ಪರಿಸರಸ್ನೇಹಿ ಹಬ್ಬಕ್ಕೆ ಸಿದ್ಧರಾಗೋಣ; ಮಕ್ಕಳೂ ಮಾಡಬಹುದು ಗಣೇಶ ಮೂರ್ತಿ

ವಿದ್ಯೆ-ಬುದ್ಧಿಯ ಅಧಿಪತಿ ಗಣೇಶನಿಗೆ ಜೈ ಎಂದು ಸಂಭ್ರಮಿಸುವ ಗಣೇಶ ಚತುರ್ಥಿ ಬಂದೇ ಬಿಟ್ಟಿತು. ಪ್ರತಿವರ್ಷದಂತೆ ಅಂದ-ಚಂದದ, ತರಾವರಿ ಬಣ್ಣದ ಗಣೇಶನ ಮೂರ್ತಿಯನ್ನು ಮನೆಗೆ ತಂದು ಪೂಜಿಸುವುದೆಂದರೆ ಮಕ್ಕಳಿಗೆ ಎಲ್ಲಿಲ್ಲದ ಉತ್ಸಾಹ. ಈ ಉತ್ಸಾಹವನ್ನು ಇಮ್ಮಡಿಗೊಳಿಸುವ ಹಾಗೂ ಎಲ್ಲರೂ ಸೇರಿ ಆರೋಗ್ಯಕರ ಹಬ್ಬ ಆಚರಿಸುವ ಪ್ರತಿಜ್ಞೆ ಮಾಡೋಣ. ಹೇಗೆ ಅನ್ನುತ್ತೀರಾ.. ಮಕ್ಕಳೇ ಸಿದ್ಧಪಡಿಸುವ ಪರಿಸರಸ್ನೇಹಿ ಗಣೇಶನನ್ನು ಪೂಜಿಸುವ ಮೂಲಕ. ಇದು ಹೇಗೆ ಎಂಬ ಪ್ರಶ್ನೆಗೆ ಉತ್ತರ ಇಲ್ಲಿದೆ...

| ಕೆ.ಬಿ. ಶುಭ ಬೆಂಗಳೂರು

ರಾಸಾಯನಿಕ ಬಣ್ಣಗಳಿಂದ ಸಿದ್ಧಪಡಿಸಿದ ಗಣೇಶನ ಮೂರ್ತಿ ಬಳಕೆ ನಿಷೇಧಿಸಿದ ಮೇಲೆ ಪರಿಸರಸ್ನೇಹಿ ಗಣೇಶ ವಿಗ್ರಹಕ್ಕೆ ಬೇಡಿಕೆ ಹೆಚ್ಚಿದೆ. ಪರಿಸರಸ್ನೇಹಿ ವಿಗ್ರಹಗಳು 4 ಇಂಚಿನಿಂದ 20 ಇಂಚಿನವರೆಗೂ ಇರುತ್ತವೆ. ಮಕ್ಕಳು ತಮ್ಮ ಆಸಕ್ತಿಯ ಮೇರೆಗೆ ಗಾತ್ರ ನಿಗದಿಪಡಿಸಿಕೊಳ್ಳಬಹುದು. ಪರಿಸರಸ್ನೇಹಿ ಗಣಪನ ತಯಾರಿಗೆ ಮುಖ್ಯವಾಗಿ ಬೇಕಾಗಿರುವುದು ಜೇಡಿ ಮಣ್ಣು/ ಕೆರೆ ಮಣ್ಣು. ಆದರೆ ನಗರ ಪ್ರದೇಶದ ಕೆರೆಗಳಲ್ಲಿ ಸಿಗುವ ಮಣ್ಣಿನಿಂದ ವಿಗ್ರಹ ಮಾಡಲು ಸಾಧ್ಯವಾಗುವುದಿಲ್ಲ. ಆದ್ದರಿಂದ ಹಳ್ಳಿಯ ಕೆರೆ/ ಗದ್ದೆೆಗಳ ಮಣ್ಣನ್ನು ತರಬೇಕಾಗುತ್ತದೆ ಎನ್ನುತ್ತಾರೆ ಪರಿಸರ ಸ್ನೇಹಿ ಗಣೇಶ ವಿಗ್ರಹ ತಯಾರಕ ಮಹೇಶ್ ಕುಂಬಾರ.

ತಯಾರಿ ತರಬೇತಿ: ಬೆಂಗಳೂರಿನ ಹನುಮಂತನಗರದಲ್ಲಿರುವ ರಾಮಾಂಜನೇಯ ಗುಡ್ಡದಲ್ಲಿ ಭಾನುವಾರ (ಸೆ.5) ದಂದು ಬೆಳಗ್ಗೆ 9.30ರಿಂದ ಪರಿಸರ ಸ್ನೇಹಿ ಗಣಪತಿ ತಯಾರಿ ತರಬೇತಿಯನ್ನು ಪ್ರಯೋಗ ಮಂಟಪ ಹಾಗೂ ರಂಗ ಚಂದಿರ ತಂಡ ಆಯೋಜಿಸುತ್ತಿವೆ. ಜೇಡಿಮಣ್ಣು ಹಾಗೂ ಅಡಿಕೆ ತಟ್ಟೆಯನ್ನು ಸ್ಥಳದಲ್ಲೇ ನೀಡಲಾಗುವುದು. ನೋಂದಣಿಗೆ 9113081894 ಸಂರ್ಪಸಿ.

