ಏನ್ ದೋಸ್ತ್... ನಮ್ಮ ಕಾಕಾ ಕಂಡಂಗ ಕಾಣ್ತಿಯಲಾ...; ನಾಳೆ ಫ್ರೆಂಡ್​ಷಿಪ್​ ಡೇ..

ನಾ ಮಂಜ್ಯಾಗ, ‘ಅವನ್ನ ಏಲ್ಲೋ ನೋಡೇನಲೇ... ಎಲ್ಲೆ ಅಂತ ಗೊತ್ತಾಗವಲ್ತ, ನೀ ಗೊರ್ತ ಹಿಡಿತಿ ಏನ ನೋಡ’ ಅಂತ ಅವನ್ನ ತೋರಿಸಿದೆ. ಅವನೂ ದೂರಿಂದ ಡಿಮ್ ಲೈಟನಾಗ ನೋಡಿ, ‘ಏ, ತಡಿ ಹತ್ತರ ಹೋಗಿ ನೋಡ್ತೆನಿ’ ಅಂತ ಅವನ ಟೇಬಲಗೆ ಹೋದಾ. ಮುಂದ ಹತ್ತ ನಿಮಿಷಕ್ಕ ಅವನ್ನ ಕರಕೊಂಡ ನಮ್ಮ ಟೇಬಲಗೇ ಬಂದಾ. ‘ಆಡ್ಯಾ ಇಂವಾ ಯಾರ ಗೊತ್ತಾಗಲಿಲ್ಲಾ? ಸುನ್ಯಾಲೇ..ನಮ್ಮ ಜೋತಿ ಲ್ಯಾಮಿಂಗ್ಟನ್ನಾಗ ಇದ್ದನಲಾ’ ಅಂತ ಅಂದಾ, ಆದರೂ ನಂಗ ಲಗೂನ ನೆನಪಾಗಲಿಲ್ಲಾ.

‘ಸೋಷಿಯಲ್ ಸ್ಟಡಿ ನಂದಣ್ಣವರ ಸರ್ ಕಡೆ, ನಮ್ಮ ದೇಶದ್ದ ರಾಜಧಾನಿ ಯಾವುದು ಅಂತ ಕೇಳಿದಾಗ ‘ದೌಲತಾಬಾದ್’ ಅಂತ ಹೇಳಿ ಬೈಸ್ಗೊಂಡಿದ್ನಲಾ’ ಅವನ ಇಂವಾ ಅಂದಾ. ಆವಾಗ ನಂಗ ಸಡನ್ ಆಗಿ ನೆನಪಾತ, ಓ ಆ ಸುನ್ಯಾ, ಹೆಂಗ ಇದ್ದಾ ಹೆಂಗ ಆಗ್ಯಾನ, ನಮ್ಮ ಜೊತಿ ಹೈಸ್ಕೂಲನಾಗ ಇದ್ದಾಗ ಇಂಗಳಗಿ ಚಾಳ ಒಳಗ ಮನಿ ಇತ್ತ ಮಗಂದ, ಅಂವಾ ಹಿಂಗ ಆಗ್ಯಾನ ಅಂದರ ನಂಬಲಿಕ್ಕೆ ಆಗಲಿಲ್ಲಾ. ಅಲ್ಲಾ ನಂಬದೆಲ್ಲಾ ಕಾಲೇಜ್ ಮೆಟ್ಟಲಾ ಹತ್ತಿದ ಮ್ಯಾಲೆ ಬೆಳವಣಗಿ ನಿಂತರ ಇವಂದೇನ ಇನ್ನೂ ನಿಂತಿಲ್ಲ ಏನ ಅನಸಲಿಕತ್ತ.

