ಕರ್ನಾಟಕದ ಉತ್ತರ ಭಾಗದ ಜಿಲ್ಲೆಗಳಲ್ಲಿ ಕಬ್ಬು ಕೃಷಿಕರ ಪ್ರತಿಭಟನೆ ತೀವ್ರಗೊಂಡಿದೆ. ಬೆಳಗಾವಿ, ಬಾಗಲಕೋಟೆ, ವಿಜಯಪುರ, ಹಾವೇರಿ ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ರೈತರು ರಾಷ್ಟ್ರೀಯ ಹೆದ್ದಾರಿಗಳನ್ನು ಬಂದ್ ಮಾಡಿ, ಧರಣಿ ನಡೆಸುತ್ತಿದ್ದಾರೆ. ಹಸಿರು ಸೇನೆ, ಕರ್ನಾಟಕ ರಾಜ್ಯ ರೈತ ಸಂಘ, ಕಬ್ಬು ಬೆಳೆಗಾರರ ಸಂಘಟನೆಗಳ ನೇತೃತ್ವದಲ್ಲಿ ನಡೆಯುತ್ತಿರುವ ಈ ಹೋರಾಟಕ್ಕೆ ವಿವಿಧ ಕನ್ನಡ ಪರ ಸಂಘಸಂಸ್ಥೆಗಳು ಮತ್ತು ರಾಜ್ಯದ ಅಧಿಕೃತ ವಿರೋಧ ಪಕ್ಷವಾದ ಬಿಜೆಪಿ ಕೂಡ ಬೆಂಬಲ ನೀಡಿರುವುದರಿಂದ ಈ ಚಳವಳಿ ಇದೀಗ ತೀವ್ರ ಸ್ವರೂಪ ಪಡೆದುಕೊಂಡಿದೆ. ರಾಜ್ಯ ಸರ್ಕಾರ ಕಬ್ಬಿಗೆ ಪ್ರತಿ ಟನ್ಗೆ 3,500 ರೂ. ಬೆಂಬಲ ಬೆಲೆ ಘೊಷಿಸಬೇಕು ಎಂಬುದು ಪ್ರತಿಭಟನಕಾರರ ಮುಖ್ಯ ಬೇಡಿಕೆ. ಈಗ ಸಕ್ಕರೆ ಕಾರ್ಖಾನೆಗಳು 2,700 ರೂ.ಗಳಿಂದ 3,200 ರೂ.ವರೆಗೆ ಮಾತ್ರ ನೀಡುತ್ತಿವೆ. ಬೀಜ, ಗೊಬ್ಬರ, ನೀರು ಮುಂತಾಗಿ ಕೃಷಿಗೆ ಇನ್ಪುಟ್ ವೆಚ್ಚ ಹೆಚ್ಚಿರುವುದರಿಂದ ಈ ದರ ಏನೇನೂ ಸಾಲದು ಎಂಬುದು ರೈತರ ವಾದ.
