ಅಲ್ಲಾ, ಸುಳ್ಳ-ಸುಳ್ಳ ಮಂಗಳ ಗ್ರಹಕ್ಕ ಕರಕೊಂಡ ಹೋಗ್ತೇನಿ, ಅಲ್ಲೇ LIG, MIG ಮನಿ ಕಟ್ಟಿಸಿ ಕೊಡ್ತೇವಿ ಅಂತ ನನ್ನ ಹೆಂಡ್ತಿ ಹಂತಾ ಮಂಗಳಗೌರಿಗಳಿಗೆ ಆಶಾ ತೋರಿಸಿ ಮಿಲಿಯನ್ಗಟ್ಟಲೇ ರೊಕ್ಕಾ ಹಾಕ್ಕೊಂಡ ಮಾರ್ಸ್ ಒನ್ ಕಂಪನಿ ರಾತ್ರೋರಾತ್ರಿ ಮುಚಗೊಂಡ ಹೋಗಿದ್ದರು. ಹಂಗ ಜಗತ್ತಿನೊಳಗ ರಗಡ ಸ್ಕಾ್ಯಮ್ ಆಗ್ತಾವ. ಅದರಾಗ ಇದು ಒಂದ ಅನ್ನರಿ. ಈ ಮಾರ್ಸ್ ಒನ್ ಪ್ರೋಜೆಕ್ಟ್ ಅನೌನ್ಸ್ ಮಾಡಿದಾಗ ವಿಜ್ಞಾನಿಗಳು, ಇಂಜಿನಿಯರಗಳು, ಅಸ್ಟ್ರಾನಾಟ್ಸ್ ಇದ Suicide mission ಅಂತ ಎಷ್ಟ ಹೇಳಿದರು ಜನಾ ಕೇಳಲಿಲ್ಲಾ, ಅಪ್ಲೆ ೖ ಮಾಡಿದರು. ಅದರಾಗ ಮಾರ್ಸ್ ಒನ್ದವರು ಐವತ್ತ ಗಂಡ, ಐವತ್ತ ಹೆಣ್ಣ ಇಷ್ಟ ಸೆಲೆಕ್ಟ್ ಮಾಡಿದರು. ಅದರಾಗ ನಮ್ಮ ಇಂಡಿಯಾದೊರ ಐದ ಮಂದಿ. ಹಂಗ ನನ್ನ ಹೆಂಡ್ತಿ ರಿಜೆಕ್ಟ್ ಆಗಿದ್ದಿಲ್ಲಾ ಅಂದರ ಆರ ಆಗ್ತಿದ್ದರ ಅನ್ನರಿ. ಆ ಮಾರ್ಸ್ ಒನ್ ಪ್ರೋಜೆಕ್ಟ್ ಬಾಸ್ ಲ್ಯಾನ್ಸ್ಡೊರ್ಪಗ ‘ನೀ ಫಂಡ್ ಹೆಂಗ ರೇಜ್ ಮಾಡ್ತಿಪಾ?’ ಅಂತ ಕೇಳಿದರ ‘ಮಾರ್ಸ್ ಒನ್ ರಿಯಾಲಿಟಿ ಶೋ ಇದ್ದಾಂಗ, ನಾವು ಸೆಲೆಕ್ಷನದಿಂದ ಹಿಡದ, ಟ್ರೇನಿಂಗ್, ಅವರ ಲ್ಯಾಂಡಿಂಗ್, ಅವರ ಡೇಲಿ ಲೈಫ್ ಇನ್ ಮಾರ್ಸ್ ಎಲ್ಲಾ ಬ್ರಾಡ್ಕಾಸ್ಟ್ ಮಾಡ್ತೇವಿ, ಅದರಿಂದ ರೊಕ್ಕೊ ಗಳಸ್ತೇವಿ’ ಅಂದಾ. ಅಂವಾ ಹೇಳಿದ್ದರ ಅರ್ಥ ಏನಂದರ ಮಾರ್ಸ್ ಒನ್ ಏನ ಅದ ಅಲಾ ಅದ ನಮ್ಮ ಸುದೀಪ್-ಸಲ್ಮಾನ್ ಖಾನನ ಬಿಗ್ಬಾಸ್ ಇದ್ದಂಗ. ಇಂವಾ ಎಲ್ಲಾರನೂ ಮಾರ್ಸ್ ಅಂದರ ಮಂಗಳಗ್ರಹದ ಒಳಗ ಹಾಕಿ ಇಲ್ಲೆ ಭೂಮಿ ಮ್ಯಾಲೆ ಅದನ್ನ ರಿಯಾಲಿಟಿ ಶೋ ಮಾಡಿ ನಮಗೆಲ್ಲ ತೊರಿಸಿ ರೊಕ್ಕಾ ಮಾಡೊಂವಾ. ಇಲ್ಲೇ ಇಂಡಿಯಾದ ಲೋನಾವಾಲದಾಗ ಬಿಗ್ಬಾಸ್ ಮಾಡಿದರ ನಾವು ಮನಿ ಕೆಲಸಾ ಬೊಗಸಿ ಬಿಟ್ಟ ಬಾಯಿ ತಕ್ಕೊಂಡ ನೋಡ್ತೇವಿ ಇನ್ನ ಮಂಗಳ ಗ್ರಹದಾಗ ಮಾಡಿದರ ಬಿಡ್ತೇವಾ?