ತಲಿ ಮ್ಯಾಲೆ ಒಂದ ಕೂದ್ಲ್ ಇಲ್ಲಾ, ಹೊಟ್ಟಿ ನೋಡಿದರ ದಿಂದಾಗ ಇದ್ದಂಗ ಇತ್ತ. ಒಂದ ಮಾತನಾಗ ಹೇಳ್ಬೇಕಂದರ ನಮ್ಮ ಕಾಕಾ ಕಂಡಂಗ ಕಾಣ್ತಿದ್ದಾ, ನಾ ಸೀದಾ, ‘ಏನ ದೋಸ್ತ್ ನಮ್ಮ ಕಾಕಾ ಕಂಡಂಗ ಕಾಣ್ತಿಯಲಾ’ ಅಂತ ಅಂದ ಬಿಟ್ಟೆ. ಅಲ್ಲಾ ಹಂಗ ನಂಗೂ ಹೆಂಡ್ತಿ ಬೈತ್ಲಾ ತಗಲಿಕತ್ತ ಮ್ಯಾಲೆ ಕೂದ್ಲ ಹೋಗ್ಯಾವ ಆ ಮಾತ ಬ್ಯಾರೆ. ಆದರ ನಮ್ಮ ಮಂಜ್ಯಾನ ನೋಡಿದ್ರಂತೂ ಮುಗದ ಹೋತ ಇಷ್ಟ ಯಂಗ್ ಕಾಣ್ತಾನ ಅಂದರ ಅಂವಾ ಇವತ್ತೂ ಹೈಸ್ಕೂಲಿಗೆ ಹೋದರ ಸಪ್ಲಿಮೆಂಟರಿ ಎಕ್ಸಾಂ ಫಾಮ್ರ್ ತುಂಬಲಿಕ್ಕೆ ಬಂದಾನ ಅನ್ಕೋಬೇಕ ಅಷ್ಟ ಯಂಗ್ ಇದ್ದಾನ.

ಅಲ್ಲಾ ಹಂಗ ನಾನೂ ಯಂಗ್ ಇದ್ದೇನ ಬಿಡ್ರಿ. ನನ್ನ ಮಗನ ಡಿಪ್ಲೋಮಾ ಅಡ್ಮಿಶನ್ ಮಾಡಸಲಿಕ್ಕೆ ಕ್ಯಾಪ್ ಹಾಕ್ಕೊಂಡ ಹೋದಾಗ ನನಗ ಅಳಗುಂಡಗಿ ಸರ್, ‘ಏ, ಇದ ಬರೇ ಫ್ರೆಶ್ ಅಡ್ಮಿಶನ್ ಬ್ಯಾಕ್​ಲಾಗ್ ಇದ್ದೋರ ಒಂದ ತಿಂಗಳ ಬಿಟ್ಟ ಬರ್ರಿ’ ಅಂತ ಅಂದಿದ್ದರು.

ಇನ್ನ ನಮ್ಮನ್ನ ನೋಡಿ ಪಾಪ ಸುನ್ಯಾಗ ಇನ್ನೂ ವಯಸ್ಸಾದಂಗ ಅನಸಲಿಕತ್ತ ಕಾಣ್ತದ ಅದರಾಗ ನಾ ‘ಕಾಕಾ ಕಂಡಂಗ ಕಾಣ್ತಿ’ ಅಂದದ್ದ ಇನ್ನೂ ಅಸಂಯ್ಯ ಆಗಿತ್ತ. ನಾ ‘ಯಾಕಲೇ ಸುನ್ಯಾ...ಹಿಂಗ್ಯಾಕ ಆಗಿ’ ಅಂತ ಕೇಳೋದ ತಡಾ, ಅಂವಾ ತನ್ನ ಕಥಿ ಶುರು ಮಾಡಿದಾ.

ಮಲ್ಟಿನ್ಯಾಶನಲ್ ಕಂಪನಿದ ಸೌತ್​ಇಂಡಿಯಾ ಚೀಫ್, ಸಿಕ್ಕಾಪಟ್ಟೆ ಸ್ಟ್ರೆಸ್, ಟಾರ್ಗೆಟ್, ಟ್ರಾವೆಲ್. ಹದಿನೈದ ದಿವಸಕ್ಕೊಂದ ಸರತೆ ಹೆಂಡ್ತಿ ಮಾರಿ ನೋಡ್ತಾನ, ಪಗಾರ ನೋಡಿದ್ರ ನನ್ನ ಹಾಫ್ ಇಯರ್ ಪಗಾರ ಅವಂದ ಒಂದ ತಿಂಗಳದ್ದ ಪಗಾರ ಸೇಮ್ ಬೆಂಗಳೂರಾಗ ಸಿಕ್ಕಾಪಟ್ಟೆ ಆಸ್ತಿ. ಇರೋ ಒಬ್ಬ ಮಗಗ ಮಂಗಳೂರಾಗ Residential school ಒಳಗ ವರ್ಷಕ್ಕ ಐದ ಲಕ್ಷ ಕೊಟ್ಟ ಇಟ್ಟಾನ. "i want my son to be engineer man' ಅಂದಾ.

