ಮಾನಸ ಸರೋವರದ ಹೆಬ್ಬಾಗಿಲು ದೇವಭೂಮಿ ನೇಪಾಳ

ಇತ್ತೀಚೆಗೆ ನೇಪಾಳ ಮತ್ತು ಟಿಬೆಟ್ ಗಡಿಯಲ್ಲಿ ಉಂಟಾದ ಘನಘೋರ ಪ್ರವಾಹವು ಮಾನಸ ಸರೋವರ- ಕೈಲಾಸ ಯಾತ್ರಿಕರ ಎದೆ ನಡುಗಿಸಿದೆ. ಪ್ರವಾಹ ಸಂಭವಿಸಿದ ಬಹುತೇಕ ಪ್ರದೇಶ ಕೈಲಾಸ ಮಾನಸ ಸರೋವರ ಯಾತ್ರೆಯ ಪ್ರಮುಖ ಮಾರ್ಗಗಳಲ್ಲಿ ಒಂದಾಗಿದೆ. ರಸುವಾಗಢಿ ಕೆರೂಂಗ್ ಮಾರ್ಗಕ್ಕೆ ಸಮೀಪದಲ್ಲಿರುವ ಭೋಟೆ ಕೋಶಿ ನದಿ ಕಣಿವೆಯಲ್ಲಿ ಪ್ರವಾಹ ಸಂಭವಿಸಿದೆ. ಕೈಲಾಸ ಯಾತ್ರೆ ಎಂಬುದು ಇನ್ನುಳಿದ ಯಾತ್ರೆಯಂತಲ್ಲ. ಇಲ್ಲಿನ ಅನುಭವ, ಅಡಚಣೆ, ಸವಾಲು, ಸಮಸ್ಯೆ, ಸಂತೃಪ್ತಿ, ಪ್ರತಿಯೊಂದೂ ದಿವ್ಯಾನುಭವದ ಮೆಟ್ಟಿಲುಗಳು.

ಶಿವನ ಆವಾಸ ಸ್ಥಾನವೆಂಬ ಕೀರ್ತಿಗೆ ಭಾಜನವಾಗಿರುವ ಕೈಲಾಸ ಪರ್ವತವು ಹಲವಾರು ನಿಗೂಢ ರಹಸ್ಯಗಳಿಂದ ತುಂಬಿದ ಮತ್ತು ಆಧ್ಯಾತ್ಮಿಕ ದೈವೀ ಶಕ್ತಿಯಿಂದ ಕೂಡಿದ ಅತ್ಯಂತ ವಿಸ್ಮಯಕಾರಿ ಪರ್ವತ. ಇದು ಇಲ್ಲಿಯವರೆಗೆ ತನ್ನ ಮೇಲೆ ಏರಲು ಯಾರಿಗೂ ಅವಕಾಶ ಕೊಟ್ಟಿಲ್ಲ. ಇದನ್ನು ಏರಲು ಪ್ರಯತ್ನಿಸುವ ಪ್ರತಿಯೊಬ್ಬರೂ ಒಂದಿಲ್ಲೊಂದು ತೊಂದರೆಗೊಳಗಾಗಿ ತಮ್ಮ ಸಾಹಸವನ್ನು ಕೈಬಿಟ್ಟಿದ್ದಾರೆ. ಭಕ್ತಿಯ ಬದಲಾಗಿ ಶಕ್ತಿಯ ಪ್ರದರ್ಶನಕ್ಕೆ ಮುಂದಾದ ಪರ್ವತಾರೋಹಿಗಳು ಹತಾಹತರಾದ ಉದಾಹರಣೆಗಳಿವೆ. ವಿಜ್ಞಾನಕ್ಕೆ ಸವಾಲೆಂಬಂತೆ ಇಲ್ಲಿ ದಿಕ್ಸೂಚಿಯೇ ನಿಷ್ಕ್ರಿಯಗೊಳ್ಳುತ್ತದೆ ಎಂಬುದನ್ನು ವಿಜ್ಞಾನಿಗಳೇ ದಾಖಲಿಸಿದ್ದಾರೆ. 

