ಬಹಳಷ್ಟು ಜನರ ಸಮಸ್ಯೆಯೇನೆಂದರೆ ಜೀವನದಲ್ಲಿ ಬೇಕಾದುದೆಲ್ಲ ಇವೆ ಆದರೆ ಅನುಭವಿಸಲು ಶಕ್ತಿ ಇಲ್ಲ; ಮಧ್ಯವಯಸ್ಸಿನಲ್ಲಿಯೇ ಸುಸ್ತು, ನಿಶ್ಶಕ್ತಿ ಕಾಡುತ್ತಿರುತ್ತವೆ. ಇದಕ್ಕೇನು ಕಾರಣ, ಏನು ಪರಿಹಾರ? ಮೊದಲನೆಯದಾಗಿ, ಬಹಳಷ್ಟು ಜನರಿಗೆ ಹಲವು ರೀತಿಯ ಸೂಕ್ಷ್ಮ ಪೋಷಕಾಂಶಗಳ ಕೊರತೆ ಸುಸ್ತಿಗೆ ಕಾರಣವಾಗುತ್ತದೆ. ಹಾಗಾಗಿ ಸುಸ್ತು ಇದ್ದಾಗ ವಿಟಮಿನ್ ಡಿ, ಬಿ12, ಹಿಮೋಗ್ಲೋಬಿನ್ ಮುಂತಾದವುಗಳ ಪರೀಕ್ಷೆ ಮಾಡಿಸಿಕೊಳ್ಳಬೇಕು. ಅವುಗಳಲ್ಲಿ ಕೊರತೆ ಕಂಡರೆ ಪೂರಕ ಔಷಧಿಗಳನ್ನು ಸೇವಿಸಬೇಕು. ಅದಕ್ಕಿಂತ ಉತ್ತಮವಾದ ವಿಧಾನವೆಂದರೆ ಅವುಗಳ ಕೊರತೆ ಆಗದಂತೆ ನಮ್ಮ ಆಹಾರದಲ್ಲಿ ಪೋಷಕಾಂಶಗಳು ಇರುವಂತೆ ನೋಡಿಕೊಳ್ಳುವುದು. ಉದಾಹರಣೆಗೆ, ಹಸಿರು ಸೊಪ್ಪುಗಳು, ನಟ್ಗಳು, ದಿನಕ್ಕೊಂದು ಹಣ್ಣು, ಬೇಳೆ ಕಾಳು, ಹಾಲು, ಮೊಸರು, ತುಪ್ಪ ಇತ್ಯಾದಿ.
