ಮೇಲೆ ಹೇಳಿದ ಕೃಷಿ ಮತ್ತು ಎಂಎಸ್ಎಂಇ ಕ್ಷೇತ್ರಗಳು ಭಾರತದ ಎರಡು ದೊಡ್ಡ ಉದ್ಯೋಗದಾತರು ಎಂಬುದನ್ನು ನೆನಪಿಡಿ. ಈ ಎರಡು ಕ್ಷೇತ್ರಗಳ ಸುಧಾರಣೆಗಳು ಭಾರತದ ಭವಿಷ್ಯಕ್ಕೆ ಪೂರಕ. ಮತ್ತೊಂದೆಡೆ, ಕಲ್ಲಿದ್ದಲು, ಗಣಿಗಾರಿಕೆ, ರಕ್ಷಣೆ, ವಿಮಾನಯಾನ ಮತ್ತು ಬಾಹ್ಯಾಕಾಶದಂತಹ ಪ್ರಮುಖ ಕ್ಷೇತ್ರಗಳಲ್ಲಿ ಸಾರ್ವತ್ರಿಕವಾಗಿ ಶ್ಲಾಘಿಸಲ್ಪಟ್ಟ ಸುಧಾರಣೆಗಳು ಸರ್ಕಾರದ ಸುಧಾರಣಾವಾದಿ ಹಾದಿಯನ್ನು ತೋರಿಸಿದೆ. ಈ ವರ್ಷದ ಆರಂಭದಲ್ಲಿ ಆರ್ಬಿಐ ಕೈಗೊಂಡ ಹಣದ ಹರಿವಿನ ಕ್ರಮಗಳು ಮತ್ತು 20 ಲಕ್ಷ ಕೋಟಿ ರೂ. ಆರ್ಥಿಕ ಪ್ಯಾಕೇಜ್ ಕೋವಿಡ್ ನಂತರದ ಭಾರತದ ಬೆಳವಣಿಗೆಗೆ ವಾಹಕ ಆಗಲಿವೆ. ಇಂಥ ಮಹತ್ವದ ಹೆಜ್ಜೆಗಳ ಹೊರತಾಗಿಯೂ, ನಿರೂಪಕ ವರ್ಗದ ಕೆಲವರು ಮತ್ತು ರಾಜಕೀಯ ಪಕ್ಷಗಳ ಕೆಲವರು ಪ್ರಧಾನಿ ನರೇಂದ್ರ ಮೋದಿಯವರನ್ನು ವಿರೋಧಿಸುತ್ತಿದ್ದಾರೆ. ಮೊದಲನೆಯದಾಗಿ, ಸರ್ಕಾರವು ಜನರ ಕೈಗೆ ಹಣವನ್ನೇ ಕೊಟ್ಟಿಲ್ಲ ಎಂದು ಅವರು ಹೇಳುತ್ತಾರೆ. ಬಹುಶಃ ಇವರಿಗೆ ಸ್ಮರಣ ಶಕ್ತಿ ಕಡಿಮೆ ಎನಿಸುತ್ತದೆ. ಸರ್ಕಾರವು ಬಡವರಿಗಾಗಿ ಘೊಷಿಸಿದ ಆರಂಭಿಕ ಪರಿಹಾರ ಪ್ಯಾಕೇಜ್ ‘ಪ್ರಧಾನ ಮಂತ್ರಿ ಗರೀಬ್ ಕಲ್ಯಾಣ್ ಪ್ಯಾಕೇಜ್’ 1.7 ಲಕ್ಷ ಕೋಟಿ ರೂ.ಗಳದ್ದು. ಇದು ಯುಪಿಎ ಕಾಲದಂತೆ ಕೇವಲ ಘೊಷಣೆಯಾಗಿ ಉಳಿದಿಲ್ಲ. ಈಗಾಗಲೇ 39 ಕೋಟಿಗೂ ಹೆಚ್ಚು ಫಲಾನುಭವಿಗಳು ಸುಮಾರು 35,000 ಕೋಟಿ ರೂ.ಗಳನ್ನು ಪಡೆದಿದ್ದಾರೆ. ಇದರಲ್ಲಿ ತಮ್ಮ ಖಾತೆಗಳಿಗೆ 2,000 ರೂ. ಪಡೆದ 8 ಕೋಟಿ ರೈತರು ಮತ್ತು ಮೊದಲ ಹಾಗೂ ಎರಡನೆಯ ಕಂತುಗಳ ನೆರವು ಪಡೆದ 20 ಕೋಟಿ ಜನಧನ್ ಖಾತೆ ಹೊಂದಿರುವ ಮಹಿಳೆಯರು ಸೇರಿದ್ದಾರೆ. ‘ಪ್ರಧಾನ ಮಂತ್ರಿ ಗರೀಬ್ ಕಲ್ಯಾಣ್ ಅನ್ನ’ ಯೋಜನೆಯಡಿ 80 ಕೋಟಿ ಬಡ ಜನರನ್ನು ಎನ್ಎಫ್ಎಸ್ಎ ವ್ಯಾಪ್ತಿಗೆ ಒಳಪಡಿಸಲಾಗಿದೆ, ಪ್ರತಿ ವ್ಯಕ್ತಿಗೆ 5 ಕೆಜಿ ಆಹಾರ ಧಾನ್ಯ ಮತ್ತು ಪ್ರತಿ ಕುಟುಂಬಕ್ಕೆ 1 ಕೆಜಿ ದ್ವಿದಳ ಧಾನ್ಯಗಳನ್ನು ನೀಡಲಾಗುತ್ತಿದೆ. ಇವುಗಳು ಯಾವುದೇ ಸೋರಿಕೆಯಿಲ್ಲದೆ ನೇರವಾಗಿ ಜನರನ್ನು ತಲುಪುತ್ತಿವೆ.