ಇಂತಹ ಹಲವಾರು ರಹಸ್ಯಗಳಿಂದ ಕೂಡಿದ ಕೈಲಾಸ ಪರ್ವತದ ರಹಸ್ಯವನ್ನು ಪತ್ತೆ ಹಚ್ಚಬೇಕೆಂದು ಹೊರಟ ಹೆಲಿಕಾಪ್ಟರ್ ಕೂಡ ನಿಯಂತ್ರಣ ಕಳೆದುಕೊಂಡ ದಾಖಲೆ ಇದೆ. ಹನುಮಂತ, ಅಶ್ವತ್ಥಾಮ ಮೊದಲಾದ ಚಿರಂಜೀವಿಗಳು ಈ ಪರ್ವತದಲ್ಲಿಯೇ ವಾಸಿಸುತ್ತಿದ್ದಾರೆಂಬ ಪ್ರತೀತಿ ಇದೆ. ಪರ್ವತದ ಸಮೀಪದಲ್ಲಿ ಓಂಕಾರ ಧ್ವನಿ ಕೇಳಿಸಿದ್ದಾಗಿ ಅನೇಕರು ಹೇಳಿಕೊಂಡಿದ್ದುಂಟು. ಹೀಗೆ ಹಲವಾರು ಅಲೌಕಿಕ ಅದ್ಭುತಗಳನ್ನು ತನ್ನಲ್ಲಿ ಗರ್ಭೀಕರಿಸಿಕೊಂಡ ಕೈಲಾಸ ಪರ್ವತವನ್ನು ಒಮ್ಮೆ ನೋಡಬೇಕೆಂಬ ಆಸೆ ಹಲವರಿಗಿರುತ್ತದೆ. ಈ ಪರ್ವತದ ಬಗ್ಗೆ ಕೇಳಿದಾಗಲೆಲ್ಲ ನಮಗೂ ಹಾಗನ್ನಿಸುತ್ತಿತ್ತು. ಅಂತಹದ್ದೊಂದು ಅವಕಾಶ ಈ ಬಾರಿ ನಮಗೆ ಕೂಡಿಬಂತು.

ಹೋಗುವುದು ನಿರ್ಧಾರವಾದ ಮೇಲೆ ಒಬ್ಬರೇ ಹೋಗುವುದಕ್ಕಿಂತ ಪರಿಚಿತರು ಯಾರಾದರೂ ಬಂದರೆ ಎಲ್ಲರೂ ಸೇರಿ ಹೋಗಿ ಬರಬಹುದೆಂದು ರ್ಚಚಿಸಿದೆವು. ಆಗ ಕೊಟ್ಟೂರು, ಶಿವಗಂಗೆ, ಕೆರೂರು, ವಿಭೂತಿಪುರ, ಗುಳೇದಗುಡ್ಡ, ಶಿರಶ್ಯಾಡ, ಸಿಂಧಗಿ, ಕನಕಗಿರಿ, ಘಟಪ್ರಭಾ ಹೀಗೆ ಒಟ್ಟು 10 ಜನ ಮಠಾಧಿಪತಿಗಳು ಯಾತ್ರೆಗೆ ಜತೆಯಾದರು. ಗುಂತಕಲ್ ಮೂಲದ ಪ್ರವಾಸಿ ಕಂಪನಿಯ ಮೂಲಕ ಒಟ್ಟು 80ಕ್ಕಿಂತಲೂ ಹೆಚ್ಚು ಜನ ವಿಭಿನ್ನ ಪ್ರಾಂತದ ಭಕ್ತರು ಕೈಲಾಸ ಮಾನಸ ಸರೋವರ ಯಾತ್ರೆಗೆ ಹೊರಟು ಜೂ. 13ರಂದು ನೇಪಾಳದ ರಾಜಧಾನಿ ಕಾಠ್ಮಂಡು ನಗರಕ್ಕೆ ಹೋದೆವು.

