ಬೆಳಗಾವಿ ಜಿಲ್ಲಾ ಕಲಾಮೇಳ, ರಾಯಬಾಗ ತಾಲೂಕಾ ಮೊದಲ ಕನ್ನಡ ಸಾಹಿತ್ಯ ಸಮ್ಮೇಳನ, ತಾಲೂಕಾ ಕೃಷಿ ಸಮ್ಮೇಳನ, ರಕ್ತದಾನ, ನೇತ್ರದಾನ ಶಿಬಿರ, ಜನಜಾಗೃತಿಗಾಗಿ ಪಾದಯಾತ್ರೆ ಇತ್ಯಾದಿಗಳನ್ನು ಆರಂಭಿಸಿದ ಹೆಗ್ಗಳಿಕೆ ವಿರಕ್ತಮಠದ ಪ್ರಸ್ತುತ ಪೀಠಾಧಿಪತಿ ಶ್ರೀ ಶಿವಾನಂದ ಮಹಾಸ್ವಾಮಿಗಳಿಗೆ ಸಲ್ಲುತ್ತದೆ. ಶಿವಯೋಗ ಮಂದಿರ, ಹುಬ್ಬಳ್ಳಿ, ಕಾಶಿಗಳಲ್ಲಿ ಉನ್ನತ ವ್ಯಾಸಂಗವನ್ನು ಮಾಡಿದ ಪೂಜ್ಯರು ಸಮಾಜದ ಕೈಂಕರ್ಯಕ್ಕಾಗಿ ಶ್ರಮಿಸುತ್ತಿದ್ದಾರೆ. ಗಡಿಭಾಗದ ಹಂದಿಗುಂದ ಹಳ್ಳಿಯಲ್ಲಿ ಶಿಕ್ಷಣದ ಕೊರತೆ ಇದ್ದಾಗ ಕನ್ನಡ ಪ್ರೌಢಶಾಲೆಯನ್ನು ಸ್ಥಾಪಿಸಿ ಮಕ್ಕಳಿಗೆ ಕನ್ನಡ, ಸಂಸ್ಕೃತ, ಹಿಂದಿ ಹಾಗೂ ಸಂಸ್ಕಾರಯುತ ಶಿಕ್ಷಣವನ್ನು ನೀಡುತ್ತ ಬಂದಿದ್ದಾರೆ. ಕವಿಯಾಗಿ ಸಾಹಿತ್ಯಕೃಷಿ ಮಾಡಿರುವ ಸ್ವಾಮಿಗಳು ಆತ್ಮಸಖ, ತುಂತುರು ತುಷಾರ, ವಚನದಾಂಗುಡಿ, ವಚನ ಒರತೆ ಮುಂತಾದ ಕವನಸಂಕಲನಗಳನ್ನು ರಚಿಸಿದ್ದಾರೆ.
