ಹಣ, ಅಧಿಕಾರ, ಹೆಸರೇ ನಿಜವಾದ ಬದುಕಲ್ಲ: ವೇಗದ ಬದುಕಿನಲ್ಲಿ ಮನುಷ್ಯ ಹಣ, ಅಧಿಕಾರ ಮತ್ತು ಹೆಸರು ಸಂಪಾದನೆಯೇ ನಿಜವಾದ ಬದುಕು, ಅರ್ಥಪೂರ್ಣ ಜೀವನ ಎಂದು ತಿಳಿದಿದ್ದಾನೆ. ಆದರೆ ಇದು ನಿಜವಲ್ಲ. ಯಾವುದೇ ಕೆಲಸದಲ್ಲಿ ಪರೋಪಕಾರ ಇದ್ದರೆ ಅದು ಸಾರ್ಥಕ ಬದುಕು ಎನ್ನಿಸಿಕೊಳ್ಳುತ್ತದೆ. ಪೋಷಕರು ತಾವು ಮಾಡಲಾಗದ್ದನ್ನು ಮಕ್ಕಳು ಮಾಡಲಿ ಎಂದು ಬಯಸುತ್ತಾರೆ. ತಮ್ಮ ಮಕ್ಕಳು ಶಾಲೆಯಲ್ಲಿ ಅಧಿಕ ಅಂಕ ಪಡೆಯಬೇಕು, ಉನ್ನತ ಉದ್ಯೋಗ ಹೊಂದಬೇಕು, ಹೊರದೇಶಕ್ಕೆ ಹೋಗಿ ನೆಲೆಸಬೇಕು, ಹಣ, ಅಧಿಕಾರ ಸಂಪಾದಿಸಬೇಕು ಎಂದು ಯೋಚಿಸುತ್ತಾರೆ. ಬರೀ ಇಷ್ಟನ್ನು ಮಾತ್ರ ಯೋಚಿಸದೆ, ಮಕ್ಕಳಿಗೆ ಪರಿಸರ ಹಾಗೂ ಸಂಬಂಧಗಳ ಬಗ್ಗೆ ಅರಿವು ಹಾಗೂ ಪ್ರೀತಿ ಮೂಡಿಸಬೇಕು. ಯಾರು ಪರಿಸರ ಹಾಗೂ ಸಂಬಂಧಗಳನ್ನು ಪ್ರೀತಿಸುತ್ತಾರೋ, ಗೌರವಿಸುತ್ತಾರೋ ಅವರು ಉತ್ತಮ ರೀತಿಯಲ್ಲಿ ಬದುಕು ನಡೆಸುತ್ತಾರೆ. ‘ಇಲ್ಲಿ ಪಡೆದುಕೊಂಡಿದ್ದನ್ನು ಇಲ್ಲಿಯೇ ಬಿಟ್ಟು ಹೋಗಬೇಕು’ ಎಂಬ ನಿಜವನ್ನು ತಿಳಿದಾಗ ಮನುಷ್ಯನ ಬದುಕಿಗೆ ಹೊಸ ಅರ್ಥ ಬರುತ್ತದೆ; ಜೀವನದ ಕುರಿತ ದೃಷ್ಟಿಕೋನ ಬದಲಾಗುತ್ತದೆ.