ಏನಿಲ್ಲದ ಕಂಪನಿ ಪ್ರೆಶರ್ ಮ್ಯಾಲೆ ಮಗನ career, ಹೆಂಡ್ತಿ ಕಾಟ..ಎಷ್ಟಂತ ಗಂಡ ಅನ್ನೊ ಪ್ರಾಣಿ ತಡ್ಕೊಬೇಕ? ಲೈಫ್ ಅನ್ನೋದ ಮಶೀನಗತೆ ಆಗಿ ಇವತ್ತಿಲ್ಲಾ ನಾಳೆ ಇಂಜಿನ್ ಡೌನ್ ಆಗೋ ಲೇವಲಗೆ ಬಂದಿತ್ತ. ಅವನ್ನ ನೋಡಿ ನಾವಿಬ್ಬರೂ ಏನು ಮಾತಾಡ್ಲಿಲ್ಲಾ, ನಾವ ನೋಡಿದರ ಇನ್ನೂ ಹುಡಗರ ಗತೆ ಲಗ್ನಾ ಆಗಿ ಎದಿ ಉದ್ದ ಮಕ್ಕಳ ಬಂದರು, ‘ಮೊನ್ನೆ ಬ್ರಾಡವೇ ಒಳಗ ಜವಳಿ ಸಿಕ್ಕಿದ್ಲು, ಅಕಿ ಅವಳಿ-ಜವಳಿ ಮಕ್ಕಳ ಇಬ್ಬರೂ ಬಿ.ಇ ಮಾಡ್ತಾರಂತ, sin(Ɵ) ಸಿಂಗಾಪುರನಾಗ ಇರ್ತಾಳ, P2 ಪಾಂಡಿಚೇರಿಗೆ ಶಿಫ್ಟ್ ಆಗ್ಯಾಳ, ಜಾನ್ಸನ್ ಬೇಬಿ ಸೋಪ್ ಅಂತೂ ಇನ್ನು ಸಂತೂರ್ ಗರ್ಲ್ ಇದ್ದಂಗ ಇದ್ದಾಳ’ ಅಂತೆಲ್ಲಾ ಇನ್ನೂ ನಮ್ಮ ಕಾಲೇಜ್ ಹುಡಗ್ಯಾರ ಭೆಟ್ಟಿ ಆಗಿದ್ದನ್ನ ನೆನಸಿಗೋತ ಇರ್ತೇವಿ. ಸುನ್ಯಾನ್ನ ನೋಡಿ ನಮಗೇನ ಲೈಫ್ ಬಗ್ಗೆ ಸಿರಿಯಸನೆಸ್ ಇಲ್ಲ ಏನಪಾ, ಮಕ್ಕಳ ಬಗ್ಗೆ ಕಾಳಜಿನ ಇಲ್ಲ ಏನ ಅಂತ ಗಿಲ್ಟಿ ಫಿಲಿಂಗ್ ಬರಲಿಕತ್ತ. ನಾ ಅಂತೂ ಹದಿನಾರ ವರ್ಷದ parentshood ಒಳಗ ಒಂದ ದಿವಸನೂ ಪೇರೆಂಟ್ಸ್ ಡೇ ದಿವಸ ಸಾಲಿಗೆ ಹೋಗಲಿಲ್ಲಾ, ನನ್ನ ಮಗಗ ಡಿಪ್ಲೋಮಾ ಹಚ್ಚಬೇಕಾರ ನನ್ನ ಹೆಂಡ್ತಿ ‘ಅಡ್ಮಿಶನಗೆ ನಾ ಹೋಗಂಗಿಲ್ಲಾ, ಅಲ್ಲೆ ಬರೇ ಇಂಗ್ಲಿಷ್ ಮಾತಾಡ್ತಾರ’ ಅಂದಾಗ ನಾನ ಹೋಗಬೇಕಾತ.

