ಪ್ರತಿಯೊಂದು ದೇಶ, ಪ್ರದೇಶಗಳ ಮೇಲೆ ಅಲ್ಲಿನ ಭೌಗೋಳಿಕತೆ ಪ್ರಭಾವ ಬೀರುತ್ತದೆ. ಇವುಗಳನ್ನು ಗೌರವಿಸಿ ಸ್ಥಳೀಯವಾರು ಆಹಾರವನ್ನು ಅವಲಂಬಿಸಿದರೆ ಮುಕ್ಕಾಲು ಆರೋಗ್ಯ ಸಮಸ್ಯೆ ಪರಿಹಾರವಾದಂತೆ. ತಲೆ ತಲೆ ಮಾರುಗಳಿಂದ ನಮ್ಮ ಪೂರ್ವಜರ ದೇಹಕ್ಕೆ ಒಗ್ಗಿದ ಆಹಾರದ ಪ್ರಭಾವ ವಂಶವಾಹಿಗಳ ಮೂಲಕ ನಮ್ಮ ಮೇಲೂ ಬೀರುತ್ತದೆ. ಸ್ಥಳೀಯ ವಾತಾವರಣ, ನೀರು, ಮಣ್ಣಿನ ಗುಣಗಳು ನಮ್ಮ ದೇಹಕ್ಕೆ ಹೊಂದಿಕೆ ಆಗಿರುತ್ತವೆ. ಉದಾಹರಣೆಗೆ ದಕ್ಷಿಣ ಕನ್ನಡ, ಉಡುಪಿ, ಮಲೆನಾಡಿನ ಕಡೆ ಕುಚ್ಚಲಕ್ಕಿ ಅನ್ನ, ಸೌತೆಕಾಯಿ, ಕುಂಬಳಕಾಯಿ, ಬಸಳೆ, ಹರಿವೆ ಸೊಪು್ಪಗಳನ್ನು ಆಹಾರದಲ್ಲಿ ಬಳಸಲಾಗುತ್ತದೆ. ಅಲ್ಲಿನ ಬಿಸಿ ವಾತಾವರಣಕ್ಕೆ ತಂಪಾದ ಈ ಅಡುಗೆ ಅನಿವಾರ್ಯ. ಹಾಗೆಯೇ ಉತ್ತರ ಕರ್ನಾಟಕದವರು ಬಿಳಿ ಅಕ್ಕಿ, ಜೋಳದ ರೊಟ್ಟಿ, ಮೂಲಂಗಿ, ಬದನೆಕಾಯಿ, ನುಗ್ಗೆ ಸೊಪು್ಪಗಳನ್ನು ಹೆಚ್ಚು ಬಳಸುತ್ತಾರೆ. ಕೇರಳ , ಕರಾವಳಿ ಕರ್ನಾಟಕದಲ್ಲಿ ಅಡುಗೆಗೆ ತೆಂಗಿನೆಣ್ಣೆಯನ್ನು ಮುಖ್ಯವಾಗಿ ಬಳಸಿದರೆ ಉತ್ತರ ಕರ್ನಾಟಕದಲ್ಲಿ ಸೂರ್ಯಕಾಂತಿ ಎಣ್ಣೆ, ಶೇಂಗಾ ಎಣ್ಣೆ ಬಳಕೆ ಹೆಚ್ಚು.
