ಪ್ರಕರಣ-1: ಮಾಡಿದ ಸಾಲಕ್ಕೆ ಅಪ್ಪ ಮನೆ ಮಾರಬೇಕಾಯ್ತು!: ಮಗ ಮಾಡಿದ ಸಾಲಕ್ಕೆ ಅಪ್ಪ ಮನೆ ಮಾರಬೇಕಾಯ್ತು! : ಭೋಪಾಲ್ನ ಹರಿನಾಮ್ 2021ರಲ್ಲಿ ಸರ್ಕಾರಿ ನೌಕರಿಯಿಂದ ನಿವೃತ್ತರಾದರು. ಜನರಲ್ ಪ್ರಾವಿಡೆಂಟ್ ಫಂಡ್ನಿಂದ ದೊರೆತ 30 ಲಕ್ಷ ರೂಪಾಯಿಗಳಲ್ಲಿ ಮನೆ ಕಟ್ಟಿಸಿದರು. ನಿವೃತ್ತಿಯ ದಿನಗಳಲ್ಲಾದರೂ ನೆಮ್ಮದಿಯಿಂದ ಸ್ವಂತ ಮನೆಯಲ್ಲಿ ಇರಬೇಕೆಂಬ ಬಯಕೆಯಿಂದ ಕಷ್ಟಪಟ್ಟು ಮನೆ ಕಟ್ಟಿಸಿದರು. ಕಿರಾಣಿ ಅಂಗಡಿ ನಡೆಸುತ್ತಿದ್ದ ಇವರ ಮಗ, ಕಡಿಮೆ ಸಮಯದಲ್ಲಿ ಹೆಚ್ಚು ದುಡ್ಡು ಮಾಡಬೇಕೆಂಬ ಹುಚ್ಚಿನಲ್ಲಿ ಕ್ರಿಕೆಟ್ ಬೆಟ್ಟಿಂಗ್ನಲ್ಲಿ ಹಣ ಹಾಕಿದ. ಮೇಲಿಂದ ಮೇಲೆ ಹಣ ಕಳೆದುಕೊಂಡರೂ, ಸ್ನೇಹಿತರ ಬಳಿ ಸಾಲ ಮಾಡಿ ಬೆಟ್ಟಿಂಗ್ ಮುಂದುವರಿಸಿದ. 2023ರಲ್ಲಿ ಮಗನ ಸ್ನೇಹಿತರು ಸಾಲ ವಸೂಲಾತಿಗಾಗಿ ಮನೆಗೆ ಬಂದಾಗಲೇ, ಹರಿರಾಮ್ ಅವರಿಗೆ ಕರಾಳಸತ್ಯ ಗೊತ್ತಾಗಿದ್ದು. ಸಾಲ ಹೆಚ್ಚಾಗಿದ್ದರಿಂದ ಇದ್ದ ಒಂದು ಕಿರಾಣಿ ಅಂಗಡಿಯನ್ನು ಮುಚ್ಚಿದ್ದನ್ನೂ ಮನೆಯಲ್ಲಿ ಹೇಳಿರಲಿಲ್ಲ. ಪ್ರತಿನಿತ್ಯ ಐದು ಸಾವಿರ ರೂಪಾಯಿ ಬಡ್ಡಿಗೆ ಪಡೆದ 10 ಲಕ್ಷ ರೂಪಾಯಿಯನ್ನೂ ಬೆಟ್ಟಿಂಗ್ನಲ್ಲಿ ಕಳೆದುಕೊಂಡಿದ್ದ. ಬಡ್ಡಿ, ಅಸಲು ಸೇರಿ ಒಟ್ಟು ಸಾಲ 35 ಲಕ್ಷ ರೂಪಾಯಿಗೆ ತಲುಪಿತ್ತು. ಸಾಲಗಾರರ ಕಾಟ ಜಾಸ್ತಿಯಾದಾಗ ಹರಿರಾಮ್ ಮುಂದೆ ಬೇರೆ ಯಾವುದೇ ಆಯ್ಕೆಗಳೇ ಇರಲಿಲ್ಲ. ತುಂಬ ಕಷ್ಟಪಟ್ಟು ಕಟ್ಟಿಸಿದ್ದ ಹೊಸ ಮನೆಯನ್ನೇ ಮಾರಾಟ ಮಾಡಿ, ಹಣ ಹಿಂತಿರುಗಿಸಿದ್ದಾರೆ. ಆದರೂ, ಸಾಲ ಇನ್ನೂ ಉಳಿದುಕೊಂಡಿದೆ.