ನಾ ಇವತ್ತಿಗೂ ಮಕ್ಕಳ ಎಜುಕೇಶನ್ ಬಗ್ಗೆ ತಲಿಕೆಡಸಿಕೊಂಡಿಲ್ಲಾ. ಅಲ್ಲಾ ನಾ ಕಲಿಬೇಕಾರ ತಲಿ ಕೆಡಸಿಕೊಂಡಿದ್ದಿಲ್ಲಾ ಇನ್ನ ಮಕ್ಕಳ ಕಲಿಬೇಕಾರ ಎಲ್ಲೆ ತಲಿಕೆಡಸಿಕೊಳ್ಳೊದ? ಅವರ ಹಣೆಬರಹ ಅವರದ, ನಂಬದ ನಂಬದ. ಹಂಗ ನಮ್ ಲೈಫ್ ಸ್ಯಾಕ್ರಿಫೈಸ್ ಮಾಡ್ಕೊಂಡ ನಮ್ಮ ಮಕ್ಕಳ ಸಂಬಂಧ ನಾವ ಬದಕೋದು, ಮುಂದ ನಮ್ಮ ಮಕ್ಕಳ ತಮ್ಮ ಮಕ್ಕಳ ಸಂಬಂಧ ಬದಕೋತ ಹೊಂಟರ ನಮ್ಮ ವೈಯಕ್ತಿಕ ಲೈಫ್ ಯಾರ ಎಂಜಾಯ್ ಮಾಡೊರ? ನಾ ಅಂತೂ Enjoy bloody life ಅಂತ ಬಿಂದಾಸ್ ಇರೊ ಮನಷ್ಯಾ.

ಅಲ್ಲಾ, ಇದ ನನ್ನ ವಿಚಾರ ಬಿಡ್ರಿ. ಆದರು ಸುನ್ಯಾಂದ ಪುರಾಣ ಕೇಳಿದ ಮ್ಯಾಲೆ ನಾವ ಲೈಫ್ ಒಳಗ ಸಿರಿಯಸ್ ಆಗಲೇಲಲಾ ಇನ್ನೂ ಹೈಸ್ಕೂಲ್, ಕಾಲೇಜ್ ಹುಡುಗರ ಗತೆ ಲೈಫ್ ಎಂಜಾಯ್ ಮಾಡ್ಕೋತ, ಸಣ್ಣೊರಿದ್ದಾಗ ಅವ್ವಾ ಅಪ್ಪಗ ಸುಳ್ಳ ಹೇಳ್ತಿದ್ವಿ, ಈಗ ಹೆಂಡ್ತಿ-ಮಕ್ಕಳಿಗೆ ಸುಳ್ಳ ಹೇಳ್ಕೋತ ಬದಕಲಿಕತ್ತೇವೆಲಾ ಅಂತ ಅನಸಲಿಕತ್ತ. ಇನ್ನ ಆ ಸುನ್ಯಾಂದ ಪೂರ್ತಿ ಕಥಿ ಕೇಳ್ರಿಲ್ಲೆ. ಆ ಮಗಗ ಕಂಪನಿದು, ಸಂಸಾರದ್ದು ಟೇನ್ಶನಗೆ ಸ್ಟ್ರೆಸ್ ಆಗಿ ಡೈಬಿಟಿಸ್ ಬಂದ ಹತ್ತ ವರ್ಷ ಆಗೇದ ಅಂತ, ಬಿ.ಪಿ. ಗುಳಗಿ ನುಂಗಲಿಕ್ಕತ್ತ ಮೂರ ವರ್ಷಾತ. ಏನ್ಮಾಡ್ತೀರಿ? ನನ್ನಕಿಂತ ಮೂರ ತಿಂಗಳ ದೊಡ್ಡೊಂವ ಇಷ್ಟ. ಅಲ್ಲಾ ಯಾರ ಸಂಬಂಧ ಇಷ್ಟೆಲ್ಲ ಮಾಡ್ಯಾನ, ಯಾರ ಸಂಬಂಧ ಬದಕಲಿಕತ್ತಾನ, ಒಂದೂ ಕ್ಲಿಯರ್ ಇಲ್ಲಾ. ಮನ್ಯಾಗ ಮಲ್ಟಿ ಜಿಮ್ ಇಟಗೊಂಡ ತಾ ನೋಡಿದರ ಲೇಜಿ ಬ್ಯಾಗ್ ಆಗ್ಯಾನ. ಏನ ಹೇಳಬೇಕ ಹಿಂತಾವರಿಗೆ, ಇಂವಾ ಒಬ್ಬನ ಅಲ್ಲಾ, ಹಂಗ ನಮ್ಮ ಸರ್ಕಲನಾಗ ಭಾಳ ಮಂದಿ ಇದ್ದಾರ, ಅವರ ನೋಡಿ ಬಿಟ್ಟರ ನಮ್ಮ ಜನರೇಶನ್ ಅನಸಂಗಿಲ್ಲಾ, ಹಿಂಗ ಮೆಕಾನಿಕಲ್ ಲೈಫ್ ಒಳಗ ಸಿಕ್ಕೊಂಡ materialistic ಆಗಿ ಇವತ್ತ ರಿಯಲ್ ಲೈಫ್ ಕಳ್ಕೊಂಡವರಿಗೆ ಏನ ಅನ್ನೋದ? ಅವರ ಲೈಫ್, ಅವರ ಪ್ರಿಯಾರಿಟಿ.

