ಮಕ್ಕಳು ಬೆಳೆಯುತ್ತ ಸಾಗಿದಂತೆ ಅವರಿಗೆ ಹಂತ ಹಂತವಾಗಿ ಕೆಲ ನಿರ್ಬಂಧ ಹಾಗೂ ನಿಯಮಗಳನ್ನು ಜಾರಿಗೊಳಿಸುತ್ತ ಬರಬೇಕು. ದೊಡ್ಡವರಾಗುವವರೆಗೆ ಕಾಯಬಾರದು. ಬಾಲ್ಯದಿಂದಲೇ ಬದುಕಿನ ಮೌಲ್ಯಗಳು, ಸೂಕ್ತ ದಿನಚರಿ, ಸಕಾರಾತ್ಮಕ ಚಿಂತನೆ, ಸರಿಯಾದ ನಡವಳಿಕೆ ಅಳವಡಿಸಿಕೊಳ್ಳುವಂತೆ ಮಾಡುವುದು ಸೂಕ್ತ. ಇದರ ಜತೆ ಜತೆಗೆ ಮಕ್ಕಳೆದುರು ದೊಡ್ಡವರು ಜಗಳಾಡುವುದು, ಅಶ್ಲೀಲ ಪದ ಬಳಸುವುದು, ಧೂಮಪಾನ ಮೊದಲಾದ ವ್ಯಸನಗಳನ್ನು ಮಾಡುವುದು ಸಲ್ಲದು. ಮಕ್ಕಳಿಗೆ ಅವರು ನೋಡುವ ಪ್ರತಿ ವಿಷಯವೂ ಜೀವನದಲ್ಲಿ ಮೊತ್ತ ಮೊದಲಾಗಿ ನೋಡುತ್ತಿರುವ ವಿಷಯವಾಗಿದ್ದು ಇದು ಸರಿಯೋ ತಪ್ಪೋ ಎಂದು ನಿರ್ಧರಿಸಲೂ ಸಾಧ್ಯವಾಗದ ಮನಸ್ಸನ್ನು ಹೊಂದಿರುತ್ತಾರೆ. ಎಲ್ಲಿಯವರೆಗೆ ಇದು ತಪ್ಪು ಎಂದು ಪಾಲಕರು ಸ್ಪಷ್ಟವಾಗಿ ಹೇಳುವುದಿಲ್ಲವೋ ಅಲ್ಲಿಯವರೆಗೂ ಆ ವಿಷಯವನ್ನು ಅವರು ಸರಿ ಎಂದೇ ತಿಳಿಯಬಹುದು. ಉದಾಹರಣೆಗೆ, ಬೆಂಕಿಯ ಜ್ವಾಲೆ. ಮೊದಲ ಬಾರಿಗೆ ನೋಡುವ ಮಗುವಿಗೆ ಜ್ವಾಲೆ ಬಿಸಿ ಇದೆ ಎಂದೇ ತಿಳಿದಿರುವುದಿಲ್ಲ. ನೋಡಲು ಸುಂದರವಾಗಿರುವ ಕಾರಣ ಇದನ್ನು ಮುಟ್ಟಲು ಹೋಗಬಹುದು. ಇದೇ ರೀತಿಯಾಗಿ ವಿದ್ಯುತ್ ಸಾಕೆಟ್ಗಳು. ಮಕ್ಕಳು ಕುತೂಹಲದಿಂದ ಮೊಳೆ ಮೊದಲಾದವುಗಳನ್ನು ಇದರಲ್ಲಿ ತೂರಿಸಲು ಯತ್ನಿಸಬಹುದು. ಆಗ ಅನಾಹುತ ಸಂಭವಿಸಿದರೆ ಯಾರು ಹೊಣೆ. ಮತ್ತದೇ ಪಾಲಕರು.
