ಸ್ನೇಹ, ಮೈತ್ರಿ, ದೋಸ್ತಿ, ಫ್ರೆಂಡ್ಶಿಪ್ ಎಂದೆಲ್ಲ ಹೇಳಲಾಗುವ ಈ ಗೆಳೆತನ ಎಂಬುವುದೇ ಒಂದು ಅದ್ಭುತ ಭಾವ-ಬಾಂಧವ್ಯ. ಇದು ಎಲ್ಲಿಂದ ಬೇಕಾದರೂ ಶುರುವಾಗಬಹುದು, ಯಾರ ಜತೆಗಾದರೂ ಉಂಟಾಗಬಹುದು. ವಯಸ್ಸು, ಜಾತಿ, ಮತ, ಅಧಿಕಾರ, ಅಂತಸ್ತು, ಧರ್ಮ ಇದ್ಯಾವುದರ ಹಂಗೂ ಇಲ್ಲದೆ ಮನುಷ್ಯನನ್ನು ಬೆಸೆಯುವ ಒಂದು ಬೆಸುಗೆ ಈ ಸ್ನೇಹ. ಒಮ್ಮೆ ಸ್ನೇಹಿತರಾದರೆ ಜೀವನಪರ್ಯಂತ ಸ್ನೇಹಿತರಾಗೇ ಇರುವವರೂ ಇದ್ದಾರೆ. ಮಾತ್ರವಲ್ಲ ಬದುಕಿನುದ್ದಕ್ಕೂ ಆಯಾ ಹಂತಕ್ಕೆ ಅನುಗುಣವಾಗಿ ಹೊಸಹೊಸ ಸ್ನೇಹಿತರು ಸಿಗುತ್ತಲೇ ಇರುತ್ತಾರೆ. ಸ್ನೇಹ ಗಾಢವಾಗಿದ್ದರೆ ಜೀವನದಲ್ಲಿ ನೆರಳು-ಫಲ ಕೊಡುವಂಥ ಕಲ್ಪತರು ಈ ಸ್ನೇಹಿತರು. ಅಂಥ ಸ್ನೇಹ-ಸ್ನೇಹಿತರಿಗೆಂದೇ ಮೀಸಲಾದ ದಿನ ಇಂದು. ಈ ಸಂದರ್ಭದಲ್ಲಿ ತಮ್ಮ ಪ್ರಾಣಸ್ನೇಹಿತರ ಕುರಿತು ಸೆಲೆಬ್ರಿಟಿಗಳು ಮತ್ತು ಅವರ ಸ್ನೇಹಿತರು ಇಲ್ಲಿ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ.