ಹೋಗ್ಲಿ ಬಿಡ್ರಿ ಇದರ ಬಗ್ಗೆ ನಾ ಭಾಳ ಹೇಳಿದರ ಶಾಣ್ಯಾತನ ಬಡದಂಗ ಆಗ್ತದ. ಆದರೂ ನಮ್ಮ ಸುನ್ಯಾನ್ನ ನೋಡಿ ಜೀವಾ ಚುಟುಚುಟು ಅಂತ ಅದಕ್ಕ ಇಷ್ಟ ಹೇಳ್ಬೇಕಾತು. ‘ಸರಿ ಬಿಡಪಾ ಕಾಕಾ... ಹೋಗ್ಲಿ ಬಿಡ ಭಾಳ ತಲಿಕೆಡಸ್ಗೊ ಬ್ಯಾಡಾ. ಇನ್ನೊಂದ ಲಾರ್ಜ್ ಹೇಳಲೆನ’ ಅಂದೆ, "yes, scotch please... it has less sugar' ಅಂದಾ. ಏನ್ಮಾಡ್ತೀರಿ. ಬರೇ ಫುಡ್ ಇಷ್ಟ ಅಲ್ಲಾ ಇವನ ಚಟಾ ಸಹಿತ ಶುಗರ್ ಫ್ರೀ. ನಂದೇನ ಗಂಟ ಹೋಗೊದ ಅಂತ ಅವಂಗೊಂದ ಲಾರ್ಜ್ ನಮಗ ಎರಡ ಸ್ಮಾಲ್ ಹೇಳಿದೆ. ನಾವು ಏನಿದ್ದರೂ ಲವ್ ಡ್ರಾಪ್ ಎಂಜಾಯ್ ಮಾಡೋ ಮಂದಿ, ಜೀವನದ ಪ್ರತಿ ಹನಿ ಹನಿನೂ ಎಂಜಾಯ್ ಮಾಡ್ತೇವಿ. ಅದಕ್ಕ ಹೇಳಿದ್ದ Enjoy bloody life ಅಂತ. ಅನ್ನಂಗ ನಾಳೆ ಅಂತಾರಾಷ್ಟ್ರೀಯ ಫ್ರೆಂಡಶಿಪ್ ಡೇ, ನಿಮಗೆಲ್ಲ ಫ್ರೆಂಡಶಿಪ್ ಡೇದ ಹಾರ್ದಿಕ ಶುಭಾಶಯ.

(ಲೇಖಕರು ಹಾಸ್ಯ ಬರಹಗಾರರು)