ವಿಗ್ರಹ ಸಿದ್ಧಪಡಿಸುವುದು ಹೇಗೆ?

• ಜೇಡಿ ಮಣ್ಣು/ ಕೆರೆ ಮಣ್ಣನ್ನು ಒಂದು ಮುಷ್ಟಿಯಷ್ಟು ತೆಗೆದುಕೊಂಡು ಚಪಾತಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಸಿದ್ಧಮಾಡಿಕೊಳ್ಳಬೇಕು.
• ಪಿರಮಿಡ್ ಆಕಾರದಲ್ಲಿ ಸ್ವಲ್ಪ ಮಣ್ಣನ್ನು ತೆಗೆದುಕೊಂಡು ಅದಕ್ಕೆ ಹೊಟ್ಟೆ ರೂಪ ನೀಡಬೇಕು.
• ಪಿರಮಿಡ್​ಗೆ ತೆಗೆದುಕೊಂಡ ಮಣ್ಣಿನಲ್ಲಿ 2 ಭಾಗ ಮಾಡಿ ಕೊಂಡು ತೊಡೆ ಹಾಗೂ ಕಾಲಿನ ರೂಪ ನೀಡಬೇಕು.
• ಒಂದು ಕಾಲಿನ ಭಾಗಕ್ಕೆ ತೆಗೆದುಕೊಂಡ ಮಣ್ಣಿನ ಅರ್ಧಭಾಗದಿಂದ ಕೈ ಭಾಗ ರೂಪಿಸಿಕೊಳ್ಳಬೇಕು.
• ಕಾಲಿನ ಭಾಗಕ್ಕೆ ತೆಗೆದುಕೊಂಡ ಮಣ್ಣಿನ ಪ್ರಮಾಣಕ್ಕಿಂತ ಸ್ವಲ್ಪ ಜಾಸ್ತಿ ತೆಗೆದುಕೊಂಡು ಸೊಂಡಿಲ ರೂಪ ನೀಡಬೇಕು.
• ಕೈಭಾಗಕ್ಕೆ ತೆಗೆದುಕೊಂಡಷ್ಟು ಮಣ್ಣನ್ನು ತೆಗೆದುಕೊಂಡು ಕಿವಿ ಭಾಗ ಮಾಡಿಕೊಳ್ಳಬೇಕು.
• ನಂತರ ಎಲ್ಲ ಭಾಗಗಳನ್ನು ಜೋಡಿಸಿ, ಸ್ವಲ್ಪ ಮೆತ್ತಗಿನ ಮಣ್ಣಿನಿಂದ (ಕೆಸರು ನೀರು/ ಮಣ್ಣು) ಕೋಟ್ ನೀಡಬೇಕು. ಹೀಗೆ ಮಾಡುವುದರಿಂದ ಮಣ್ಣು ಬಿರುಕು ಬಿಡುವುದಿಲ್ಲ.
• ಮುಖದ ಆಕಾರವನ್ನು ಕೈನಲ್ಲೇ ರೂಪಿಸಬೇಕು. ಮೂರ್ತಿಯ ರೂಪ ಮುಗಿದ ನಂತರ ಕಣ್ಣಿನ ರೂಪಕ್ಕೆ ಕಾಡಿಗೆ/ ಗೋದಿ ಮಣಿಯಿಂದ ಅಲಂಕಾರ ಮಾಡಬಹುದು. ದಂತಕ್ಕೆ ಟೂಥ್ ಪಿಕ್ ಬಳಸಬಹುದು.
• ಮಣ್ಣಿನ ಮೂರ್ತಿ ಗಾಳಿಯಲ್ಲಿ ಒಂದು ದಿನಕ್ಕೆ ಸ್ವಲ್ಪ ಒಣಗು ತ್ತದೆ. ಸಂಪೂರ್ಣವಾಗಿ ಒಣಗಲು ಕನಿಷ್ಠ 2-3 ದಿನ ಬೇಕು.

ಜೇಡಿ ಮಣ್ಣು ಎಲ್ಲಿ ಸಿಗುತ್ತದೆ?: ಇತ್ತೀಚಿನ ದಿನಗಳಲ್ಲಿ ಆನ್​ಲೈನ್​ನಲ್ಲೂ ಜೇಡಿ ಮಣ್ಣು ಸಿಗುತ್ತದೆ. ಬೆಂಗಳೂರಿನ ಮಕ್ಕಳು ಏರ್​ಪೋರ್ಟ್​ರಸ್ತೆ, ಫ್ರೇಜರ್ ರಸ್ತೆ ಹಾಗೂ ಸಮೀಪದ ಸ್ಥಳಗಳಿಗೆ ಮಹೇಶ್ ಕುಂಬಾರ- 6366002825, ರಾಜಾಜಿನಗರ ಹಾಗೂ ಸಮೀಪದ ಪ್ರದೇಶಗಳಿಗೆ ಸಮರ್ಪಣಾ ಸಂಸ್ಥೆ - 9606402979 ಸಂರ್ಪಸಬಹುದು.

| ಶಿವಕುಮಾರ್ ಹೊಸಮನಿ ಸಮರ್ಪಣಾ ಸಂಸ್ಥೆ ಅಧ್ಯಕ್ಷ

| ಮಯೂಖಾ ಎ ಕೌಶಿಕ್ 7ನೇ ತರಗತಿ, ಪೂರ್ಣಪ್ರಮತಿ ಶಾಲೆ