ಮೊದಲೇ ನಿರ್ಧರಿಸಿದ ಪ್ರಕಾರ ಇದು 12 ದಿನಗಳ ಪ್ರವಾಸವಾಗಿತ್ತು. ಮೊದಲ ದಿನ ಕಾಠ್ಮಂಡು ಸುತ್ತಮುತ್ತಲಿನ ಪ್ರಮುಖ ದೇವಾಲಯಗಳ ದರ್ಶನ ಮಾಡಿಕೊಂಡು ನಂತರ ಕೈಲಾಸ ಮಾನಸಸರೋವರ ಯಾತ್ರೆ ಪ್ರಾರಂಭಿಸಬೇಕಾಗಿತ್ತು. ಅಂತೆಯೇ ಕಾಠ್ಮಂಡುವಿನಲ್ಲಿರುವ ಸುಪ್ರಸಿದ್ಧ ಪಶುಪತಿನಾಥ ದೇವಾಲಯದ ದರ್ಶನ ಪಡೆದುಕೊಂಡೆವು. ನೇಪಾಳದ ಭರತ ಜಂಗಮ ಅವರ ವಿಶೇಷ ಸಹಕಾರದಿಂದ ಪಶುಪತಿನಾಥ ಮತ್ತಿತರ ಅನೇಕ ದೇವಾಲಯಗಳ ವೀಕ್ಷಣೆ ಸುಲಲಿತವಾಗಿ ಆಯಿತು. ಜತೆಗೆ ವಿಶ್ವ ಪಾರಂಪರಿಕ ತಾಣವಾಗಿ ಗುರುತಿಸಲ್ಪಟ್ಟಿರುವ ಭಕ್ತಪುರದಲ್ಲಿರುವ ಸನಾತನ ವೀರಶೈವ ಲಿಂಗಾಯತ ಪರಂಪರೆಯ ಕಾಶೀ ಪೀಠದ ಶಾಖಾ ಜಂಗಮ ಮಠಕ್ಕೆ ಭೇಟಿ ನೀಡಿ, ಅಲ್ಲಿರುವ ಡೋಲೇಶ್ವರ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಸಲ್ಲಿಸಿದೆವು.

ಮನಕಾಮನದೇವಿ, ಮುಕ್ತಿನಾಥ ಕ್ಷೇತ್ರಗಳು: ಪೂರ್ವ ನಿಗದಿಯಂತೆ ಮರುದಿವಸ ಆರಂಭವಾಗಬೇಕಿದ್ದ ಕೈಲಾಸ ಮಾನಸ ಸರೋವರ ಯಾತ್ರೆ ಆರಂಭವಾಗಲೇ ಇಲ್ಲ. ಕಾರಣ ಕೈಲಾಸ ಮಾನಸ ಸರೋವರವು ಚೀನಾ ದೇಶದ ಆಕ್ರಮಿತ ಪ್ರದೇಶದಲ್ಲಿರುವುದರಿಂದ ಯಾತ್ರೆಯನ್ನು ಆರಂಭಿಸುವ ಮೊದಲು ಅಲ್ಲಿನ ವೀಸಾ ಮತ್ತು ಅನುಮತಿ ಅತ್ಯಗತ್ಯ. ಯಾತ್ರೆಗೆ ಮೊದಲೇ ಅನುಮತಿ ದೊರೆತ್ತಿತ್ತಾದರೂ ವೀಸಾ ತಡವಾಗುತ್ತದೆ ಎಂಬ ಮಾಹಿತಿ ಬಂತು. ಆ ಸಮಯವನ್ನು ಸದುಪಯೋಗಪಡಿಸಿಕೊಳ್ಳಬೇಕೆಂದು, ಮನಕಾಮನಾದೇವಿ, ಮುಕ್ತಿನಾಥ ಕ್ಷೇತ್ರಗಳ ದರ್ಶನಕ್ಕೆ ಹೊರಟೆವು. ನೇಪಾಳದ ಗೋರ್ಕ್ಹಾ ಜಿಲ್ಲೆಯ ಸುಮಾರು 1,300 ಮೀಟರ್ ಎತ್ತರದಲ್ಲಿರುವ ಮನಕಾಮನಾದೇವಿ ದೇವಾಲಯಕ್ಕೆ ಕೇಬಲ್ ಕಾರ್ ಮೂಲಕ ಹೋಗಬೇಕು. ಸುತ್ತಲೂ ಬೆಟ್ಟ ಗುಡ್ಡಗಳು, ಹಚ್ಚಹಸಿರಾಗಿ ಕಂಗೊಳಿಸುವ ನಿಸರ್ಗ ರಮಣೀಯ ದೃಶ್ಯಗಳು, ಕೆಳಗೆ ಹರಿಯುವ ನದಿಯ ತಂಪಾದ ನೀರು, ಮೈಮನಗಳನ್ನು ರೋಮಾಂಚನಗೊಳಿಸುತ್ತವೆ. ಇವು

