ಸುಖ ಬೇಕಾದಷ್ಟು ಇದೆ. ಆದರೂ, ಸುಖ ಎಲ್ಲೆಲ್ಲೋ ಸಿಗಬಹುದು ಎಂದುಕೊಂಡು ಅದನ್ನು ಹುಡುಕುತ್ತ ಅಲೆಯುತ್ತೇವೆ. ಅದರ ಬದಲು ಸುಖ ನಮ್ಮ ಬದುಕಿನ ಜೊತೆಗೆ, ನಾವು ಮಾಡವ ಕೆಲಸದಲ್ಲಿ ನೋಡುವ ದೃಷ್ಟಿಕೋನ ಬೆಳೆಸಿಕೊಳ್ಳಬೇಕು. ಇರುವುದರಲ್ಲಿ ನಾವು ಸುಖವಾಗಿಯೇ ಇದ್ದೇವೆ ಎಂದು ತಿಳಿಯುವುದು ಉತ್ತಮ. ಸುಖ ಎಲ್ಲೂ ಇಲ್ಲ ಎಂದು ಭಾವಿಸಿದರೆ ಅದು ನಿಜಕ್ಕೂ ಸಿಗುವುದಿಲ್ಲ. ಇಲ್ಲೇ ಇದೆ ಎಂದುಕೊಂಡರೆ ತಕ್ಷಣ ಅದು ನಮ್ಮೊಳಗೆ ಬಂದು ಸೇರಿಕೊಂಡಿರುತ್ತದೆ. ಹಾಗಾಗಿ, ಇರುವುದರಲ್ಲಿ ಸಂತೃಪ್ತಿ ಕಾಣುವ, ಸಂತೋಷ ಪಡುವ ಮನೋಭಾವ ಬೇಕು. ಮತ್ತೊಬ್ಬರ ಕಷ್ಟಗಳು, ಸಮಸ್ಯೆಗಳು ಎಷ್ಟು ತೀವ್ರವಾಗಿರುತ್ತವೆ ಎಂಬುದನ್ನು ಅರ್ಥೈಸಿಕೊಂಡು, ಸಾಧ್ಯವಾದರೆ ಸ್ಪಂದಿಸೋಣ. ಇಲ್ಲವಾದಲ್ಲಿ, ನಮ್ಮ ಚಿಂತನೆಯನ್ನು, ದೃಷ್ಟಿಕೋನವನ್ನು ಬದಲಿಸಿಕೊಂಡು ಇರುವ ಸುಖ, ನೆಮ್ಮದಿಯನ್ನು ಅನುಭವಿಸೋಣ.
