ಒಂದೇ ರೈಲಿನಲ್ಲಿ ಹೊರಟವರು ಒಂದೇ ಸಮಯಕ್ಕೆ ಗುರಿ ತಲುಪುತ್ತಾರೆ. ಆದರೆ, ಒಂದೇ ಸಂಸ್ಥೆಯಲ್ಲಿ ಓದಿದವರು ಒಂದೇ ರೀತಿ ಗುರಿಯನ್ನು ಮುಟ್ಟಲು ಸಾಧ್ಯವಿಲ್ಲ. ಕಾರಣ, ವ್ಯಕ್ತಿಯಿಂದ ವ್ಯಕ್ತಿಗೆ ಸ್ವಭಾವದಲ್ಲಿ ಬದಲಾವಣೆ ಇರುತ್ತದೆ. ಮಾತು, ನಡತೆ, ಧೈರ್ಯದ ಜೊತೆಗೆ ನಗೆಯೂ ಇಲ್ಲಿ ಮುಖ್ಯವಾದ ಪಾತ್ರವನ್ನು ವಹಿಸುತ್ತದೆ. ಕೆಲವರನ್ನು ನೋಡಿದಾಗ ಮಾತಾಡಿಸಬೇಕು ಅಂತ ಮನಸ್ಸು ಹಾತೊರೆಯುತ್ತೆ. ಇನ್ನು ಕೆಲವರು ಎದುರಾದಾಗ ಯಾಕಾಗಿ ನಾನು ಇಲ್ಲಿಗೆ ಬಂದೆನೋ ಅಂತ ಬೇಜಾರಾಗುತ್ತೆ. ವಾಸ್ತವದಲ್ಲಿ ಅವರು ನಮಗೆ ಯಾವುದೇ ಬಗೆಯಲ್ಲಿ ತೊಂದರೆ ಕೊಟ್ಟಿರೋಲ್ಲ. ಆದ್ರೂ ವ್ಯಕ್ತಿಯ ಮುಖ ನೋಡಿದಾಗ ಅಸಹನೆ. ಇದಕ್ಕೆ ಕಾರಣ ಭಿನ್ನ ವ್ಯಕ್ತಿತ್ವ, ಮಾತಿನ ವರಸೆ ಮತ್ತು ಸಹಿಸಲಾಗದ ಸ್ವಭಾವ.