ಗಳನ್ನೆಲ್ಲ ಅನುಭವಿಸುತ್ತ ಬಂದು ದೇವಿಯ ದರ್ಶನ ಮಾಡಿ ಮುಂದೆ ಪ್ರಯಾಣ ಬೆಳೆಸಿದೆವು. ಅತ್ಯಂತ ಕಿರಿದಾದ ಗುಡ್ಡಗಳನ್ನು ಕೊರೆದು ನಿರ್ವಿುಸಿದ ದುರ್ಗಮ ಹಾದಿಯಲ್ಲಿ ಸಾಗಿ ಗಂಡಕಿ ನದಿಯ ದಂಡೆಯಲ್ಲಿರುವ ಮುಕ್ತಿನಾಥ ದೇವಾಲಯಕ್ಕೆ ಹೋದೆವು. ಆ ನದಿಯು ಪವಿತ್ರ ಸಾಲಿಗ್ರಾಮಗಳನ್ನು ವ್ಯಾಪಕವಾಗಿ ದೊರಕಿಸಿಕೊಡುವ ಅಪರೂಪದ ಪುಣ್ಯನದಿ. ಮುಕ್ತಿನಾಥವು ಒಂದು ಪ್ರಸಿದ್ಧ ಪವಿತ್ರ ತೀರ್ಥಸ್ಥಳ. ಅಲ್ಲಿ ಕರ್ಮಕುಂಡ, ಧರ್ಮಕುಂಡ ಎಂಬ ಎರಡು ಕುಂಡಗಳಿದ್ದು, ಮೊದಲು ಅವುಗಳಲ್ಲಿ ಸ್ನಾನ ಮಾಡಬೇಕು. ಕರ್ಮ ಕುಂಡದಲ್ಲಿ ಸ್ನಾನ ಮಾಡುವುದರಿಂದ ಮನುಷ್ಯನ ಪಾಪಕರ್ಮಗಳು ನಿವಾರಣೆಯಾಗುತ್ತವೆ ಎಂತಲೂ, ಧರ್ಮ ಕುಂಡದಲ್ಲಿ ಸ್ನಾನ ಮಾಡುವುದರಿಂದ ಪುಣ್ಯಪ್ರಾಪ್ತಿಯಾಗುತ್ತದೆ ಎಂತಲೂ ಪ್ರತೀತಿ ಇದೆ. ಸ್ನಾನ ಮಾಡಿದ ನಂತರ 108 ಪವಿತ್ರ ಜಲಧಾರೆಗಳ ಕೆಳಗೆ ಹೋಗಿ ಅವುಗಳ ಪವಿತ್ರ ಜಲವು ದೇಹದ ಮೇಲೆ ಬೀಳುವಂತೆ ನಡೆದುಕೊಂಡು ಬರಲಾಗುತ್ತದೆ. ಹಿಮ ಕರಗಿಯೇ ಈ ಎಲ್ಲ ನೀರು ಬರುವುದರಿಂದ ಅತ್ಯಂತ ತಂಪಾಗಿರುತ್ತದೆ. ಸ್ನಾನದ ನಂತರ ಆರಕ್ಷಕ ಮುಖ್ಯಸ್ಥರೊಬ್ಬರ ತಾತ್ಕಾಲಿಕ ನಿವಾಸದಲ್ಲಿಯೇ ಎಲ್ಲರೂ ಶಿವಪೂಜೆ ನೆರವೇರಿಸಿ, ಮುಕ್ತಿನಾಥ ದೇವರ ದರ್ಶನ ಪಡೆದೆವು.

