇತಿಹಾಸದಲ್ಲಿ ಆಗಿಹೋಗಿದ್ದಾರೆ. ಅದರಲ್ಲಿ ಕರ್ನಾಟಕದ ಮಹಿಳೆಯರೂ ಇದ್ದಾರೆ. ಅವರ ಸಾಧನೆಯೇನು ಎಂಬುದನ್ನು ಸಂಕ್ಷಿಪ್ತವಾಗಿ ಗಮನಿಸೋಣ. ಇತಿಹಾಸದಲ್ಲಿ ಮಹಿಳೆಯರು ಅಂದಾಕ್ಷಣ ನೆನಪಿಗೆ ಬರುವವರು ಸ್ವಾತಂತ್ರ್ಯಕ್ಕಾಗಿ, ತಮ್ಮನೆಲ, ಸಂಸ್ಕೃತಿಯನ್ನು ಉಳಿಸಲು ಉಸಿರಿರುವವರೆಗೆ ಹೋರಾಡಿದ ಉಳ್ಳಾಲದ ರಾಣಿ ಅಬ್ಬಕ್ಕ, ಕಿತ್ತೂರ ಚೆನ್ನಮ್ಮ, ಬೆಳವಡಿ ಮಲ್ಲಮ್ಮ, ಕೆಳದಿ ಚೆನ್ನಮ್ಮ, ಒನಕೆ ಓಬವ್ವ ಮೊದಲಾದವರು. ಒಬ್ಬೊಬ್ಬರದೂ ಒಂದೊಂದು ಕಥೆಯಾದರೂ ಉದ್ದೇಶ ಮಾತ್ರ ಒಂದೇ. ಅದು ರಾಜ್ಯದ ರಕ್ಷಣೆ, ಪ್ರಜೆಗಳ ರಕ್ಷಣೆ. ಅಲ್ಲಿಂದ ಮುಂದುವರಿದು ದೇಶದ ಸ್ವಾತಂತ್ರ್ಯಕ್ಕಾಗಿ ಹೋರಾಟ. ಹೆಣ್ಣು ಯಾರಿಗೇನೂ ಕಡಿಮೆ ಇಲ್ಲ ಎಂದು ದಿಟ್ಟತನದಿಂದ ಹೋರಾಡಿ ದೇಶಕ್ಕಾಗಿ ಪ್ರಾಣ ತೆತ್ತವರು. ಅವರೆಲ್ಲರೂ ಸ್ತ್ರೀಸಂಕುಲಕ್ಕೆ ಮಾದರಿ.
