ಕೆಲವು ವರ್ಷಗಳ ಹಿಂದೆ ಸಾಧನೆ ಮಾಡುವುದಕ್ಕೆ ಹೆಚ್ಚು ಸೌಲಭ್ಯಗಳಿರಲಿಲ್ಲ. ಈಗ ಆ ಪರಿಸ್ಥಿತಿ ಇಲ್ಲ. ಇವತ್ತು ಸೌಲಭ್ಯಗಳು ಹೆಚ್ಚುತ್ತಿವೆ. ಆದರೆ, ಜೀವನದಲ್ಲಿ ಏನೂ ಸಾಧನೆ ಮಾಡುವುದನ್ನು ಬಿಟ್ಟು, ದುಶ್ಚಟಗಳನ್ನು ಬೆಳೆಸಿಕೊಳ್ಳುತ್ತಿದ್ದೇವೆ. ಕುಡಿತ, ಸಿಗರೇಟ್, ಡ್ರಗ್ಸ್... ಹೀಗೆ ಬೇಡದ ಚಟಗಳನ್ನು ರೂಢಿಸಿಕೊಂಡು ಅದರ ದಾಸರಾಗುತ್ತಿದ್ದೇವೆ. ಮನುಷ್ಯನಿಗೆ ಕೆಲವು ಕಾಯಿಲೆಗಳು ವಂಶಪಾರಂಪರ್ಯವಾಗಿ ಬರುತ್ತವೆ. ಅದನ್ನು ಏನು ಮಾಡುವುದಕ್ಕೆ ಸಾಧ್ಯವಿಲ್ಲ. ಆದರೆ, ಯಾವ ಸಮಸ್ಯೆ ಇಲ್ಲದಿದ್ದರೂ ದುಶ್ಚಟಗಳಿಂದ ಕಾಯಿಲೆಗೆ ಒಳಗಾಗುವುದಿದೆಯಲ್ಲ, ಅದು ದುರಂತ. ವಂಶಪಾರಂಪರ್ಯವಾಗಿ ಬರುವ ಕಾಯಿಲೆಗಳನ್ನು ನಾವು ತಡೆಯುವ ಸಾಧ್ಯತೆ ಇದೆ. ಅವು ಬಂದರೂ, ಒಂದಿಷ್ಟು ವಯಸ್ಸಿನ ನಂತರ ಬರುತ್ತವೆ. ಆದರೆ, ದುಶ್ಚಟಗಳನ್ನು ಕಲಿಯುವುದರಿಂದ, ತಂದೆ-ತಾಯಿಯಿಂದ ಬರುವ ಕಾಯಿಲೆಗಳಿಗೆ ಬಹಳ ಬೇಗ ಬಾಗಿಲು ತೆರೆಯುತ್ತಿದ್ದೇವೆ. ಇವತ್ತು ಜೀವನದಲ್ಲಿ ಏನೋ ಮಾಡಬೇಕು, ಸಾಧಿಸಬೇಕು ಎಂದು ಆಸೆಪಡುವವರಲ್ಲಿ ಹೆಣ್ಮಕ್ಕಳೇ ಹೆಚ್ಚು. ಹೀಗೆ ಸಾಧನೆಯ ಹಂಬಲ ಇರುವ 100 ಜನರಲ್ಲಿ ಹೆಣ್ಮಕ್ಕಳ ಸಂಖ್ಯೆ 15 ಇದ್ದರೆ, ಗಂಡುಮಕ್ಕಳ ಸಂಖ್ಯೆ 5 ಮಾತ್ರ. ಮಿಕ್ಕವರೆಲ್ಲರೂ ಯಾವುದೋ ಚಟಕ್ಕೆ ದಾಸರಾಗಿ, ಏನೋ ಒಂದು ನೆಪ ಹೇಳಿಕೊಂಡು ಓಡಾಡುತ್ತಿದ್ದಾರೆ. ನಮ್ಮ ತಂದೆ ದಿನಾಲೂ ಕುಡಿದು ಬರುತ್ತಾರೆ ಅಂತಲೋ, ನಮ್ಮನೆಯಲ್ಲಿ ಯಾವಾಗಲೂ ಜಗಳವಾಗುತ್ತಿರುತ್ತದೆ ಅಂತಲೋ ಅಥವಾ ಇನ್ಯಾವುದೋ ಕಾರಣಕ್ಕೆ ಮತ್ತು ಅದನ್ನು ಮರೆಯುವುದಕ್ಕೆ ಕುಡಿತಕ್ಕೆ ದಾಸರಾಗಿರುವ ಹಲವರನ್ನು ನೋಡಿರಬಹುದು. ತಂದೆ ಕುಡಿಯುತ್ತಾರೆ ಎಂಬ ಬೇಸರದಲ್ಲಿ ನೀವು ಸಹ ಕುಡಿದು ನಿಮ್ಮ ಸಂಸಾರ ಹಾಳು ಮಾಡಿಕೊಂಡರೆ ಏನು ಬಂದ ಹಾಗಾಯಿತು? ಅದೊಂದು ನೆಪ ಅಷ್ಟೇ. ಶೋಕಿ ಅಥವಾ ದುರಭ್ಯಾಸಗಳಿಗೆ ಒಂದು ಕುಂಟುನೆಪ ಮಾಡಿಕೊಳ್ಳಬೇಡಿ. ಅದರಿಂದ ಹೊರಬಂದು, ಜೀವನದಲ್ಲಿ ಏನಾದರೂ ಸಾಧಿಸುವ ಬಗ್ಗೆ ಯೋಚನೆ ಮಾಡಿ.
