ಕರೊನಾ ಹಿನ್ನೆಲೆಯಲ್ಲಿ ಶಾಲೆಗಳಿಗೆ ಮಕ್ಕಳು ಬಾರದೆ, ಬಹುತೇಕ ಶಾಲೆಗಳ ಆವರಣ ಕಸ-ಕಡ್ಡಿಯಿಂದ ತುಂಬಿದೆ ಎಂಬ ಮಾತು ಎಲ್ಲೆಡೆ ಸಾಮಾನ್ಯ. ಆದರೆ, ಶಿವಮೊಗ್ಗ ಜಿಲ್ಲೆ ಹೊಸನಗರ ತಾಲೂಕಿನ ಆನೆಗದ್ದೆ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಮಾತ್ರ ಈ ಮಾತಿಗೆ ವಿರುದ್ಧ. ಇದು ವರ್ಷದ 365 ದಿನವೂ ಯಾವುದೋ ಉತ್ಸವಕ್ಕೆ ಶೃಂಗರಿಸಿದ ದೇವಾಲಯದಂತೆ ಭಾಸವಾಗುತ್ತದೆ. ಶಾಲೆಯನ್ನು ಪ್ರವೇಶಿಸುತ್ತಿದ್ದಂತೆ ಸರಸ್ವತಿ ದೇವಿಯ ದರ್ಶನ, ಹಚ್ಚಹಸಿರ ಬಳ್ಳಿ, ಹೂವುಗಳಿಂದ ಕಂಗೊಳಿಸುತ್ತಿದೆ. ಹಾಗೆಯೇ ಮುಂದೆ ಸಾಗಿದರೆ ಮಡಕೆಗಳಲ್ಲಿ ಹರಿಯುತ್ತಿರುವ ನೀರು, ತಾಯಿ-ಮಗು ವನ, ದಾರಿಯುದ್ದಕ್ಕೂ ಜ್ಞಾನದ ಫಲಕ, ಕೊಠಡಿಯೊಳಗೆ ನಲಿಕಲಿ... ಎತ್ತ ಕಣ್ಣು ಹಾಯಿಸಿದರೂ ಜ್ಞಾನ ಸಂಪತ್ತು ಕೈಬೀಸಿ ಕರೆಯುತ್ತದೆ. ಇದು ಶಿಕ್ಷಕ ಅವಿನಾಶ್ ಅವರು ಮಕ್ಕಳ, ಪಾಲಕರ ಮತ್ತು ಶಾಲಾ ಸಮಿತಿಯ ಸಹಕಾರ ಪಡೆದು ರೂಪಿಸಿರುವ ಶಾಲಾ ಆವರಣ ಹಾಗೂ ಬೋಧನಾ ವಿಧಾನ. ರಾಜ್ಯದ ಇತರ ಶಾಲೆಗಳಿಗೆ ಮಾದರಿ. ಅಂದದ ಉದ್ಯಾನವನದಲ್ಲಿ ಅ ಆ ಇ ಈ ಅಕ್ಷರಗಳಿಂದ ಹಿಡಿದು ಭಾರತ ದೇಶದ ಒಟ್ಟು ವಿಸ್ತೀರ್ಣದವರೆಗಿನ ಮಾಹಿತಿಯನ್ನೊಳಗೊಂಡ ಸುಂದರ ಫಲಕಗಳನ್ನು ಅಳವಡಿಸಲಾಗಿದೆ. ಕನ್ನಡ-ಇಂಗ್ಲಿಷ್ ಅಕ್ಷರಗಳಲ್ಲಿ ಮೂಡಿರುವ ಫಲಕಗಳು ಕೆಲಕಾಲ ಅಲ್ಲೇ ನಿಂತು ಓದುವಂತೆ ಮಾಡುತ್ತವೆ. ಉದ್ಯಾನವನದಲ್ಲಿ ಎರಡು ಭಾಗವಾಗಿ ವಿಂಗಡಿಸಿ ಅದೇ ಆವರಣದ ಆಚೆ-ಈಚೆ ಹೋಗುವಾಗಲೂ ಕಲಿಯಲು ಪೂರಕವಾಗಿ ಕನ್ನಡ ಮತ್ತು ಇಂಗ್ಲಿಷ್ ಅಕ್ಷರಗಳ ಫಲಕಗಳನ್ನು ಹಾಕಲಾಗಿದೆ. ಕರೊನಾ ವೇಳೆ ಶಾಲೆಗೆ ರಜೆ ಇದ್ದರೂ ಆನೆಗದ್ದೆ ಶಾಲೆ ಮಾತ್ರ ಎಂದಿನಂತೆ ನಳನಳಿಸುತ್ತಲೇ ಇದೆ.