ಅಲ್ಲಿಂದ ಮರಳಿ ಬರುವಷ್ಟರಲ್ಲಿ ವೀಸಾ ದೊರೆತು ಕೈಲಾಸ ಮಾನಸ ಸರೋವರ ಯಾತ್ರೆ ಆರಂಭವಾಗುತ್ತದೆ ಎಂಬ ನಿರೀಕ್ಷೆ ಮತ್ತೆ ಹುಸಿಯಾಯಿತು. ಮತ್ತೆ 2 ದಿನ ಕಳೆದರೂ ವೀಸಾ ಬರಲಿಲ್ಲ. ನಗರದ ನಡುವೆ ಇದ್ದ ಹೋಟೆಲ್ ಬಿಟ್ಟು ಎಲ್ಲ ಶ್ರೀಗಳೊಂದಿಗೆ ಭಕ್ತಪುರದ ಡೋಲೇಶ್ವರ ಮಂದಿರಕ್ಕೆ ಬಂದು ವಾಸ್ತವ್ಯ ಹೂಡಿದೆವು. ಅಲ್ಲಿ ಮುಕ್ತವಾದ ವಾತಾವರಣ, ಪ್ರಕೃತಿ ಸೌಂದರ್ಯ, ಬೆಟ್ಟ ಗುಡ್ಡಗಳು, ಪ್ರತಿದಿನ ಡೋಲೇಶ್ವರ ದೇವರ ದರ್ಶನ, ಭಜನೆ ಮನಸ್ಸಿಗೆ ಸಮಾಧಾನ ತಂದುಕೊಟ್ಟವು. ಪ್ರತಿದಿನ ಬೆಳಗ್ಗೆ ಮತ್ತು ಸಂಜೆ ಗುಡ್ಡಗಳ ಕಡಿದಾದ ದಾರಿಯಲ್ಲಿ ವಾಯುವಿಹಾರಕ್ಕೆ ಹೋಗುತ್ತಿದ್ದುದು ಮುಂದಿನ ಕೈಲಾಸ ಪರಿಕ್ರಮಕ್ಕೆ ದೈಹಿಕವಾಗಿ ನಮ್ಮನ್ನು ನಾವು ಸಜ್ಜುಗೊಳಿಸಿಕೊಳ್ಳಲು ಅನುಕೂಲವಾಯಿತು.

ಶಿವನ ಬಳಿಗೆ ಸಾಗುವಾಗ ಅವಲಂಬನೆ ಸಲ್ಲದು: ದಿನಗಳು ಕಳೆಯುತ್ತಿವೆ. ಆದರೆ ವೀಸಾ ಮಾತ್ರ ಬರಲೇ ಇಲ್ಲ. ಕಾಯುವುದಕ್ಕೂ ಒಂದು ಮಿತಿ ಇರುತ್ತದೆ. ಆ ಮಿತಿ ಮೀರಿದಾಗ ಧೃತಿಗೆಡುವುದು ಸಹಜ. ಆದ್ದರಿಂದ ಪೂರ್ವ ನಿಗದಿಯಂತೆ ಜೂ. 25ಕ್ಕೆ ಬೆಂಗಳೂರಿಗೆ ವಾಪಸ್ ಬರುವುದಕ್ಕಾಗಿ ಮಾಡಿಸಿದ್ದ ವಿಮಾನ ಟಿಕೆಟ್ ಹಾಗೇ ಇತ್ತು. ಅಷ್ಟರೊಳಗೆ ವೀಸಾ ಸಿಗದಿದ್ದರೆ ಮರಳಿ ಹೋಗುವ ನಿರ್ಧಾರ ಮಾಡಿದೆವು. ಜತೆಗೆ ಎಲ್ಲ ರೀತಿಯ ಪ್ರಯತ್ನಗಳನ್ನು ಮಾಡಿದೆವು. ಆದರೆ ‘ಸಮಯ ಸೇ ಪೆಹಲೇ ಔರ್ ಭಾಗ್ಯ ಸೇ ಅಧಿಕ ಕಿಸೀ ಕೋ ಕುಛ್ ನಹೀ ಮಿಲತಾ’ ಎಂಬ ಹಿಂದಿ ಉಕ್ತಿಯಂತೆ ಜೂ. 24ರ ಸಂಜೆ 6ರವರೆಗೂ ವೀಸಾದ ಸುಳಿವು ದೊರೆಯಲಿಲ್ಲ. 

ಪವಾಡವೆಂಬಂತೆ ರಾತ್ರಿ 9 ಗಂಟೆಗೆ ವೀಸಾ ಬರಲಿದೆ ಎಂಬ ಸುದ್ದಿ ಬಂತು. ಆದರೆ ನಮ್ಮ ಜತೆ ಬಂದಿದ್ದ ಸೇವಕ ವಿಶ್ವನ ವೀಸಾ ಮಾತ್ರ ಕಾರಣಾಂತರಗಳಿಂದ ಬರಲಿಲ್ಲ. ನಾವು ಪೀಠಾರೋಹಣ ಮಾಡಿದ ನಂತರ ಇದೇ ಮೊದಲ ಬಾರಿಗೆ ಸೇವಕನ ಸಹಾಯವಿಲ್ಲದೆ ಹೋಗುವ ಪರಿಸ್ಥಿತಿ ಎದುರಾಗಿತ್ತು. ‘ಶಿವನ ಬಳಿಗೆ ಸಾಗುವಾಗ ಯಾರನ್ನೂ ಅವಲಂಬಿಸಿರಬಾರದು’ ಎಂಬುದನ್ನು ಮನವರಿಕೆ ಮಾಡಿಕೊಡುವುದಕ್ಕಾಗಿ ಶಿವನೇ ಈ ತೆರನಾಗಿ ಮಾಡಿರಬಹುದೆಂದು ಭಾವಿಸಿ, ಜೂ. 25ರಂದು ಬೆಳಗಿನ ಜಾವ ಯಾತ್ರೆ ಪ್ರಾರಂಭಿಸಿದೆವು.

ನೇಪಾಳ-ಚೀನಾ ಬಾರ್ಡರ್​ಗೆ ಸಾಗುವ ದಾರಿ ವಿಶಾಲವಾದ ಪರ್ವತಗಳನ್ನು, ಬೆಟ್ಟಗುಡ್ಡಗಳನ್ನು ಸೀಳಿಕೊಂಡು ಸಾಗುತ್ತಿತ್ತು. ರಸ್ತೆಯ ಒಂದು ಕಡೆ 3-4 ಕಿ.ಮೀ. ಎತ್ತರದ ಗುಡ್ಡಗಳು, ಮತ್ತೊಂದೆಡೆ 3-4 ಕಿ.ಮೀ. ಆಳದ ಕಣಿವೆಗಳು. ಹೊರಗೆ ನೋಡಲು ಭಯವಾಗುತ್ತಿತ್ತು. ನೇಪಾಳದ ಗಡಿಯಲ್ಲಿ ವಲಸೆ ತಪಾಸಣೆ ಪೂರೈಸಿಕೊಂಡು ಚೀನಾ ಗಡಿ ಭಾಗಕ್ಕೆ ಬಂದೆವು. ಚೀನಾ ಎಲ್ಲ ದೃಷ್ಟಿಯಿಂದಲೂ ಮುಂದುವರೆದ ರಾಷ್ಟ್ರ. ತಪಾಸಣೆಗೆ ಸಂಬಂಧಿಸಿದಂತೆ ತಂತ್ರಜ್ಞಾನ, ಶಿಸ್ತು, ಅವರ ಬುದ್ಧಿವಂತಿಕೆ ಅನಾವರಣಗೊಂಡಿತ್ತು. 

ಆದರೆ ಕಾವಿಧಾರಿಗಳನ್ನು ಬಹಳ ಕುಬ್ಜ ಮನಸ್ಥಿತಿಯಿಂದ ನೋಡುತ್ತಿದ್ದರು. ದಲೈಲಾಮಾ ಜತೆೆ ಏನಾದರೂ ಸಂಬಂಧ ಹೊಂದಿದ್ದೇವೆಯೇ ಎಂಬ ಸಂಶಯದಿಂದ ನಮ್ಮ ಮೊಬೈಲ್ ಮತ್ತು ಲಗೇಜ್​ಗಳನ್ನು ವಿಶೇಷವಾಗಿ ಪರೀಕ್ಷೆಗೊಳಪಡಿಸಿದ್ದು, ಒಂದು ರೀತಿಯ ಕಸಿವಿಸಿ ಎನಿಸಿತು. ಆದರೆ ‘ತೇನ ವಿನಾ ತೃಣಮಪಿ ನ ಚಲತಿ’ ಎಂಬಂತೆ ಶಿವನಿಚ್ಛೆಗೆ ವಿರುದ್ಧವಾಗಿ ಒಂದು ಹುಲ್ಲುಕಡ್ಡಿಯೂ ಅಲುಗಾಡುವುದಿಲ್ಲ. ಹುಲು ಮಾನವರಾದ ಇವರೇನು ಮಾಡುವರು? ಎಂದು ಮನಸ್ಸಿನಲ್ಲಿ ಅಂದುಕೊಂಡು ನಿರುಮ್ಮಳ ಭಾವದಿಂದ ಸುಮ್ಮನೆ ನಿಂತಿದ್ದೆವು. ಕೆಲವು ಸಮಯದ ನಂತರ ಒಳಗೆ ಬರಲು ಅನುಮತಿಸಲಾಯಿತು. ಎಲ್ಲರಿಗೂ ಅನುಮತಿ ದೊರಕಿದ ಮೇಲೆ ಚೀನಾ ದೇಶದ ಗೈಡ್ ಮತ್ತು ಅಲ್ಲಿನ ವಾಹನಗಳಲ್ಲಿ ಪ್ರಯಾಣ ಆರಂಭಿಸಿದೆವು.